اوّل تسالونیکیان 5 - کتاب مقدس به زبان گیلکی - گویش شرقیخداوند روز 1 ایسه أی برأرؤن، وقتؤن و زمتؤن باره، احتیاج نئه چیزی شیمئبه بنویسم. 2 چون شمه خودتؤن بأقأیده دؤنین کی خداوند عیسی وگرسن روز، هوطؤ دوز مورسؤن کی شؤ زمت هنه، رسنه. 3 هو زمت کی مردوم گونن: «صلح و سلامتی و أمن و أمؤنه»، یک‌دفأ بیخبر هلاکت ایشؤن دامنه گینه، هوجور کی شوکؤمدار زنأی چئن درده دوچارابون، و اوشؤن فرار گوده مننئن. 4 ولی أی برأرؤن، شمه تاریکی مئن نیسأین تا او روز دوز مورسؤن شمره غافیلگیرأکونه. 5 چون شمه همه ته نور زاکؤن و روز زاکؤنین؛ أمه شؤ و تاریکی شی نیم. 6 پس نخأن بقیهَ‌ن مورسؤن أمره به خؤ بزنیم، بلکی خأن بیدار و واخوب ببیم. 7 چون اوشؤن کی خوسنن، شؤ زمت خوسنن، و اوشؤن کی مست کؤنن، شؤ زمت مست کؤنن. 8 ولی أمه چون روز شی ایسیم، خأ واخوب ببیم، ایمؤن و محبت زرهَ دوکونیم و نجات امیده یکته کولاهخود جور أمئه سر بنیم. 9 چونکی خدا أمره غضب ئبه تعیین نوده، بلکی این وأسی تعیین بوده تا بواسیطهٔ أمئه خداوند عیسی مسیح نجات بیاجیم، 10 او که أمئه وأسی بمرده، تا چی بیدار ببیم و چی بخوته، اون همأ زیندگی بوکونیم. 11 پس کس کسه تشویق بوکونین و ایمؤن مئن تقویت بوکونین، اوجور کی هی ألؤنم کؤنین. آخرته سفارشؤن و خیر دعا 12 ایسه أی برأرؤن، شمرأجی خأنیم اوشؤنئه کی شیمئه مئن زحمت کشنن و خداوند مئن شیمئه رهبرن و شمره أندرز کؤنن، احترؤم بنین، 13 و محبت مئن او کار وأسی کی کؤنن، اوشؤنه خیلی احترؤم بنین. کس کس همأ صلح و سلامتی مئن زیندگی بوکونین. 14 أی برأرؤن، شمرأجی خواهش کؤنیم کی تنبلؤنه أندرز بوکونین، ترسوؤنه تشویق بوکونین، ضعیفؤنه کمک بوکونین؛ و همه کس همرأ صبور ببین. 15 بپأین کی هیکس بدیِ بدی همأ جواب ندئه، بلکه همیشک این دومبال دبین کی کس کسؤنه، و تمؤم مردومه، خوبی بوکونین. 16 همیشک شاد ببین؛ 17 تترج دعا بوکونین؛ 18 هر وضع مئن شکر بوکونین، چونکی اینه خدا خواسته شیمئبه، مسیح عیسی مئن. 19 خدا روح آتشه دنکوشؤنین؛ 20 نبوّتؤنه کوچیک نودؤنین، 21 بلکه همه چئه أزمیت بگیرین؛ و او چئه کی خؤرمه، قایم دچکین. 22 هرجور بدی جی دوری بوکونین. 23 ایسه، صلح و سلامتی خدا، خودش شمره تمؤم و کمال تقدیس بوکونه و شیمئه روح و جؤن و تن، تا أمئه خداوند عیسی مسیح أمأن، بی‌عَیب بومؤنه. 24 او کی شمره دوخؤنه، وفاداره، او حتمنی ای کاره کؤنه. 25 أی برأرؤن، أمئبه دعا بوکونین. 26 یکته مقدس موچچی همأ همه ته برأرؤنه سلام برسؤنین. 27 خداوند جلؤ شمره قسم دئنم کی ای نؤمهَ همه ته برأرؤن ئبه بوخؤنین. 28 أمئه خداوند عیسی مسیح فیض شیمئه همرأ ببون. |
@ 2024 Korpu Company