دوم قرنتیان 3 - کتاب مقدس به زبان گیلکی - گویش شرقی

تازه عهد خدمتکارون

¹ مگر هندئه بناگودیم امراجی تعریف گودن؟ یا ای که امه احتیاج دانیم بعضئن مورسون شمره سفارشنومه هدیم یا شمراجی سفارشنومه هگیریم؟

² شمه خودتون امئه سفارشنومه‌َین، یکته نومه که امئه دیلون سر بنویشته هننأ که همه ته تینن اونه بوخونن و بشناسن.

³ شمه نوشون بداین کی مسيح نومه ایسين، کی بواسیطه امه شمره برسئه، کی مرکب اجی بنویشته نوبو، بلکی خدای زینده روح هما بنویشته بوبو و نه سنگی لوح سر، بلکه آدمون دیلون لوح سر بنویشته بوبو.

⁴ امه مسیح خاطیریه کی ایجور ایطمینون خدا محضر مئن دأنیم.

⁵ نه کی خودمون لیاقت بداریم کی ایدعا بوکونیم که امئه دس اجی یک چی بر انه، بلکه امئه لیاقت خدا یاجی ایسه.

⁶ خدا بو که امره لیاقت هدا تا تازه عهد خدمتکارون ببیم، عهدی کی خدا روح سر برقراره، نه او چی سر کی یکته بنویشته ویشته نئه‌. چونکی بنویشته کوشنه، اما خدا روح زیندگی بخشنه.

⁷ ایسه، اگر او خدمت کی مرگه ختم بؤ و سنگی لوح سر حک بوبوبو، جلال همرا ظهور بوده اوجور کی بنی اسراییل مننیسن موسی دیم جلال واسی اونه نیگا گودن، هرچند او جلال از بین شودبو،

⁸ چندی ویشتر، او خدمتی کی بواسیطه خدا روح ایسه جلال همرا ایسه.

⁹ چونکه اگه خدمتی که محکومابون ختم بؤ جلال همرا بو، چنی ویشتر خدمتی کی صالح بؤنه رسنه ویشتر جلال دانه.

¹⁰ چون او چی کی یه زمت پورجلال بو، ایسه در مقایسه با ای جلال کی سرتره، ده جلالی ندانه.

¹¹ و اگه او چی کی نابودابؤ جلال همرا بو، او چی کی باقی مونه چنی ویشتر جلال همرا ایسه.

¹² پس چونکی ای جور امید دانیم، جرأت هما گب زئنیم،

¹³ نه موسی مورسون کی یکته نقاب خوش دیم سه هکشئه تا بنی اسراییل آخربسر او چئه که از بین شودبو، نینن.

¹⁴ ولی ایشون فیکرون تاریکابو چونکه هو نقاب عهد عتیق خوندن زمت تا ایمرو باقی بومونسه و ویته نوبو، چونکه هچی فقط مسیح مئن خا ویته ببون.

¹⁵ حتی تا ایمرو، هروقت کی موسی توراته خونن، یکته نقاب اوشون دیل سه قرار گینه،

¹⁶ ولی هر وقت یگ نفر خداوند ورجه وگرده، نقاب ویته بنه.

¹⁷ خداوند، روح ایسه و هرجا خداوند روح دبون، اوره آزادی هننا.

¹⁸ و تموم امه کی بی نقاب دیم همرا، خداوند جلاله، یکته آینه مورسون نیگا کونیم، هو شکل مورسون، جلال اجی یکته جلاله کی ویشترابنه عوضابنیم؛ و ای خداوند اجی شروع بنه کی روح ایسه.