دوم قرنتیان 1 - کتاب مقدس به زبان گیلکی - گویش شرقی

¹ پولسَ جی که به خدا خواسته مسیح عیسی رسول ایسّه، و أمه برار جی تیموتائوس، خدای کلیسا به قُرنتُسِ شهر میئن و همته مقدسین، سرتاسر اَخائیه ولایت به:

² امه پئر، خدا طرف جی و خداوند عیسی مسیح طرف اجی، فیض و سلامتی شیمئبه بای!

خدای تموم تسلی ئن

³ متبارک ببی خدا، أمه پئرِ خداوند، عیسی مسیح، که رحمتؤن پئر و تموم تسلیئن پئر ایسّه؛

⁴ او خدا که اَمره تموم امی مصیبتون مئن تسلی دئنه، تا اَمرم بتونیم اوشونیه که مصیبتون مئن ایسان، با او تسلی که اوناجی هَیتیم، تسلی بدیم.

⁵ چون هوطوکه مسیحِ عذابون جی فت فراوون سهم بئنیم، هوطورم به واسیطه مسیح تسلی، فت و فراوون سهم بئنیم.

⁶ اگه امه مصیبت میئن ایسایم، شیمه تسلی و نجات واسی ایسّه، و اگه تسلی دانیم، شیمه تسلی وسه ایسّه، و ایی کارگر دکئنه او وخت که شمه او عذابونه که أمه کشنیم صبر و حوصله أمره طاقت اَبِئنین.

⁷ أمه امید شیمه باره پابرجا ایسّه، چونکه دوئنیم هوطو که أمه عذابؤنِ میئن سهم دئنین، أمه تسلی مئن نی خا سهم بدارین.

⁸ چونکه ای برارؤن، نخوائنیم او مصیبتونَ جی که آسیا منطقه میئن أمه سر بوگذشته، بی خبر ببین. چون فشارؤنی که أمه سر بومَه بیشتر از أمه طاقت بو که امه زینده مونسن اجی ناامیدَ بوئبیم.

⁹ راس راسه امئبه ایطو بو کی اینگار امره مردن ئبه محکوماگودن. ولی ایشون همه این وسه اتفاق دکته که نه امره، بلکه خدا توکل بکونیم که بمرده أنِ زینده واکوئنه.

¹⁰ خدا اَمره ایی جور خطر جی کی کوشنه رهایی بدا و رهایی دِئنه. اَمه امید به اونه که هندئرام خا امره رهایی بدی،

¹¹ شمرأم خا امره شیمه دوعا أمره یاری بدین، تا خیلیئن امه خاطیری شکر بکونن، او برکت واسی کی در جواب دعای خیلئن، امره هدا بوبو

پولسِ برنومه ئان عوضابنه

¹² چون امه ایفتخار، امه وجدان ایسه که گوایی دئنه که ای دنیا مئن روراستی و صاف و صادقی هما که خدا یاجی ایسه رفتار بودیم، نه آدمی حیکمت همرا، بلکی خدا فیض همرا رفتار بودیم علی الخصوص شیمه همره.

¹³ چونکه امه جوز او چیزی که شمه خؤنین و فهمنین شیمئبه ننویسنیم. و مو امید دانم شمه اینه خوب بفهمین.

¹⁴ هوتو که شمه امره کم و بیش بشناختین ، تا امه خداوند عیسی روز میئن شمه اَمره فخر بکونین ، اوجور که امه شیمه واسه فخر کونیم.

¹⁵ چون این اجی مطمئن بوم، خواستم اول شیمی ورجه بام تا دومرته فیضه تجربه بکونین.

¹⁶ می مو خواستم می راه سر مقدونیه منطقه بام و شمره بینم، و مقدونیه اجی هنده شیمه ورجه وگردم تا مه یهودیه ولایت طرف راهی بکونین .

¹⁷ مگه وقتی کی خواستم ای کاره بکونم دو دیل بوم ؟مگر مو آدمی فیکرون همره تصمیم گینم اوجور که یک دم هم بوگوم بله بله، و هم بوگوم نه نه؟

¹⁸ خدا وفاداری سر قسم که امه گب شیمه امره بله و نه نبو.

¹⁹ چونکه چونکه خدا ریکه، عیسی مسیح، که من و سیلاس و تیموتائوس اونه شیمه مئن اعلوم بودیم ، بله و نه نبو ، بلکه اون میئن همیشه بله ایسه .

²⁰ چونکه تموم خدا وعده ان عیسی مسیح مئن بله ایسه. هینه واسه بواسیطه اونه که امه آمین گونیم تا خدا جلال بیاجی .

²¹ و خدا ایسه که امره شیمه امره مسیح مئن برقرار کوئنه. و او اَمره مسح بوده

²² و او خوشه مهره أمه سر بزه و خو روح یکته بیعؤنه مورسون أمه دیلون میئن بنا.

²³ خدا گواه گینم که فقط این وسه که شمره ناراحتانکونم قرنتس ونگرسم .

²⁴ نه اینکه شیمه ایمؤن سر آقایی بکونیم، بلکه شیمه أمره و شیمه شادی به تقلا کوئنیم، چره که ایمون میئن قایم ایساین .