اوّل تیموتائوس 2 - کتاب مقدس به زبان گیلکی - گویش شرقی

همه ته به دعا بوکونین

¹ پس هر چیز أجی پیشتر، خأنم کی خواسته ئان، دعائان، شفاعتؤن و شکر گودنؤن، همه ته مردوم ئبه بجا بأرده ببون،

² پادشائان و صاحیب منصبؤن ئبه، تا بوتؤنیم یکته آرؤم و راحت زیندگی بدأریم، که هر بابت أجی دینداری و وقار همرأ ببون.

³ ای أمئه نجات‌دهنده خدا نظر مئن خوبه و اون دیل بابه؛

⁴ کی خأنه همه ته مردوم نجات بگیرن و حقیقته بشناسن.

⁵ چون هچی یکته خدا ایسأ و خدا و آدمؤن مئنه نی هچی یکته واسیطه دره، یعنی او اینسؤن کی مسیح عیسی ایسه؛

⁶ او کی خوشه جؤن دأن أجی، همه ته آدمؤن خونبها هدأ. ای حقیقت، مناسب زمؤن مئن شهادت بدأ بوبؤ.

⁷ چون مو هین وأسی معین بوبؤم تا غیریهودئن ئبه یکته تعلیم دهنده و رسول، و یکته معلیم ببوم ایمؤن و حقیقت مئن- حقیقته گونم و دورؤغ گوته‌دننئم.

⁸ پس نأجه دأنم کی مردأکؤن همه جا دعا بوکونن و مقدس دستؤنه بی غیظ و دعوا و مرافعه جؤرأگیرن.

⁹ اینم خأنم کی زنأکؤن آبرومند لیواس دوکونن. نجابت و حیا همرأ، نه ببافته زولفؤن همأ، یا طلا و مروارید یا گرؤنقیمت لیواسؤن همرأ؛

¹⁰ بلکی خؤرم کارؤن همرأ، هوجور کی لایق او زنأکؤنی ایسه کی دینداری ایدعا دأنن.

¹¹ زنأی خأ تأم بزنه و کامیل ایطاعت همأ تعلیم بگیره.

¹² مو نوگذأنم یکته زنأی تعلیم بدئه یا یکته مردأک سر تسلط بدأره؛ بلکی خأن تأم بزنه.

¹³ چون أولسر آدم چاگوده بوبؤ و بأزون حوا.

¹⁴ و آدم نبو کی گول بوخؤرده، بلکی زنأی بو کی گول بوخؤرده و نافرمؤنأبؤ.

¹⁵ ولی زنأی زأک چئن همرأ نجات گینه، اگر ایمؤن و محبت و مقدس بؤن مئن، نجابت همرأ بیسه.