اوّل تسالونیکیان 4 - کتاب مقدس به زبان گیلکی - گویش شرقی

او زیندگی کی خدا راضی کؤنه

¹ سرأخره، پس أی برأرؤن، أمه خداوند عیسی مئن شمرأجی خأنیم و ایلتماس کؤنیم، هوطؤ که أمرأجی شمره برسئه کی چوطؤ خأ زیندگی بوکونین و خدا راضی بوکونین، اوجور که أنجؤم دئنین، ای کاره ویشتر و ویشتر بوکونین.

² چون شمه دؤنین کی بواسیطه خداوند عیسی، چی حکمؤنی شمره هدأیم.

³ چونکی خدا ایراده اینه، یعنی شیمئه مقدس بؤن: کی شمره بی عفتی جی دور بدأرین.

⁴ تا هرته أز شمه بودؤنه کی چوطؤ خوشه تنه مقدس بؤن و احترؤم مئن بدأره‌،

⁵ نه شهوت و هوا و هوس مئن، او غیریهودئن موسؤن کی خدا نشناسنن.

⁶ تا هیکس ای جریؤن مئن، خوشه برأر حق خطا یا سو ایستفاده نوکونه، چون خداوند تمؤم ای چیزؤن ئبه تقاص گینه، هوطؤ که أمه پیشتر شمره بوتیم و جدی ایشتؤ بدأیم.

⁷ چونکی خدا أمره نه ناپاکی به، بلکی مقدس بؤن ئبه دوخؤنده.

⁸ پس هرکس اینه ردأکونه، آدمیِ ردأنوکؤنه، بلکه او خدا ردأکؤنه کی خوشه مقدس روحه شمره هدئنه.

⁹ ایسه، برأرؤنه محبت سر، شمه احتیاج نأنین کی هیکس هیچی شیمئبه بنویسه، چونکی شمه خودتون بواسیطه خدا باموته دأنین کی کس کسه دوست بدأرین،

¹⁰ چونکی شمه راس راسه همه ته برأرؤنه، مقدونیه منطقه سرتاسر مئن، دوست دأنین. ولی أی برأرؤن، شمره ایلتماس کؤنیم ویشتر و ویشتر ای کاره بوکونین.

¹¹ و آرزو بوکونین که آرؤم زیندگی بدأرین و شیمئه سر شیمئه کار مئن دبون، شیمئه دستؤن أجی کار بوکونین، هوجور که أمه شمره دستور بدأیم.

¹² تا اوشؤن جلؤ کی کلیسا یأجی بیرین درن، درستی همرأ زیندگی بوکونین و هیکس محتاج نبین.

خداوند عیسی وگرسن

¹³ أما أی برأرؤن، أمه نخأنیم بمرده ایمؤندارؤن باره بیخبر ببین، نبون کی بقیه مردومؤن جور که امید ندأنن، ماتم بگیرین‌.

¹⁴ چون اؤره أجی که أمه باور دأنیم عیسی بمرده و زینده بوبؤ، پس هیطؤ نی خدا اوشؤنئه کی عیسی مئن بمردن، اون همأ وگردؤنئنه.

¹⁵ چون أمه اینه بواسیطهٔ خداوند کلؤم شمره اعلؤم کؤنیم که أمه کی زینده‌َیم و تا خداوند أمأن زمت باقی بومؤنسیم، اوشؤن أجی کی بمردن، پیش دنکئنیم.

¹⁶ چونکی خداوند خودش یکته حکم همرأ، کی پیله دوخؤن همرأ ایسه، فریشته ئان رئیس صدا و خدا شیپور صدا همأ، آسمؤن أجی جیر هنه. و اول بمرده ئان مسیح مئن زینده وأبنن.

¹⁷ بأزین، أمه که زینده‌َیم و باقی بومؤنسیم، اوشؤن همأ أبرؤن مئن جؤر ببرده بنیم تا خداونده هوای مئن بینیم، و ایطؤری همیشک خداوند همرأ ایسنیم.

¹⁸ پس ای گبؤن أجی، کس کسؤنه تشویق بوکونین.