دوم پطرس 1 - کتاب مقدس به زبان گیلکی - گویش شرقی

¹ شمعون پطرس أجی، عیسی مسیح رسول و نؤکر، اوشؤن ئبه کی بواسیطه خدا عیدالت و أمئه نجات دهنده عیسی مسیح، یکته ایمؤن، أمئه ایمون مورسؤن اوشؤن نصیب بوبؤ:

² فیض و صلح و سلامتی بواسیطه خدا و أمئه خداوند عیسی شناختن، فت فراوؤن شیمئبه بأ.

خدای دؤجئرؤن

³ اون الهی قدرت هرچئه کی زیندگی و دینداری به احتیاجه، أمره ببخشئه. اون شناختن همرأ ایسه که أمره خوشه جلال و خوبی همرأ، دوخؤنده دأنه.

⁴ کی بواسیطه ایشؤن خوشه پیلدنه و با ارزش وعده ئانه أمره ببخشئه تا بواسیطه اوشؤن، الهی طبیعت مئن شریک ببین و او فساد أجی که هوا و هوس خؤنی دونیا مئن دره، آزاد ببین.

⁵ هین وأسئه شیمئه تمؤم تلاشه بوکونین کی خوبیِ شیمئه ایمؤن مئن ایضافه بوکونین و خوبی همرأ، شناخت؛

⁶ و شناخت همرأ، خودداری؛ و خودداری همأ، پایداری؛ و پایداری همرأ، دینداری؛

⁷ و دینداری همرأ، برأرؤنه دوست دأشتن؛ و برأرؤنه دوست دأشتن همأ، محبت.

⁸ چونکه أگر ای صفتؤن شیمئه مئن هننأبی و هیطؤ زیادأبون، نوگذأنه که أمئه خداوند عیسی مسیح شناختن مئن بی‌اثر و بی‌ثمر ببین.

⁹ چون هرکس کی ای صفتؤنه ندأره، أندی کوره کی خو په جلؤ نینه، و یأدأگوده کی خوشه قدیم گوناهؤن أجی پکأبؤ.

¹⁰ پس أی برأرؤن، هرچی ویشتر حقسأی بدأرین کی شیمئه دوخؤنده بؤن و دؤجئه بؤنه ثابیت بوکونین؛ چون أگه ای صفتؤنه کأرأگیرین هرگی ور دنکئنین.

¹¹ و ایطؤری، کاملا شمره ایجازه بدأ بنه کی خداوند و أمئه نجات‌دهنده عیسی مسیح أبدی پادشاهی مئن راه بیاجین.

¹² پس مو خأنم ای چیزؤن همیشک شمره یأد دبون، هرچند اوشؤنه دؤنین و او حقیقت مئن کی بیاتین، قورص و قایم ایسأین.

¹³ مو فیکر کؤنم کی ای درسته کی تا او زمت کی ای تن مئن درم، ای صفتؤنه شمره یادآوری بوکونم تا شیمئه غیرت ويریسه،

¹⁴ چونکی دؤنم خیلی زود ای تن أجی بیرین هنم، هوجور که أمئه خداوند عیسی مسیح مأ نوشؤن بدأ.

¹⁵ و تا تینم تقلا کؤنم تا بوتؤنین می بمرده پسی همیشک ای چیزؤنه یأد بأرین.

¹⁶ چون او زمت که أمئه خداوند عیسی مسیح قوت و اون أمأنه شمره اعلؤم بودیم، خرافاتی نقلؤن دومبال کی چاچولبازی همأ چاگوده بوبؤ نوشؤبیم، بلکه اون جلاله أمئه چوشم أجی بدئه‌بیم.

¹⁷ چونکه او مؤقع که او، پئر خدا یأجی، جلال و احترؤم هیته، یکته دوخؤنکه او شکوه و جلال أجی اونه برسئه که، «اینه می عزیز ریکه که اون أجی راضئم.»

¹⁸ أمه خودمؤن او آسمؤنی دوخؤنکهَ أمئه گوش أجی بشتؤسیم، چون او مقدس کوه سر اون همأ ایسأبیم.

¹⁹ و أمه، پیغؤمبرؤن گبؤنه کی شأنه اوشؤنه اعتماد گودن دأنیم کی خوبه شمره یاد دبون، یکته چراغ مورسؤن کی ظلمات مئن فتؤنه تا او زمت کی صوب دکئه و روجا شیمئه دیلؤن مئن رؤشنأبون.

²⁰ هر چیز أجی پیشتر، اینه یاد بدأرین کی مقدس کیتابؤن نبوتؤن، هیتته، خود نبی تعبیر نئه.

²¹ چونکی هیچ نبوتی آدمی ایراده أجی بأرده نوبؤ؛ بلکه آدمؤن بواسیطه روح القدس، خدا طرف أجی گب بزئن.