اوّل یوحنا 3 - کتاب مقدس به زبان گیلکی - گویش شرقی

¹ بَینین پِئر، چنی امره محبّت بوده تا خدا زاکؤن دوخونده ببیم! و هیطورم ایسّیم! اونکه دنیا أمره نشنَئسنه هینه وسه ایسّه که اونه نشناخته.

² ای عزیزؤن، الؤن أمه خدا زاکوئنیم ولی او چی که خوائنیم ببیم حله آشکارا نوبؤ؛ ولی دوئنیم وختی که او ظهور بکونی اونه مورسؤن بنیم، چون اونه اوجوری که ایسّه اینیم.

³ هرکس که ایجور امید اونه به دئنه خوشِ پکا کوئنه، هوتو که او پاک ایسّه.

⁴ هرکس که گناه میئن زندگی کوئنه ضد شریعت عمل کوئنه؛ گناه، شریعت قانونَ شکنه.

⁵ شمه دوئنین که او ظهور بوده تا گناه أن از بین ببری. اونه میئن هیچ گناهی ننَه.

⁶ اونیکه اونه میئن موئنه گناه دونباله ندِئنه. اونیکه که گناه دونباله دئنه نه اونه بده دَئنه و نه بشناخته.

⁷ ای کوشتی زاکؤن، نوگذارین هی کس شمره گمراهَ کونی. هر کس صالحون مورسون عمل بکونی، صالحِ، هوطو که او صالح ایسه.

⁸ اونی که گناه میئن زندگی کوئنه ابلیسَ جی ایسّه، چونکه ابلیس از هو اول گناه کوئنه، هینه وسه خدا ریکه ظهور بوده تا ابلیس کارونِ باطیلَ کونی.

⁹ اونی که خدا جی بزاسه بوبؤ گناه دیرون زندگی نوکوئنه، چونکه خدا ذات اونه میئن موئنه. او آدم منّه گناه میئن ادامه بدی، چونکه خدا جی بزاسه بوبؤ.

¹⁰ خدا زاکؤن و ابلیس زاکؤن ایطو آشکارَ بنن: اونی که صالحی بجا نَبِئنه خدا جی نیه، و اونی که خو برارِ دوست ندائنه خدا جی نیه.

همدیگرِ دوست بدارین

¹¹ ایی هو پیغومی ایسه که از هو اول بشتوسین، که باء همدیگرِ دوست بداریم.

¹² أمه نباید قائن مورسؤن ببیم هونی که شریر جی بو و خو برار بکوشته. و چرِا اونه بکوشته؟ چونکه خوش اعمال شرورانه بو و اینه برارِ اعمال صالح.

¹³ ای برارؤن، اینه واسه که دنیا شمرای نفرت دَئنه، تعجب نکونین.

¹⁴ أمه دوئنیم که مرگَ ردَ گودیم و زندگی برسیم، چونکه برارؤنِ دوست دائنیم. هرکی محبت نوکوئنه، مرگ میئن موئنه.

¹⁵ اونی که خو برارَ جی نفرت دَئنه، قاتیل ایسّه و شمه دوئنین که هیچ قاتیلی نئنه که اون میئن ابدی زندگی بموئنی.

¹⁶ محبتِ اوراجی بشناختیم که او، خو جؤنِ أمه وسه بنه، و أمرم باء أمه جونِ برارؤن واسه بنیم.

¹⁷ ولی اگه ینفر دنیا مال و مینالِ بداری و خو برارِ محتاج بینی، با ای حال خوشه دیلِ درِ اونِ رو دودی، چوطو خدا محبت ایجور آدم میئن موئنه؟

¹⁸ ای کوچِ زاکؤن، باء محبت بکونیم، نه زبون و گبِ زئن امره، بلکه حقیقتی رفتار امره!

¹⁹ ارا جی فهمنیم که حقیقت شی ایسّیم، و تینیم أمه دیلِ خدا حضور میئن مطمئن چاکونیم؛

²⁰ چون هر وقت أمه دیل اَمره محکومَ کونی، خدا أمه دیلون جی پیلتر ایسّه و همه چیِ دوئنه.

²¹ عزیزؤن، اگه أمه دیل، اَمره محکوم نکونی، خدا حضور میئن اطمینؤن دئنیم

²² و هرچی اونه جی بخوایم هگینیم، چونکه اونه حوکمونَ عمل کوئنیم و اوچی که اونه راضی کونه، انجوم دئنیم.

²³ و اون حکم ایی ایسه، که به ایسم اونه ریکه عیسی مسیح ایمؤن باریم و همدیگرِ دوست بداریم هیطو که اَمره دستور بدا.

²⁴ هرکی خدا حُکمؤنَ عمل بکونی، خدا میئن موئنه و خدا هم اون میئن موئنه. اِرَه جی به واسیطه او روحی که امره ببخشه دوئنیم که او أمه میئن موئنه.