اوّل تیموتائوس 4 - کتاب مقدس به زبان گیلکی - گویش شرقی

بعضئن ایمؤن أجی وگردنن

¹ ولی خدا روح، واضح و رؤشن گونه که آخری زمتؤن مئن، بعضئن خوشؤنه گول‌زنک روحؤن و دیوؤن تعلیمؤن ئبه وقف کؤنن و ایمؤن أجی وگردنن.

² ایجور تعالیمه دورؤغگوؤن و ریاکارؤن أبئنن که اوشؤن وجدؤن بمردهَ.

³ اوشؤن عروسی گودنه قدغن کؤنن و دستور دئنن کی خدای خلق‌بوبؤ غذائانه نوخؤرین، تا اوشؤنی که حقیقته ایمؤن دأنن و اونه شناسنن، شکر گودن همرأ غذائان أجی بوخؤرن.

⁴ چون هرچی کی خدا خلق بوده خؤرمه، و هیچئه نخأن رد گودن، أگر کی شکر گودن همأ قبول ببون؛

⁵ چره کی خدا کلؤم و دعا همرأ تقدیس بنه.

⁶ أگه ای چیزؤنه برأرؤنه یاد بدی، مسیح عیسی نؤکر بنی؛ کی ایمؤن کلؤم مئن و خؤرم تعلیم مئن که اون دومبال دری، تربیت بنی.

⁷ او داستؤنؤن همرأ کی کفرآمیز و پوچه کأر ندأر، بلکی تأ دینداری به تربیت بوکون.

⁸ چونکه هرچند تربیت گودن تن ئبه أننی فایده دأنه، ولی دینداری همه چی به فایده دأنه، چون هم ای زیندگئه وعده دئنه و هم او زیندگئه که هنه.

⁹ ای گبه شأنه ایطمینؤن گودن و هر طرف أجی کامیلا قابیل قبوله.

¹⁰ چون أمه این وأسی زحمت کشنیم و تقلا کؤنیم، چون أمه أمئه امیده زینده خدای سر بنأیم که همه ته آدمؤن ئبه نجات‌دهندهَ؛ به خصوص اوشؤنی کی ایمؤن دأنن.

¹¹ ای چیزؤنه حکم بوکون و تعلیم بدی.

¹² نوگذأر هیکس تی جوؤنئه کوچیکأکونه، بلکی گب زئن مئن و کردار و محبت و ایمؤن و پاکی مئن، همه ته ایمؤندارؤن ئبه یکته نمونه ببأش.

¹³ تا می أمأن، تأ این ئبه وقف بوکون کی خدای کلؤمه مردوم ئبه بوخؤنی و اوشؤنه تشویق بوکونی و تعلیم بدی.

¹⁴ او عطا کی تی مئن دره بی‌اعتنایی نوکون، او عطا کی نبوت أجی، او زمت کی ریش سیفیدؤن شؤرا تی سر دست بنأبون، بدست بأردی.

¹⁵ ای چیزؤنه عمل بوکون و تأ اوشؤن ئبه وقف بوکون تا تی ترقی همه کس ئبه نمایؤن ببون.

¹⁶ تی حواس بأقأیده تی ورجه و او تعلیم ورجه کی دئنی بومؤنه. این مئن پابرجا ببو، چونکی ای کار همأ هم خودت و هم تی ایشتؤسن‌کسؤنه نجات دئنی.