دوم قرنتیان 8 - کتاب مقدس به زبان گیلکی - گویش شرقی

تشویق گودن به دست و دیلبازی

¹ برارون، امه خانیم شمره او فیض مئن کی خدا مقدونیه کلیسائانه هدا، واخوباکونیم.

² چونکه اوشون مصیبت واسی، سخت ایمتحون بوبون، ولی بی حد و حیساب شادن و با ای کی خیلی نداری مئن ایسان، ولی دس دیل بازن.

³ چره کی مو شاهیدم کی خوشون توونه اندی حتی اون اجی ویشتر پا پیش بنان‌.

⁴ خیلی امره بی ریا میننت بودن و بخواستن ای خدمت مئن کی مقدسین شئه شریک ببون.

⁵ ایشون نه فقط اوجور که امه اینتظار داشتیم بلکی اول خوشونه خداوند ئبه وقف بودن و بازین مطابق خدا ایراده خوشونه امئبه وقفاگودن.

⁶ هین واسئه، امه تیتوس اجی بخواستیم هوطو کی خودش پیشتر اولی قدمونه ویته بو، الونم او کار خیره شیمئه مئن کامیل تمناکونه.

⁷ ولی اوجور که همه چی مئن سرترین، ایمون مئن، گب زئن مئن، دونایی مئن، بی ریایی مئن و شیمئه محبت نسبت به امه-پس ای کار خیر مئنم همه کس اجی سرتر ببین.

⁸ مو اینه شیمئبه حکم نوکونم، بلکی خانم بواسیطه دیگرون غیرت ثابیت بوکونم کی شیمئه محبتم بی ریا ایسه.

⁹ چونکه امئه خداوند عیسی مسیح فیض اجی واخوبین که هرچند دولتمند بو، شیمئه واسی ندارابو تا شمه اون نداری مئن دولتمندابین.

¹⁰ مو می نظره ای جریون باره گونم: ای به نفع شمه ایسه، پارسال، شمه نه هچی ای کار خیر انجوم دان مئن، بلکه اون انجوم دان ذوق و شوق مئنم پا پیش بنابین.

¹¹ پس الون ای کاره تمناکونین، تا ذوق و شوقی کی ای کار ئبه داشتین، اون تمناگودن شیمئه توون مالی هما جور ببون.

¹² چونکه اگر ذوق و شوق ببون، او ادم پیشکش مطابق او چی کی دانه قبولابنه، نه مطابق او چی کی ندانه.

¹³ چونکه امئه منظور ای نئه کی دیگرون آسایش مئن بیسن و شمه فشار مئن، بلکی خانیم منصفونه ببون،

¹⁴ کی الون شیمئه فراوونی، اوشون احتیاجاته برطرفاکونه تا یک روز اوشون فراوونی شیمئه احتیاجاته برطرفاکونه تا ایطوری اینصاف برقرار ببون.

¹⁵ هوطو کی تورات مئن بنویشته بوبو: «او کی زیاد جیماگوده بو، ایضافه نداشت، و او کی کم جیماگوده بو، کم و کسر نداشت.»

پولس تیتوس سفارشه کونه

¹⁶ ولی خدا شکر کونم که او غیرتی کی مو شیمئبه دانم تیتوس دیل مئن نی هننا.

¹⁷ چونکه اون نه فقط امئه خواستهَ قبول بوده، بلکی خودش ذوق و شوق زیاد همرا، این واسی کی شیمئه ورجه بأ پا پیش بنا.

¹⁸ امه یکته ده براره تیتوس همرا سرادئنیم که انجیل موعظه به تموم کلیسائان مئن سرشناسه.

¹⁹ و نه هچی ای، بلکه او برار کلیسائان اجی تعیین بوبو تا ای کار خیر که اون انجوم دان و ایداره گودن امئه وظیفهَ امئه همرا همسفر ببون. او کاری کی خداوند جلال واسئه و امئه خیرخواهئه نوشون دئنه.

²⁰ امه خیلی پانیم ای خدمت مئن کی پیشکشون جیماگودنه، کی دیل اجی و بواسیطه امه ایداره بنه، هیکس امئه سر عیب ننئه.

²¹ چونکی تقلا کونیم نه فقط خداوند نظر مئن، بلکی مردوم دید مئنم او چئه کی خوبه انجوم بدیم.

²² و ایشون همرا امئه براره سرادئنیم، کی خیلی اونه ایمتحون بودیم و بفهمسیم کی خیلی چئن مئن ذوق و شوق دانه، ولی ایسه او برار او ایطمینون زیاد خاطیری کی شمره دانه ویشتر از قبل ذوق و شوق دانه.

²³ تیتوس باره خا بوگوم که او خدمت مئن کی شمره کادره می شریک و همکار ایسه. و امئه برارون باره نی خان بوگوم که اوشون کلیسائان سرأدأرؤن و مسیح جلال ایسن.

²⁴ پس شیمئه محبت و ایفتخاری کی شمره کونیم کلیسائان محضر مئن ای آدمون ئبه ثابيت بوکونین.