دوم قرنتیان 13 - کتاب مقدس به زبان گیلکی - گویش شرقی

آخرته ایخطارون

¹ ای سومین دفا کی شیمئه دئن ئبه هنم. «هر گبی کی بزئه بنه، دوته یا سوته شاهید اجی ثابیت بنه»

² مو دومی مرتبه که اوره ایسابوم، اوشونی کی پیشتر گوناه بوده‌بون، و بقیهَ ایخطار بدابوم و الونم که اوره نیسام هنده ایخطار دئنم که اگه دومرته شیمئه ورجه بام اوشونه رحم نوکونم.

³ چونکی شمه یکته دلیل دومبال درین کی ثابیت بوکونین مسیح بواسیطه مو گب زئنه. مسیح در برابر شمه ضعیف نئه، بلکی شیمئه مئن قوی ایسه.

⁴ چون هرچند او ضعف مئن مصلوبابو، ولی خدا قوت همرا زیندگی کادره. چونکی امرام اون مئن ضعیفیم، ولی در برابر شمه، اون همرا خدا قوت اجی زیندگی خانیم گودن.

⁵ شمره محک بزنین، تا بینین ایمون دانین یا نه. شمره ازمیت بگیرین. یا مگه اینه خودتون باره نفهمنین کی عیسی مسیح شیمئه مئن دره؟ -مگه ای کی ای ایمتحون مئن ردابین!

⁶ امید دانم اینه بفهمین که امه ای ایمتحون مئن ردانوبویم.

⁷ ولی امه خدا محضر مئن دعا کونیم کی خطا نوکونین، نه ای کی معلوم ببون امه ای ایمتحون اجی سربولند بیرین بمایم، بلکی شمه او چئه کی درست ایسه، بوکونین، حتی اگر ایطو نوشون بدئه که امه ردابویم.

⁸ چونکه امه مننیم هیچ کاری حقیقت ضید بوکونیم، بلکه هر او چی کی کونیم حقیقت واسی ایسه‌.

⁹ چون او زمت که امه ضعیف ببیم و شمه قوی، ای امره شاداکونه و امئه دعا اینه کی شمه از سر قوت بگیرین.

¹⁰ هین واسئه مو ای چیزونه وقتی شیمئه ور نیسام شیمئبه نیویسنم، تا وقتی کی شیمئه ورجه انم مجبور نبوم می ایختيار همرا توندی همرا رفتار بوکونم، او ایختیار کی خداوند بنا گودن ئبه مأ هدا، نه خراب گودن ئبه.

سراخر

¹¹ سراخره، ای برارون، شاد ببین. شیمئه فیکر ای ببون که از سر قوت بگیرین، کس کسونه تسلی بدین، کس کس همرا همرأی ببین، صلح و سلامتی مئن زیندگی بوکونین؛ و خدای محبت و صلح و سلامتی، شیمئه هما مونه.

¹² مقدس موچی همرا همدیگره سلام بوگوین.

¹³ مقدسین همه ته، شمره سلام رسونئنن.

¹⁴ خداوند عیسی مسیح فیض و خدا محبت و روح القدس رفاقت، شیمئه همه ته همرا ببون.