۱پطرس 5 - کتاب مقدس به زبان گیلکی - گویش شرقی

خدا رومهَ گالشی بوکونین

¹ مو کی خودم یکته از مشایخم و مسیح رنجؤنه شاهید بوم و او جلال مئن که آشکارأبنه شریک ایسم، او مشایخه کی شیمئه مئن ایسأن سفارش کؤنم:

² او رومهَ کی خدا شیمئه دست بسپارده، گالشی بوکونین و ای شمره یاد دبون، نه زورزورکی، بلکی میل و رغبت همأ، هوطؤ کی خدا خأنه؛ و نه ناروا سود وأسی، بلکی شؤق همرأ.

³ نخأین که اوشؤن سر کی شیمئه دست بسپارده بوبؤن آقایی بوکونین، بلکه او رومه به نمونه ببین،

⁴ و او زمت کی سرگالش ظهور بوکونه، او جلال تاجه که از بین نشنه، هگینین.

⁵ هیطؤرم شمه أی جوؤنؤن، مشایخ أجی ایطاعت بوکونین. همه ته شیمئه کردکار مئن کس کس همرأ، فروتنی بدأرین، چونکی، «خدا مغرورؤن جلؤ ایسنه، ولی فروتنؤنه فیض هدئنه.»

⁶ پس شمره خدا زوردار دست جیر فروتن چاکونین کی مناسب زمؤن مئن شمره سربولندأکونه.

⁷ شیمئه همه ته نگرؤنئنه اونه بسپارین، چون او شیمئه فیکر دره.

⁸ واخوب ببین و بپأین، شیمئه دوشمن، ابلیس، یکته شیر مورسؤن غرش کؤنه و ایرأ اورأ مجنه تا یگ نفره بیاجه و فوره.

⁹ پس ایمؤن مئن قایم ببین و اون پیش بیسین، چون دؤنین کی شیمئه برأرؤن دونیای مئن هی عذابؤن همأ دیمأدیمن.

¹⁰ أننی زمؤن سختی و عذاب پسی، پورفیض خدا، کی شمره مسیح مئن دوخؤنده تا اون ابدی جلال مئن شریک ببین، شمره هندئه بنا کؤنه و پایدار و پورقدرت و پابرجا چاکؤنه.

¹¹ سلطنت تا أبد و تا أبد اون شی ببون. آمین.

آخرته سلامؤن

¹² بواسیطه سیلاس که اونه یکته وفادار برأر دؤنم، مختصرا شیمئبه بنویشتم تا شمره سفارش بوکونم و شمره اعلؤم بوکونم کی اینه، او خدای حقیقتی فیض. اون مئن قایم بیسین.

¹³ او خأخؤر کی بابل مئن ایسأ، او کی شیمئه موسؤن دؤجئه بوبؤ، و می پسر، مرقس، شمره سلام رسؤنئنن.

¹⁴ کس کسه یکته موچی همرأ کی دوست دأشتن أجی أنه، سلام بوگؤین. شمه همه ته به کی مسیح مئن ایسأین، صلح و سلامتی بأ.