دوم قرنتیان 10 - کتاب مقدس به زبان گیلکی - گویش شرقی

پولس خوشه خدمت اجی دفاع کونه

¹ مو، پولس، خودم مسیح فروتنی و نرمی همرا شمره میننت کونم-منی کی خیلی از شمه گونین وقتی شیمئه ورجه ایسام سربجیرم و او زمت کی شیمئه ورجه نیسام جسورم!

² مو شمره میننت کونم او زمت کی شیمئه ورجه هنم مجبور نبوم شیمئه همرا جسارت اجی رفتار بوکونم، اوجور کی بعضی مردوم خیال کونن که امه آدمی فیکرون همرا رفتار کادریم.

³ چونکه هرچند جسم مئن زیندگی کونیم ولی مطابق جسم جنگ نوکونیم.

⁴ چره که امئه جنگ اسلحه ئان جسم اجی نئه، بلکی خدا قوته دانه تا قلعه ئانه نابوداکونه.

⁵ امه هر بحثی و هر کسیه کی خدا دؤنایی ضید پیله پیله نظر دئنه از بین بئنیم و فیکریه مجبوراکونیم کی مسیح جی ایطاعت بوکونه.

⁶ او موقع کی مسیحه تموم و کمال ایطاعت کادرین امه آمادهَ‌یم که هر نا ایطاعتیه تنبیه بوکونیم.

⁷ نیاکونین، بینین شیمئه چوشم جلو چی هننا. اگر یه کس ایطمینون دانه کی مسیح شی ایسه، او ادم خا بودونه هیطو که او مسیح شی ایسه، امرام مسیح شی ایسیم.

⁸ چونکه حتی اگر اننی ویشتر می ایقتداره ایفتخار بوکونم شرمنده نبنم. او ایقتدار کی خداوند، شیمئه بنا گودن ئبه مأ هدا نه شیمئه نابودی به.

⁹ نخانم ایطو بنظر با کی مو خانم می نومه ئان اجی شمره بترسونم،

¹⁰ چونکی گونن: «اون نومه ئان سخت و سنگینه، ولی رو به رو ضعیفه و اون گب زئن به حیساب نانه»

¹¹ بوگذار او کی ایطو گونه بفهمه هر او چی کی وقتی نیسام و می نومه مئن گونم او زمت کی بام او کاره کونم.

¹² نه ای که امه جرأت کونیم امره اوشون جرگه اجی بحیساب باریم کی خوشون اجی تعریف کونن یا خوشونه کس کس هما مقایسه کونن. ولی او موقع اوشونی که خوشونه کس کس همرا سبک سنگین کونن و خوشونه کس کس همرا مقایسه کونن، نفهمنن.

¹³ ولی امه بیش از حد ایفتخار نوکونیم، بلکی فقط هو قدر ایفتخار کونیم کی خدا امئبه معین بوده، او حد که حتی شمرام در بر گینه.

¹⁴ چونکه امه امئه لنگه امئه حد اجی ویشته درازانودیم اوجور کی اینگار هرگی شمره خدمت نودیم چره که امه اول ته کسونی بیم کی مسیح انجیله شمره برسونیم.

¹⁵ امه امئه حده دانیم و دیگرون زحمت بکشئرأجی ایفتخار نوکونیم. ولی امه امید دانیم که هرچی شیمئه ایمون ویشتر پیلله بنه امئه خدمت حد شیمئه مئنم خیلی پیلترابون،

¹⁶ تا بوتونیم انجیله او ولایتون مئن کی شمراجی دوره موعظه بوکونیم. چونکی نخانیم او کار ئبه کی پیشتر یک نفر ده، خوشه سامؤنسر مئن بوده ایفتخار بوکونیم.

¹⁷ بوگذارین هرکس ایفتخار کونه خداونده ایفتخار بوکونه.

¹⁸ چون او کی خودش خوشاجی تعریف کونه مورد قبول نئه بلکه او ادم مورد قبوله کی خدا اون اجی تعریف بوکونه.