اوّل تیموتائوس 3 - کتاب مقدس به زبان گیلکی - گویش شرقی

کلیسای ناظیرؤن و شماسؤن

¹ ای گبه شأنه ایطمینؤن گودن که أگر یگ نفر، کلیسا نظارت کار نأجهَ بدأره، خؤرم کار دومبال دره.

² پس یکته ناظیر هخأن هیچی اون زیندگی مئن ننأبی که اون وأسی سرأکؤ بوخؤره، یکته زنأی بدأره، واخوب ببون، خوشه نفس جلؤ بگیره، آبرومند ببون، میمؤن‌دوست ببون و بوتؤنه تعلیم بدئه؛

³ نه ای کی عرقخور یا زورگو ببون، بلکه آرؤم ببون؛ نه جنگی و نه پولدوست.

⁴ او خأ خوشه خؤنوادهَ بأقأیده بگردؤنه و خوشه زاکؤنه یک جور تربیت بوکونه که اون أجی تمؤم احترؤم همرأ ایطاعت بوکونن.

⁵ چونکه أگه یک نفر نودؤنه کی چوطؤ خأن خوشه خؤنوادهَ بگردؤنه، بأزین چوطؤ تینه خدا کلیسا مراقبت بوکونه؟

⁶ و نخأن تازه ایمؤن بأرده بی، نبون کی غرور اونه بگیره و ابلیس جور محکوم ببون.

⁷ بعلاوه خأ کلیسا بیرین مردومؤن مئنه هم خوشنؤم ببون تا روسوا نبون و ابلیس دؤم مئن دنکئه.

⁸ هیطؤرم شماسؤن نی خأ وقار بدأرن؛ پلت‌ولگ نبون، شراب گیرفتار نبون، نادرست سود ئبه حیرص نزنن.

⁹ اوشؤن خأ ایمؤن رازه، یکته پاک وجدؤن همرأ بدأرن.

¹⁰ و اوشؤن خأن أولسر ایمتحؤن ببون، بأزین أگر ثابیت بودن کی بی عَیب ایسن، بوگذأرین شماسی کار مئن خدمت بوکونن.

¹¹ هیجور ایشؤن زنأکؤنم خأ وقار بدأرن، بهتؤنزن نبون، بلکی واخوب ببون و همه چی مئن وفادار ببون.

¹² هرته شماس خأ یکته زنأی بدأره و خوشه زاکؤن و خؤنوادهَ بأقأیده بگردؤنه.

¹³ چون اوشؤنی کی شماسؤن موقؤم مئن خوب خدمت بوده‌بی، یکته خؤرم موقؤم گینن و او ایمؤن مئن کی مسیح عیسی مئن دره، یکته پیله ایطمینؤن به دست أبئنن.

¹⁴ امید دأنم کی خیلی زود تی ور بأم، أما ایشؤنه تئه نویسنم تا

¹⁵ أگه می أمأن عقب دکته، بودؤنی کی خدای خؤنواده مئن کی زینده خدای کلیسا و حقیقت سیتین و بنوره ایسه، چوجور کردکار خأ دأشتن.

¹⁶ راس راسه کی دینداری راز، خیلی پیلدنهَ: او، جسم مئن ظاهیرأبؤ، بواسیطهٔ خدا روح تصدیق بوبؤ، فریشته ئان اونه بدئن، میلتؤن مئن اعلؤم بوبؤ، دونیای مئن اونه ایمؤن بأردن، جلال مئن جؤر ببرده بوبؤ.