اوّل قرنتیان 2 - کتاب مقدس به زبان گیلکی - گویش شرقی

پولس مسیح مصلوبأبؤنه اعلؤم کؤنه

¹ برارؤن، منم او زمت که شیمه ورجه بومَام، نومام که خدا رازه شیمئبه پیله پیله گبون یا حیکمت همرا اعلوم بکونم.

² چونکه تصمیم بیته بوم شیمه میئن هیچی ندونم بجز عیسی مسیح، اونم مصلوب بوبو عیسی.

³ مو ضعف و ترس لرزِ أمره شیمه ورجه بومَئم.

⁴ و می گبون و می پیغوم، حکیمونه کلمات هما کی قانع کونه نبو، بلکی خدا روح و خدا قوت همرا بوتم.

⁵ تا شیمه ایمون نه آدمیئن حکمت همرا، بلکه خدا قوت همرا ببی.

حیکمت، خدا روح اجی

⁶ با ایی حال، أمه پیله آدمون میئن، حکمته گونیم، هرچند نه حکمتی که ای دوره زمونه شی ببون یا اوشون شی که ای دوره زمونه حاکمن که محکوم به نابودی ایسن

⁷ بلکه امه یکته از خدا حکمتِ که یکته رازه و جا بخورده ایسّه گب زئنیم، او حکمت که خدا اونه پیش تر از دنیا بنا، أمه جلالِ به معین بوده.

⁸ هیتّه از حاکمونِ ایی دوره زمونه ایی حکمتِ نفمسَن، چونکه اگه اونه بفهمسبوئن، خداوندِ جلال مصلوب نوده نابون.

⁹ هوطو که اشعیای پیغمبر کیتاب مئن بنویشته بوبو: « اوچی که هیچ چیشمی ندِه، هیچ گوشی نشتؤسه، و هیچ ادمی فیکر نرسه، خدا خو دوستدارونِ به حاضیرَ گوده.»

¹⁰ خدا ای چیئنه بواسطه خو روح أمه به آشکارَ گوده. چونکه خدا روح همه چئه وامجنه، حتی خدا اعماقه.

¹¹ چون کی ایسّه که آدمی فیکرؤن جی واخوب ببی، جز هونه روح که اونه میئن دره؟ هینه واسه، فقط خدا روح ایسّه که خدا فکرؤنَ جی واخوب ایسّه.

¹² ایسه، أمه نه ایی دونیا روحه، بلکه یکته روحِ بدس باردیم که خدا جی ایسّه تا او چیِنه که خدا اَمره هدیه بدا، بودوئنیم.

¹³ و امه اینای گب زِئنیم، اونم نه گبونی که آدمیئن حیکمت جی باموته بیم، بلکه او گبون همرا که خدا روح، امره آموجبِئنه؛ و این وسه روحانی حقیقتؤنِ، اوشون واسی که خدا روح خوشون مئن دانن، گونیم.

¹⁴ آدمی که هوا و هوس دومبال دبی، او چیزونیه که به خدا روح مربوط ببی قبول نوکوئنه، چونکه اونه نظرِ میئن نادونی ایسّه، و منِئه اونِ بفهمه، چره که فقط خدا روح هما شانه اون درستیه تشخیص دان.

¹⁵ او کس کی خدا روحه دانه همه چیزِ باره داوری کوئنه، ولی هیچ کس منِئه اونه باره داوری بکونی.

¹⁶ «چون کی ایسه که خداوندِ فیکر بفهمی تا اونه یاد بدَی؟ ولی أمه مسیحِ فیکرِ دَئنیم.