اوّل قرنتیان 4 - کتاب مقدس به زبان گیلکی - گویش شرقی

رسولؤن خدمت

¹ باء هرکس اَمره به چشم مسیح خدمتکارون و مباشرونی بینه که خدا رازون اوشون امانت بسپرده ببو.

² بعلاوه، موباشر جی اینتظار دئنن کی وفادار ببی.

³ ولی شیمه قضاوت یا هر آدمی محکمه قضاوت، مئبه مهم نیه. در واقع حتی مو خودمم ما قضاوت نکوئنم.

⁴ چونکه خبر نانم چیزی می ضید ببی، ولی ایی مه تبرئه نوکوئنه. بلکه خداوند ایسّه که ما قضاوت کوئنه.

⁵ پس هیچ چیز باره پیش از اون موعد قضاوت نکونین تا اینکه خداوند بای. هو خداوندی که اوچی که الون ظلمات میئن جا بخورده هننا روشنایی میئن نمایون کوئنه و دیلون نیتونه برملا کوئنه. بازین هرکس خوشه تعریف و تمجیده خدا جی گینه.

⁶ برارون مو تموم ایی چیونه خودم و آپولس باره شیمه خیر و صلاح واسی بوتم، تا شمه ایی گبون معنی امراجی باموجین که اوچی جی که بنویشته بوبؤ، پیشتر نشین. تا هیته از شمه اوکته جلو باد به غبغب توندی.

⁷ چونکه کی تَه یه جور ده اینه؟ چی دئنی که تَه ببخشئه نوبؤبی؟ پس اگه تَه ببخشئه بوبؤ، چره اوجور گولاز کوئنی که انگار ایطو نئه؟

⁸ انگار که شمه هرچیِ که خواستین برسین! انگار که الؤن شمه پولدار بوبوین! بدون أمه شمه پادشاه بوبوین! و ایکاش که پادشاهی بوده بین تا اَمرم شیمه أمره پادشاهی گودیم!

⁹ چونکه مو فیکر کوئنم که خدا أمه رسولؤنِ آخر از همه به تماشا بنا دانه، اوشون مورسون که مردن ئبه محکومابون، چونکی أمه دونیا، فرشته أن و آدمون ئبه تماشاخونه بوبویم.

¹⁰ أمه مسیح وسه نادون ایسیّم، ولی شمه مسیح میئن حکیمین! أمه ضعیفیم، ولی شمه قوی ایسیّن! شمه ارج و قرب دانین ولی امه بی حرمتیم!

¹¹ أمه تا ایسه وشته و تشنه ایسّیم، أمه گدایون رخته دوده دانیم، چوب بوخوردیم و دربدر ایسّیم.

¹² خودمون دست اجی کار کوئنیم و زحمت کشنیم. وقتی امره نیفرین بکونن، اوشونئه دعای خیر کونیم، و وقتی امره اذئت بکونن، دووم ابئنیم؛

¹³ وختی امره بندؤم زئنن، خوبی أمره جواب دِئنیم. تا هی الؤن، أمه، دنیا پوشخاله و همه چی آشغال بوبویم.

¹⁴ اینه ننویسنَم تا شمَره شرمنده بکونم، بلکه نیویسنم تا شمره می عزیز زاکؤنِ مورسؤن نصیحت بکونم.

¹⁵ چونکه حتی اگه هیزارون ته معلیمم مسیح مئن بدارین، ولی زیاد پئر ندَئنین، چره که مو بواسطه انجیل، مسیح عیسی میئن شیمه پِئر بوبؤئم.

¹⁶ پس مو شمرای خواهش دَئنم می جی سرمشق بگیرین.

¹⁷ هینه وسه تیموتائوسِ که می عزیز زاک ایسّه و خداوند میئن وفاداره شیمه ورجه سرادام، تا می راهؤنه مسیح عیسی میئن شمره یاد باره، هوطو که او راهؤنه همه جا همته کلیساأنِ میئن آموجبِئنَم.

¹⁸ بعضیئن مغرورابون و اوشون گمون کونن کی ده مو شیمه ورجه نانم.

¹⁹ ولی اگه خدا بخا خیلی زود شیمه ورجه هنم تا بینم ای مغرورون هچی گب بزئن یا ای که اونه قدرتم دانن.

²⁰ چونکه خدا پادشاهی به گب نیه، بلکه قدرت میئن ایسّه.

²¹ کو یکته خانین؟کولاکوت أمره شیمه ورجه بَئم یا یکته آروم روح و محبت امره؟