اوّل تیموتائوس 6 - کتاب مقدس به زبان گیلکی - گویش شرقی

¹ همه ته اوشؤن کی بندگی یوغ جیر ایسأن، خأ خوشؤن أربابؤنه تمؤم و کمال احترؤم بنئن تا خدا نؤم ضید و أمئه تعلیم ضید بد چی نوگؤن.

² اوشؤنی کی ایشؤن أربابؤن ایمؤندارن، نخأ برأر بؤن خؤنی اوشؤنه کمته حرمت بنئن. بلکی خأن بهتر اوشؤنه خدمت بوکونن، چون اوشؤنی کی ای خدمت مئن منفعت بئنن، ایمؤندار و عزیزن. ای چیزؤنه اوشؤنه تعلیم بدی و تشویق بوکون کی ایطؤ بوکونن.

پولدوستی آخرعاقیبت

³ أگر یگ نفر یه جور د تعلیم بدئه و أمئه خداوند عیسی مسیح درست کلؤم و او تعلیم همرأ کی دینداری راه مئن دره جور در نأ،

⁴ او، غرور أجی باد بوده و هیچی نفهمنه. ایطؤچی آدم کلیمهَ‌ن سر جنگ و جدال و دعوا مرافعه دأنه که اون أجی حیسادت، ایختلاف، تؤهین و بدگمؤنی ویریسنه

⁵ و دائم مردوم مئن جنگ و جدال باعیث بنه کی ایشؤن فیکر بپیسئه و حقیقت أجی بینصیب ایسن و خیال کؤنن کی دینداری یکته وسیله ایسه منفعت ئبه.

⁶ ولی دینداری قناعت همرأ، یکته پیله منفعته.

⁷ چره که أمه هیچی ای دونیا مئن نأردیم و هیچی یم اون أجی برده مننیم.

⁸ ولی أمه أگه غدا و لیواس دأنیم، اوشؤن قانع بنیم.

⁹ أما اوشؤن کی پولدارأبؤن نأجهَ دأنن، وسوسه مئن دکئنن، دؤم مئن دکئنن، و خیلی بیخودی خواسته ئان مئن کی ضرر رسؤنئنن دکئنن، کی مردومه نابودی و هلاکت سمت هکشنه.

¹⁰ چونکی پولدوستی هر رقم بدی ریشه ایسه. و هی پول حیرص وأسئه کی بعضئن ایمؤن أجی دورأبنن و خوشؤنه یک عالم درد مئن گیرفتارأکؤنن.

پولس سفارش، تیموتائوس ئبه

¹¹ أما تو کی خدا مردأکی، ایشؤن همه أجی فرار بوکون و صالح بؤن و دینداری و ایمؤن و محبت و پایداری و ملایمت دومبال دبو.

¹² ایمؤن خؤرم جنگ مئن بجنگ و او أبدی زیندگئه که اون ئبه دوخؤنده بوبؤی و اونه زیاد شاهیدؤن جلؤ اعتراف بودی، دچکی.

¹³ مو خدا حضور مئن که همه چئه زیندگی بخشنه، و مسیح عیسی کی پنتیوس پیلاتس جلؤ خؤرم اعتراف بوده، سخت تأ سفارش کؤنم

¹⁴ کی ای حکمه تا أمئه خداوند عیسی مسیح أمأن مؤقع، بی‌عَیب و بی سرأکؤ بدأری؛

¹⁵ کی خدا اونه یکته مناسب وقت مئن به أنجؤم رسؤنئنه، او کی متبارک ایسه و تنها حاکیم، و شاهؤن شاه و خداوندؤن خداوند ایسه.

¹⁶ فقط اونه که أبدی ایسه، او که یکته نور مئن ایسأ کی دسفأرس نئه، و هیکس اونه ندئه و دئه مننئه، حرمت و سلطنت تا أبد اون همرأ ببون! آمین.

¹⁷ ای دونیای پولدارؤنه بوگو کی مغرور نبون و خوشؤن امیده ای دونیا مال سر ننئن، کی نومؤنه. بلکی ایشؤن امید به او خدا ببون که همه چئه فت و فراوؤن أمئبه حاضیرأکؤنه تا اوشؤن أجی کئف بوکونیم.

¹⁸ اوشؤنه دستور بدی کی خوبی بوکونن، خؤرم کارؤن مئن دؤلتمند ببون، دست دیلباز و بخشنده ببون.

¹⁹ ایطؤری، یکته گنج خوشؤن ئبه جیمأکؤنن کی ایشؤن آینده به، یکته خؤرم بنورهَ؛ تا بوتؤنن او چئه که حقیقتی زیندگی ایسه، به دست بأرن.

²⁰ أی تیموتائوس، او أمؤنته کی تأ بسپارده بوبؤ بدأر. ای هپراگبؤن أجی و مخالف فیکرؤن أجی کی به غلط معرفت دوخؤنده بنه، دوری بوکون.

²¹ چون بعضی آدمؤن کی ای چیزؤن مئن ایدعا دأنن، ایمؤن أجی دورأبؤن. فیض تی همرأ ببون.