اوّل تیموتائوس 5 - کتاب مقدس به زبان گیلکی - گویش شرقی

تعلیمؤن کلیسا به

¹ پیرمردأکه تشر نزن، بلکه اونه تی پئر مورسؤن تشویق بوکون، و جوؤنؤنم تی برأرؤن مورسؤن،

² و پیرزنأکؤنه شیمئه مأرؤن مورسؤن، و جوؤن زنأکؤنه شیمئه خأخؤرؤن مورسؤن؛ تمؤم پاکی مئن.

³ بیوه زناکؤنه أگه راسه راسه بیکس ایسن، حرمت بنی.

⁴ اما أگر یکته بیوه زنأک، زأکؤن و نوه ئان دأنه، اوشؤن خأ أولسر باموجن کی خوشؤن خؤنوادهَ دأشتدأری گودن همأ، خوشؤن دیندارئه نوشؤن بدئن و ایطؤ خوشؤن دِینه نسبت به خوشؤن پئر و مأر و أجداد بجا بأرن، چره کی ای، خدا خوش أنه.

⁵ او کس کی راس راسه بیوه و بیکسه، خدا امید دبسته و شؤ و روز دعا مئن و خدا یأجی کمک گیتن مئن مشغوله.

⁶ أما أگه یکته بیوه زنأک عیاشی مئن زیندگی کؤنه، با ای کی زینده ایسه، بمردهَ.

⁷ ای چیزؤنم حکم بوکون تا اوشؤن زیندگی مئن هیچی دنبون که اون خؤنی سرأکؤ بوخؤرن.

⁸ ولی أگر یگ نفر خوشه فامیلؤن و بخصوص خوشه خؤنواده احتیاجات دومبال دنبون، خوشه ایمؤنه حشا کؤنه و یکته بی‌ایمؤن أجی بدتره.

⁹ فقط او بیوه‌زنأکؤنه نؤم‌نیویسی بوکون کی شصت سال ویشته بدأرن و یک دفأ مرد ببرده بی.

¹⁰ و خؤرم کارؤن أنجؤم دأن مئن شناس ببون، یعنی: خوشؤن زاکؤنه پیلله بوده‌بی، نسبت به غریبه ئان میمؤندوست ببون، مقدسین پأنه بوشؤرده بی، دردمندؤن أجی مراقبت بوده بی، و خوشؤنه هرجور خؤرم کار ئبه وقف بوده‌بی.

¹¹ اما او بیوه‌زنأکؤنئه کی جوؤنترن نؤم‌نیویسی نوکون، چون هیطؤ کی ایشؤن هوا و هوس ایشؤنه مسیح جی دورأکونه، خأنن مرد ببرن.

¹² این وأسی محکومأبنن، چون خوشؤن أولته ایمؤنه پا جیر نئنن.

¹³ بعلاوه، اوشؤن تنبلئه یاد گینن، ای خؤنه او خؤنه شنن، نه تنها تنبلی، بلکی گب‌خبربر و فضول نی بنن، و او چیزؤنئه کی نخأ بوگؤن گونن.

¹⁴ پس می نظر اینه که او بیوه‌َن کی جوؤنترن، مرد ببرن و زأک بچینن، خؤنه داری بوکونن، و دوشمنه فرصت ندئن کی بندؤم بزنه.

¹⁵ چون هی ایسه نی بعضئن شیطؤن دومبال بوشؤن و گومراه بوبؤن.

¹⁶ أگر یکته ایمؤندار زنأی، خو فامیلؤن مئن بیوه بدأره، خأ خودش اوشؤنه کمک بوکونه تا کلیسای ئبه سربار نبون و کلیسا بوتؤنه او بیوه‌زناکؤن أجی مراقبت بوکونه کی راس راسی بیکسن.

¹⁷ او ریش سیفیدؤن کی خؤرم رهبری بوده‌بی، دو برابر حرمت لایقن، علی الخصوص اوشؤن کی مؤعظه و تعلیم ئبه زحمت کشنن.

¹⁸ چون تؤرات کیتاب مئن گونه: «یکته گؤ دهنه کی خرمن کوتنئنه، دنبد.» و «کارگر خأ خوشه دستموزده هگیره.»

¹⁹ هیچ بهتؤنئه هیتته أز کلیسا ریش سیفیدؤن ضید قبولأنوکون، مگر ای کی دوته یا سوته شاهید ایسأبی.

²⁰ اوشؤنیِ کی گوناه مئن پافشاری کؤنن، همه کس جلؤ تشر بزن تا بقیه‌َن بترسن.

²¹ خدا و مسیح عیسی و دؤجئه فریشته ئان جلؤ، تأجی خواهش کؤنم کی ای قانونؤنه بی هیچ غرضی رعایت بوکونی و هیتته کاره، طرفداری سر أنجؤم ندی.

²² این وأسئه که یگ نفره خدمت ئبه اینتخاب بوکونی عجله نوکون، دیگرؤن گوناهؤن مئن شریکأنبو، تأ پاک بدأر.

²³ بأزین هچی فقط آؤ نوخؤر، بلکی تی مَعده وأسی و تی ناخوشئن وأسی که همیشک دأنی، أننئکم شراب وأخؤر.

²⁴ بعضی آدمؤن گوناهؤن نمایؤنه و پیش پیش داوری بؤن ئبه شنن؛ ولی بقیه آدمؤن گوناهؤن دیرتر نمایؤن بنه.

²⁵ پس خؤرم کارؤنم معلومن و حتی اوشؤنئه کی معلوم نئن، دخوته دأشته نشأنه.