دوم یوحنا 1 - کتاب مقدس به زبان گیلکی - گویش شرقی

¹ شیخَ جی، به انتخاب بوبؤ بانو و اونه زاکؤن که اوشونِ ’حقیقت‘ میئن دوست دَئنم- و نه فقط مو، بلکه همه اوشونی که حقیقتِ بشناختن-

² او حقیقتِ وسه که أمه میئن هنّه و تا اَبد أمه أمره موئنه.

³ فیض و رحمت و سلامتی، خدای پئر طرفَ جی و عیسی مسیحَ جی، او پئرِ ریکه، أمه أمره موئنه، حقیقت میئن و محبت میئن.

محبت و حقیقت میئن زندگی گودن

⁴ مو خیلی ذوق بودم که بفهمسَم، بعضی از تی زاکؤن بنا بر او حکمی که پئر جی هیتیم، ’حقیقت‘ میئن زندگی کوئنن.

⁵ الؤن، محترم بانو، تی جی یکته خواسته دَئنم. نه اینکه یکته تازه حکم، ته به بنویسم، بلکه هونی که از اول بداشتیم، که همدیگهَ محبت بکونیم.

⁶ و محبت ایی ایسّه که، أمه عین اونه حکمؤن زندگی بکونیم. حکم ای ایسه هوطو که از اول بشتوسین، که اونه محبت میئن زیندگی بکونین.

⁷ چونکه خیلی دغلباز آدمون دنیا میئن بمان، که اوشون اعتراف نکوئنن عیسی مسیح، اینسون جسم میئن بماء. ایجور آدمؤن، هو دغلبازون و ضید مسیح ایسّن.

⁸ واخوب ببین تا او کارِ ثمرهَ که أمه انجوم بدایم به باد ندین، بلکه یکته پاداش کامیل هگیرین.

⁹ هرکس که مسیح تعلیمَ جی پیش دکی و اونه میئن ثابت نوموئنی، خدای ندَئنه. هرکس که اونه تعلیم میئن ثابت بوموئنی، هم پئر دَئنه و هم ریکَه دَئنه.

¹⁰ اگه کسی شیمه ورجه بای و ایی تعلیمِ نَئری، اونه شیمه خونه میئن راه ندین و اونه سلامم اونه نوگوین؛

¹¹ چون کسی که اونه سلام بگی، اونه شریر کارون میئن شریک ایسه.

سرآخر

¹² هرچند خیلی چیزون دئنم که شمه به بنویسم، ولی نخوائنم مرکب و کاغذ أمره ببی. بلکه امید دئنم شیمه ورجه بَئم و رو در رو گب بزنیم تا أمه شادی کامیلَ بی.

¹³ تی انتخاب بوبؤ خاخورِ زاکؤن، ته به سلام رسونبئنن.