اوّل یوحنا 4 - کتاب مقدس به زبان گیلکی - گویش شرقی

روحؤنِ امتحؤن بکونین

¹ عزیزؤن، هرته روحِ باور نکونین، بلکه روحونِ امتحون بکونین که بینین خدا جی ایسّن یا نه.

² خدا روح ایطو ایشناسنیم: هر روحی که اعتراف کوئنه عیسی مسیح آدمی جسم میئن بوما، خدا جی ایسّه.

³ و هرته روح که عیسی اعتراف نوکوئنه، خدا جی نیه، بلکه هو ’ضد مسیحِ‘ روحِ که بشتؤسین هَنه و هی الونم دنیا میئن ایسا.

⁴ ای زاکون، شمه، خدا جی ایسّین و اوشؤن سر حریف بوین، چون اونی که شیمه میئن ایسا، اونی جی که دنیا میئن ایسا پیله تره.

⁵ اوشؤن دنیا جی ایسّن و هینه وسه هر چی که گونن، دنیا جی ایسّه و دنیا اوشون گوش دِئنه.

⁶ أمه خدا جی ایسّیم و اونکه خدا شناسنه، اَمره گوش دئنه؛ اونی که خدا جی نیه اَمره گوش ندئنه. ایطوری، روحی که حق ایسه و روحی که گمراه کوئنه شناسنیم.

خدا محبتِ

⁷ ای عزیزؤن، همدیگرِ محبت بکونیم، چونکه محبت خدا جی ایسّه و هر کس که محبت کوئنه، خدا جی بزاسه بوبؤ و خدا شناسنه.

⁸ اونی که محبت نوکوئنه، خدا نشناخته، چونکه خدا محبت ایسّه.

⁹ خدا محبت ایطوری أمه میئن آشکار بو که خدا خو یکته ریکا دنیا میئن سرادا تا به واسطه او ابدی زندگی بداریم.

¹⁰ محبت هی ایسّه، نه اونکه أمه خدا محبت بودیم، بلکه او اَمره محبت بوده و خوشِ ریکه سرادا تا أمه گناه أنِ کفاره ببی .

¹¹ ای عزیزؤن، اگه خدا أمه ایطو محبت بوده، اَمرم باء همدیگر محبت بکونیم.

¹² هی کس هرگی خدا بدِه ندَئنه؛ اگه همدیگر محبت بکونیم، خدا أمه میئن موئنه و اونه محبت أمه میئن کامیلا بنه.

¹³ اراجی دوئنیم که اونه میئن موئنیم و اونم أمه میئن موئنه، چونکه خوشِ روحَ جی اَمره هده.

¹⁴ و أمه بدیم و گوایی دئنیم که پئر، خو ریکه سرا دا، تا دنیا نجات بدی.

¹⁵ اونیکه اعتراف کوئنه عیسی خدا ریکه ایسّه، خدا اونه میئن موئنه و او خدا میئن.

¹⁶ پس أمه محبتیِ که خدا أمره بوده، بشناختیم و اونه باور دَئنیم. خدا محبت ایسه و او کسی که خدا محبت میئن موئنه، خدا میئن موئنه و خدا اونه میئن.

¹⁷ ایطوری محبت أمه میئن کاملَ بنه تا داوری روزِ میئن اطمینون بداریم. چونکه ایی دنیا میئن أمه هوطو ایسّیم که او ایسّه.

¹⁸ محبت میئن ترس ننه، بلکه محبت کامل، تمام ترسِ بیرونَ کوئنه؛ چونکه ترس تنبیهِ جی به وجود انه و هو کسی که بترسی محبت میئن کامل نبنه.

¹⁹ أمه محبت کوئنیم چونکه اول او اَمره محبت بوده.

²⁰ اگه یه نفر بگو که خدا دوست دانه، اما خو برارَ جی نفرت بداری دروغگو ایسّه. چون اونکی خو برارِ اینه و دوست ندائنه، نوتئنه خدایی که ندئه دوست بداری.

²¹ أمه ایی حوکمِ اونَ جی هَیتیم که هر کس خدا دوست بداری باء خو برارم دوست بداری.