دوم قرنتیان 9 - کتاب مقدس به زبان گیلکی - گویش شرقی

پیشکشون اورشلیم مسیحی ئن ئبه

¹ ایسه ده احتیاج نئه کی ای خدمت باره مقدسین ئبه، شیمئه بنویسم.

² چونکی دونم ای کار ئبه چی ذوق و شوقی دانین و این واسی ئم مقدونیه ایموندارون ورجه شمره ایفتخار بودم. ایشونه بوتم کی شمه اخائیه ولایت مئن پارسال تا ایسه پیشکش هدان ئبه حاضیر بین. و شیمئه غیرت خیلی از اوشونم ای کار ئبه تحریک بوده.

³ ولی ای برارونه سرادئنم تا ثابیت ببون که امئه ایفتخار شمره ای جریون باره هچی نبو، بلکی هوطو کی بوتم، حاضیر ببین.

⁴ نبون که اگر چن نفر از مقدونیه ایموندارون می هما بان و بفهمن کی شمه حاضیر نین، امه او ایطمینون اجی کی شمره داشتیم شرمنده ببیم، دئه این اجی کی شمه خودتون چنی شرمنده خا ببین هیچی نوگونم.

⁵ پس واجیب بدئم برارون اجی بخام کی جلوتر شیمئه دئن ئبه بان و او پیشکشونئه کی وعده بدابون، تدارک بینن. تا ای پیشکش، پیشکشی ببون کی شیمئه میل همرا هدابین، نه زور همرا.

⁶ می گب اینه: هرکی کم بکاره، کمم بینه، و هرکی پور بکاره، پورم بینه‌.

⁷ هرکس خا هو اندی کی خوشه دیل مئن تصمیم بیته هدئه، نه بی میلی و زور همرا، چونکی خدا اونئه کی شادی هما پیشکش هدئنه دوست دانه

⁸ و خدا تینه هرته نعمته شیمئبه زیاداکونه تا همیشک همه چی مئن شیمئه احتیاج اندی بدارین، و هرته خورم کار مئن فت و فراوون بدارین.

⁹ هوتو کی زبور کیتاب مئن بنویشته بوبو: «دس و دیل بازی همرا ندارونه ببخشئه، اون صالحی تا ابد پابرجا ایسه.»

¹⁰ او کی دنهَ کشاورز ئبه و نون خوردن ئبه هدئنه، شیمئه دنهَ کشت و کار واسی حاضیراگوده، برکت دئنه و شیمئه صالحی محصوله زیاداکونه.

¹¹ شمه هر نظر اجی دولتمند بنین تا هر طرف اجی دست و دیل باز ببین، و شیمئه ای دست و دیل بازی بواسیطه امه خدا شکر گودن ئبه ختم بنه.

¹² چونکی ای خدمت، نه فقط مقدسین احتیاجاته برطرفاکونه، بلکی باعیث بنه خیلئن خدا بی حد و حیساب شکر بوکونن.

¹³ ای خدمت واسی مردوم خدا جلال دئنن، چونکی شمه نه فقط اعتراف کونین مسیح انجیله ایمون دانین بلکه اوشون و دیگرونه او چی مئن کی دانین شریک کونین.

¹⁴ هیطورم خدا پیله فیض واسی کی شیمئه سر هننا، اوشون شمره ذوق و شوق همرا دعا کونن.

¹⁵ خداونده او پیشکش واسی کی گوته‌شا نئه شکر کونم.