اوّل قرنتیان 14 - کتاب مقدس به زبان گیلکی - گویش شرقی

نبوت گودن و دیگر زبوبون اجی گب زئن

¹ محبتِ دومبال دبین و غیرت هما روحونی عطایانه بخاین، بخصوص ایکه نبوت بکونین.

² چون اونی که دیگر زبوبون اجی گب زِئنه، نه آدمیونِ أمره بلکه خدا أمره گب زئدره. چونکه هیشکس اونه گب نفهمنه؛ ولی او آدم بواسطه خدا روح، رازؤن گونه.

³ ولی اونی که نبوت کوئنه، آدمؤنِ أمره گب زئنه تا اوشؤنه بنا بکونی و تشویق بکونی و اوشونه دیلداری بدی.

⁴ اونی که دیگر زبؤنون همره گب زئنه خوشِ بنا کوئنه، ولی اونی که نبوت کوئنه کلیسا بنا کونه.

⁵ ایسه مو خانم که شمه همته دیگر زبونون همرا گب بزنین، ولی بیشتر خوائنم که نبوت بکونین. اونیکه نبوت کوئنه، پیلتر ایسّه از اونی که دیگر زبونون اجی گب زِئنه، مگر اینکه یگ نفر ترجمه بکونی تا کلیسا بنا ببی.

⁶ الؤن ای برارؤن، اگه مو شیمه ورجه بَئم و دیگر زبونون هما گب بزنم، شمره چی نفعی رسبئنم، مگر ایکه مکاشفه یا دونایی یا نبوت یا یکته تعلیم شیمئبه بدارم؟

⁷ حتی اگه سازؤنِ بی جون مثلِ نی و چنگ، درست بزئه نبون، چوطو شئنه تشخیص دَئن کی چی آهنگی بزه بوئدره؟

⁸ اگه شیپور خوب صدا ندی، کی آماده بنه جنگ به؟

⁹ در مورد شمه هم هیطو ایسّه. اگه شیمه زبونِ أمره قابل فهم گب نزنین، چوطو یک نفر بفهمه که چی گونین؟ چون هو موقع، ایطو موئنه که هوا أمره گب بزنین.

¹⁰ بی گمون دونیا میئن خیلی زبونهای مختلف دره، ولی هیته بی معنی نیه.

¹¹ ولی اگه مو نتونم یه نفر دیگرِ گبونِ معنی بفهمم، اون ئبه که می همرا گب زئدره یکته غریبه ایسّم و اونم می همره غریبهَ.

¹² در مورد شمه هم هیطو ایسّه. اوراجی که غیرت امره خدا روحِ ظاهیرابون دومبال درین، تقلا بکونین که کلیسا بنا گودن وسه ترقی بکونین.

¹³ پس اونی که دیگر زبونون همرا گب زئنه باء دوعا بکونی تا بتونی خو گبؤنِ ترجمه بکونی.

¹⁴ چونکه اگه مو دیگر زبونون جی دعا بکونم، می روح دوعا کوئنه، ولی می عقل بی بهره مونه.

¹⁵ پس چی باء بکونم؟ می روحِ امره دوعا کوئنم و می عقلِ همرام دوعا کوئنم؛ می روح همرا حمد و ثنا سروده خونم ولی می عقل همرام حمد و ثنا سروده خونم.

¹⁶ در غیر ایی صورت، اگه تو روح مئن شکر بکونی، چطو کسی که نفهمنه تو چی گوتری تی شکر گودن به آمین بوگوی؟ چره که نودوئنه تو چی گوته دری!

¹⁷ چونکه تو درست شکر کادری، ولی تی شکر گودن باعث نبنه یه نفر دیگه بنا ببی.

¹⁸ خدا شکر کوئنم که بیشتر از همه شمه دیگر زبونون همره گب زئنم؛

¹⁹ با ای حال اینه دونم که کلیسا میئن پنج کلمه می عقل أمره گب بزنم که بقیه انِ تعلیم بدِئم بهتره، تا ایکه هیزارون ته کلمه یکته ده زبون اجی گب بزنم.

²⁰ ای برارون، فیکر گودن میئن زأکون جور نبین، بلکه بدی گودن میئن زاکون موسون ببین. ولی فیکر گودن مئن پیله آدم ببین.

²¹ تورات میئن بنویشته بوبؤ که: «خداوند گونه: دیگر زبونون امره و با غریبه ئان لبون امره ای مردوم هما گب زئنم . با ای همه حتی اوشون ما گوش نخانن دان»

²² پس زبون های دیگه ، نشونه ای ایسه نه ایموندارون ئبه بلکی بی ایمونون ئبه؛ ولی نبوت نشونه ای ایسه ایمون دارون ئبه و نه بی ایمونون.

²³ پس اگر تموم کلیسا ادمون همدیگر همرا جوما بون و همه ته یکته ده زبون امره گب بزنن ، و هو موقع اوشونی که هیچی جی خبر ندانن و یا اوشونی کی ایمون نانن مجلیس میئن بان، نگونن که شمه تورین ؟

²⁴ ولی اگه همه نبوت بکونین و اوشونی که هیچی جی خبر ندانن یا اوشونی که ایمون ندانن مجلیس میئن بان، همته باعیث بنین که او آدم قانع ببی کی گناهکاره، و او، همه ته جلو داوری بنه،

²⁵ او ادم دیل رازون برملا بنه .هو وقت خوشه دیم امره زمین سر کئنه و خدا پرستش کونه و اعلوم کونه : «حقیقتا خدا شیمه میئن ایسا »

نظم و ترتیب رعایت گودن شیمه جمع عبادت میئن لازیم ایسّه

²⁶ برارؤن پس منظور چیسه؟ هو موقع که جومه بنین، هرکس یکته حمد و ثنا سرود، یا یکته تعلیم، یکته مکاشفه، یکته زبؤن و یا یکته ترجمه دَئنه. بدارین ایشون همه بنا بون وسه ایستفاده ببی.

²⁷ اگه ینفر یکته ده زبون همره گب بزنی، بوگذارین هچی دو یا نهایت سه نفر، اونم به نوبت گب بزنن و ینفرم ترجمه بکونی.

²⁸ ولی اگر یگ نفر نَیسی که ترجمه بکونی، هرته از اوشون کلیسا میئن ساکیت بیسن و خوشون دیل مئن و خدا أمره گب بزنن.

²⁹ بدارین دو یا سو نفر اوشون اجی کی نبوت کونن گب بزنن و الباقی اوشون گبؤنِ سبک سنگین بکونن.

³⁰ و اگه ینفر دیگه که اوره نیشته یکته مکاشفه هگیره، او اولته ادم خا تام بزنی.

³¹ چونکه همته تینین به نوبت نبوت بکونین تا همته تعلیم بگیرن و همته تشویق بوبوئن.

³² انبیا روح، انبیا جی فرمون بئنه.

³³ چونکه خدا، هرج و مرجی خدا نیه، بلکه صلح و سلامتی خدا ایسّه. هوطو که همته مقدسین کلیسائان ایطو ایسّه.

³⁴ زناکون باء کلیسا میئن ساکت بیسن. چونکه اوشونه ایجازه بدا نوبو کی گب بزنن، بلکه باء فرمونبر ببون عین او چی که شریعتم گونه.

³⁵ اگر چیزی هننا که خانن یاد بگیرن، خونه میئن خوشؤنِ مرداکون جی واپورسن؛ چونکه زناکِ به عیبه که کلیسا میئن گب بزنی.

³⁶ مگه خدا کلوم شمرَ جی بما؟ یا هچی شمره برسئه؟

³⁷ اگه یه نفر گمون کونه که یکته پیغمبر یا آدمی ایسه که خدا روحه دانه، او خا تصدیق بکونی اونی که شیمه به نیویسنم یکته حکم، خداوند اجی ایسه.

³⁸ اگه یه نفر اینه تصدیق نکونی، خودشم تصدیق نبنه.

³⁹ پس ای می برارون، غیرت همرا این دنبال ببین که نبوت بکونین و دیگر زبونون گب زئنه جلوئه نگیرین.

⁴⁰ ولی همه چی باید درست و باقایده انجوم ببی.