دوم قرنتیان 6 - کتاب مقدس به زبان گیلکی - گویش شرقی1 پس او چی مئن کی خدای همکارون ایسیم، شمراجی خواهش دانیم کی خدای فیضه هچی بدست نارین. 2 چونکی خدا اشعیای پیغمبر کیتاب مئن گونه: «مناسب وقت مئن، تأ آؤجا بدام، و نجات روز مئن، تی یاور بوبوم.» ایسه، الون خدا مناسب وقته؛ ایسه، الون نجات روز ایسه. پولس سختیئن 3 امه هیچ سنگی هیکس رای مئن توندئنیم، تا هیچ عیبی امئه خدمت مئن دنبون، 4 بلکی هر کاری کی کونیم نشون دئنیم کی خدای خدمتکارونیم: تاب و تحمل همرا مصیبتون مئن، سختئن و بلائان مئن، 5 چو خوردنون زمت، زیندونون مئن، ولوله ئان مئن، بیگاری مئن، شؤ بی خؤیئن مئن و گوشنگی مئن نوشون دئنیم کی خدا خدمتکارون ایسیم؛ 6 پاکی همرا، دونایی همرا، صبر همرا، مهربونی همرا، روح‌القدس همرا، محبت بی‌ریا همرا، 7 راستگویی همرا، خدا قوت همرا، صالحی سلاحون همرا که امئه چپ دست و راست دست مئن دره، 8 عزت و خواری مئن، و بهتون و تعریف مئن، امئه همرا دغلبازون جور برخورد بنه، با ای حال راستگو ایسیم، 9 امئه همرا بی نوم و نوشونون مورسون رفتار بنه، با ای حال بشناخته بوبوریم، امئه همرا بمرده ئان مورسون رفتار بنه، با ای حال بینین، هنده زیندهَ‌یم؛ امئه همرا جوری رفتار بنه کی اینگار مجازات مئن دریم، با ای حال حلئه بکوشته نوبویم؛ 10 امئه همرا غمگینون مورسون رفتار بنه، با ای حال همیشک شادیم؛ امئه همرا ندارون مورسون رفتار بنه، با ای حال خیلئنه پولداراکونیم، امئه همرا یک جور رفتار بنه کی اینگار هیچی ندانیم، با ای حال صاحب همه چی ایسیم. 11 ای قرنتس مردوم، امه رک شیمئه همرا گب بزیم و امئه دیله شیمئبه واگودیم. 12 امه امئه محبته شمراجی مضایقه نودیم بلکی شمه ایسین کی شیمئه محبته امراجی مضایقه بودین. 13 شیمئه همرا زاکون جور گب زئنم؛ شمرام شیمئه دیله امئبه واکونین. خدای زینده معبد 14 بی‌ایمونون پیشکاوول جیر نشین، چونکی صالحی و شرارت همدیگره چی ربطی دانن و نور و ظلمت چی رفاقتی دانن؟ 15 مسیح و بلیعال یعنی شیطون چی سازشی دانن و مؤمین و کافر چی شباهتی دانن؟ 16 خدا معبد بتون هما چی سازشی دانه؟ چونکه امه خدای زینده معبد ایسیم. اوجور کی خدا تورات و پیغمبرون کیتابون مئن گونه: «مو اوشون مئن ایسنم و اوشون مئن راه شنم و مو اوشون خدا بنم و اوشون می مردوم بنن.» 17 پس، خداوند گونه: «ایشون مئن اجی بیرین باین و ایشون اجی سیوا ببین. و هیتته نجیس چئه دس نزنین هو زمت شمره به گرمی قبول کونیم.» 18 «و مو شیمئبه پئر بنم و شمه می پسرون و دترون بنین خداوند قادر مطلق اینه گونه.» |
@ 2024 Korpu Company