دوم پطرس 2 - کتاب مقدس به زبان گیلکی - گویش شرقی

دورؤغی پیغمبرؤن و معلیمؤن

¹ أما یهود مردوم مئنه، دورؤغی پیغؤمبرؤن أم ایسأبون، هوطؤ کی شیمئه مئنم دورؤغی معلیمؤن أنن کی جیرجیرکی غلط تعلیمؤن أبئنن کی کوشنده ایسه و هو أربابیِ کی ایشؤنه بیئه، حشا کؤنن و ایطؤری ناخبر بلایی خوشؤن سر أبئنن.

² خیلئن ایشؤن بی عیفتئن دومبال دکئنن و هیشؤن خؤنی، حقیقت راه کفر گونن.

³ و خوشؤن طمع راه مئن، دورؤغ گبؤن همأ، شمره غارت کؤنن. ایشؤن محکومأبؤن کی قبلترؤن تعیین بوبؤ، ایشؤن رافا ایسأ و ایشؤن نابودی نخوته!

⁴ چون أگه خدا او فریشته ئانه کی گوناه بودن رحم نوده، بلکه اوشؤنه جهندم سیاچال مئن تؤدأ و ظلمات تاریکی دست بسپارده تا داوری به بدأشته ببون؛

⁵ أگه قدیم دونیا سر رحم نوده، بلکی نوحه، کی عیدالت پیغؤمه أرد، هفت نفر دیگر همرأ حیفظ بوده و بأزون او طوفؤنه بی دینؤن سر بأرده؛

⁶ أگه سدوم و عموره شهرؤنه گورشأگوده و نابودی به محکوم بوده تا یکته درس عیبرت ببون، بی‌دینی آخرعاقبت ئبه،

⁷ و اگر لوطه کی صالح بو و بی‌‌دینؤن هرزگی جی د وأکته‌بو، نجات بدأ-

⁸ چون او صالح مردأی هر روز اوشؤن همأ سر گود و اون صالح روح، اوشؤن زشت کردکارؤن دئن و ایشتؤسن أجی عذاب کشی-

⁹ پس خداوند دؤنه کی چوطؤ صالحؤنه أزمیتؤن أجی رهاواکونه و آدمیِ کی صالح نئه، بدأره داوری روز مکافات ئبه،

¹⁰ مخصوصا اوشؤنئه کی خوشؤن فاسید هوا و هوس خواسته ئان دومبال درن و ایقتداره کوچیک دؤنن. ایشؤن أندی سرکش و خودخواهن که آسمؤنی پیله‌کسؤنه کفر گوتن أجی هیچ ترس ندأنن؛

¹¹ با ای کی فریشته ئان کی ایشؤن قوت و ایقتدار پیله تر ایسه، هرگی او زمت کی خداوند ای پیله کسؤنه محکوم بوده، ایشؤنه تؤهین نوکؤنن.

¹² ولی اوشؤن، حَیوؤنه مؤنن کی شعور ندأنه و خوشؤن طبیعته دومبال کؤنن و دونیا بمأن تا اسیر ببون و هلاکأبون، و او چیزؤنئه کی مننئن بفهمن فحش دئنن و خوشؤن فساد مئن هلاک خأ ببون.

¹³ و او بدی عوض کی بودن، بدی اوشؤن سزا بنه. ایشؤن خوشی و شهوترؤنی و خوشگوذرؤنی، رؤشن روز مئن دره. کثیف لکه ئانی ایسن کی شیمئه همرأ مهمؤنی هنن، گول زئن أجی کیف کؤنن و اونه دست وینگینن.

¹⁴ اوشؤن چوشمؤن زینا یأجی پوره و گوناه گودن أجی سیرأنبنه. ایشؤن، او جوؤنؤنه کی بی ثباتن فیتأدئنن و اوشؤن دیلؤن طمع مئن ماهیره! لعنت زأکؤنن،

¹⁵ راست راه دست ویتن و گومراه بوبؤن. اوشؤن بلعام، بعور زأک راه پیش بیتن کی نادرستی موزده خوش دأشت.

¹⁶ ولی بلعام خوشه بد کردکارؤن خؤنی تؤبیخ بوبؤ. یکته اولاغ، آدم زبؤن موسؤن گب بزئه و او نبی تورتوری کارؤن جلؤ بیته.

¹⁷ ای دورؤغی معلیمؤن، چوشمه ئانی ایسن که آؤ ندأنن و او أبرؤنه مؤنن کی طوفؤن بادؤن جلؤ هأرؤنده بنن و جهندم أمبس ظلمات ایشؤن رافا ایسأ.

¹⁸ چونکی بولند صدا همأ گبؤنی زئنن کی خودخواهی و نفهمی جی پوره، اوشؤنئه کی سختی همرأ بد آدمؤن چیکال أجی در بوشؤن، خوشؤن هوا و هوسؤن دؤم مئن تؤدئنن.

¹⁹ اوشؤنه وعده آزادی دئنن، چون هرچی که آدمی سر سواره، آدمی اون بنده بنه.

²⁰ چون اگر اوشؤنی کی خداوند و أمئه منجی عیسی مسیح بشناخته پسی، دونیای فساد أجی در بوشؤن، دومرته او چیزؤن مئن گیرفتار ببون و شکست بوخؤرن، ایشؤن عاقبت أولسر أجی بدتر بنه.

²¹ بهتر بو کی بنا یأجی صالح بؤن راه نشناخته‌بی، تا ای کی بشناخته وسی، او مقدس حکم أجی کی ایشؤنه بسپارده بوبؤ، رو وگردؤنن.

²² ای نقل، او چی باره گب زئنه که اوشؤن ئبه پیش بمأ: «سک خوشه جؤربأرده ور وگردنه،» و «بشوسته خوک، چل مئن گرأخؤردن ور»