اوّل تسالونیکیان 3 - کتاب مقدس به زبان گیلکی - گویش شرقی

¹ پس وقتی کی د مننیسیم اینه تاب بأریم، راضی بوبؤیم که أمره آتن شهر مئن تنها بنئن.

² أمه تیموتائوسه که أمئه برأر و خدای همکار ایسه مسیح انجیل کار مئن، شیمئه ورجه سرأدأیم تا شمره شیمئه ایمؤن مئن تقویت و تشویق بوکونه.

³ تا هیکس ای سختئن وأسئه سوستأنبون، چونکی شمه خودتؤن بأقأیده دؤنین که أمه هین ئبه تعیین بوبؤیم.

⁴ چونکه او زمت کی شیمئه همرأ ایسأبیم، پیشأپیش شمره بوتیم کی خأ سختی بکشیم، هوطؤ کی دؤنین، هوطؤ کی بوبؤ.

⁵ هین وأسئه، چونکی د تاب أرده مننیسم، تیموتائوسه سرأدأم تا شیمئه ایمؤن أجی باخبر ببوم، چون ترسئم که او وسوسه‌گر، یعنی ابلیس، یک جور شمره وسوسه بوده بی و أمئه زحمت هدر بوشؤبی.

تیموتائوس خبر کی دیلگرمی دئنه

⁶ ولی ایسه کی تیموتائوس شیمئه ور أجی وگرسه أمئه ور و أمئبه شیمئه ایمؤن و محبت أجی خؤرم خبر بأرده و خبر بدأ کی شمه همیشک أمرأجی خؤرم یاد کؤنین و أمئه دئن ئبه ذؤق دأنین، هوطؤ که أمرأم شیمئه دئن ئبه ذؤق دأنیم-

⁷ أی برأرؤن، هین وأسی، أمئه همه ته سختئن و مصیبتؤن مئن، شمرأجی بواسیطه شیمئه ایمؤن تسلی بیتیم.

⁸ چونکه ألؤن زیندگی کؤنیم، أگه شمه خداوند مئن قایم بیسین.

⁹ چون ای همه شادی وأسی کی شیمئه خؤنی أمئه خدا حضور مئن أمئه نصیب بوبؤ، چوطؤ تینیم خدا شکر بوکونیم؟

¹⁰ هوطؤ که أمه شؤ و روز دیل و جؤن أجی دعا کؤنیم تا دیمأدیم شمره بینیم و هر کم و کسری کی شیمئه ایمؤن مئن دره، برطرفأکونیم.

¹¹ ألؤن خدا، أمئه پئر خودش، و أمئه خداوند عیسی، أمئه راه شیمئه سو هکشه.

¹² و هوطؤ که أمئه محبت نسبت به شمه ویشترابنه، خداوند شیمئه محبته نسبت به همدیگه و نسبت به همه ته مردوم زیاد و لبریز بوکونه.

¹³ و شیمئه دیلؤنه پایدار بوکونه تا او زمت که أمئه خداوند عیسی، خوشه همه ته مقدسین همأ أنه، أمئه خدا و آسمؤنی پئر جلؤ، بی‌عَیب و مقدس ببین.