Zẹkaraia 8 - Edo Bible (E Baibol Ẹdo) Version 1996

E Nọyaẹnmwa Wẹ Rẹn Gha Rhie Jerusalẹm Ye Ihe

¹ E Nọyaẹnmwa ne Oghodua keghi gie Zẹkaraia uhunmwu na wẹẹ,

² “Ọ kpẹre ne ekhọe mwẹ kegha rrọọ wẹ ne I ye Jerusalẹm obọ rhunmwuda ahoẹmwọmwa ne I mwẹ ghe emwa ni rrọọ, a ho ẹmwẹ ọmwa ne ọ ye ohu avbe eghian rẹn gha mu mwẹ.

³ I gha dọlegbe gha die Jerusalẹm ne ẹvbo mwẹ nọhuanrẹn ne I do yin ẹnrẹn. A gha rẹn ọnrẹn ye ẹvbo ne ọ mudia ẹse, a ghi vbe gha tie oke Nọyaẹnmwa ne Oghodua oke nọhuanrẹn.

⁴ A ghi vbe miẹn wẹ te ikpia kevbe ikhuo ni khian ọmaẹn iran ni khian ọmaẹn sẹrriọ wẹ ọkpọ iran ghi ya khian, iran ghi gha tota lele ọgua ediọn.

⁵ Ibiẹka ikpia kevbe ibiẹka ikhuo ni zọmọ ghi dọlegbe vuọn ore ẹvbo.

⁶ “Ọna sẹtin yevbe emwi ne ẹ i gia ru vbe aro emwa ni rre ẹvbo ni gha dekẹe na, sokpan, ẹ i re emwi ne ẹ i gia ru vbe obọ mwẹ.

⁷ I gha fannọ emwa mwẹ ke ẹvbo ne a viọ iran gha rrie rre.

⁸ I ghi vbe viọ iran ke odẹ ahọ kevbe orrie rre ne iran do gha rre Jerusalẹm. Iran ghi gha re emwa mwẹ mẹ ghi vbe gha re Osanobua iran. I ghi gha khaemwisẹ yan iran vbe ọghọ kevbe ute.

⁹ Wa gie ẹtin la uwa iwu! Ẹmwẹ ne avbe akhasẹ tae ẹghẹ ne a na gha gbe ẹyotọ ne a ra ya dọlọ Ọgua Osa mwẹ bọ, ọ re uwa vbe họn na.

¹⁰ Vbe ọ te do sẹ ẹghẹ ne a kha na, a i miẹn ọmwa ne ọ sẹtin rhie aranmwẹ ra ọmwa ne agbọn vbe iwinna, ọmwa ne ọ wa vbe fe vbe obọ eghian rẹn ẹ i rrọ. I keghi ru ẹe ne emwa viọ aro igbinna da egbe.

¹¹ Sokpan, banbanna, obọ ughaẹn ọ re I ra ya mu emwa ni ghi kerre vbe ẹvbo na.

¹² Iran gha kọ emwiokọ iran vbe ọfumwegbe. Azara iran gha mọ alimo ayọn, otọe gha ma emwiokọ, amẹ gha vbe rhọ ẹsẹse. I gha rhie afiangbe na hia ne emwa ẹvbo mwẹ ni miẹn uhunmwu vbọ.

¹³ Ivbi e Juda kevbe Izrẹl; vbe ẹghẹ ne ọ gberra te avbe orhunmwuyẹn te ya ẹe tie ihẹn ne egbe wẹẹ, ‘Emwi ne ọ rruan e Juda kevbe Izrẹl ọ re ọ gha rruan ruẹn.’ Sokpan, mẹ gha miẹn uwa fan, avbe orhunmwuyẹn nii ghi vbe gha kha ma egbe wẹẹ, ‘Ọma ne ọ mian e Juda kevbe Izrẹl ọ re ọ gha rruan ruẹn.’ Rhunmwuda ọnii, wa gie orhiọn la uwa iwu, wa ghẹ fian afianma.”

¹⁴ E Nọyaẹnmwa ne Oghodua khare wẹẹ, “Ẹghẹ ne avbe erha uwa odede na rukhọ ghe mwẹ, I keghi mwamwa emwi ne I gha ru iran re, I ma kie werriegbe vbọ, te I wa ru ẹe vberriọ.

¹⁵ Sokpan, banbanna nian, te I mwamwa ẹn wẹ ne I fiangbe ivbi e Jerusalẹm kevbe Juda. Rhunmwuda ọnii, wa ghẹ gie ohan mu uwa.

¹⁶ Emwi ne uwa gha ru ọre ọna khin: Wa gha ta ẹmwata ma egbe. Wa gha bu ohiẹn ẹmwata vbe iko, egbe ne ọ rhie ọfurre ye ẹvbo.

¹⁷ Wa ghẹ si uma emwi ne uwa gha ru egbe re. Wa ghẹ vẹn ihen ya sẹ osẹ ohoghe. I i zẹdẹ ho ẹmwẹ ohoghe, ẹkẹ vbe ero kevbe uyinmwẹ ibalegbe.”

¹⁸ E Nọyaẹnmwa ne Oghodua keghi giee Zẹkaraia uhunmwu na wẹẹ,

¹⁹ “Aguẹ ne a yo vbe uki ne ogienẹ, ogisẹn ne ogihinrọn kevbe ne ogigbe, emwiukpo ọyẹnmwẹ kevbe oghogho ọ re ọ khian gha khin ne ivbi e Juda. Wa gha ho ẹmwẹ ẹmwata kevbe ọfumwegbe.”

²⁰ E Nọyaẹnmwa ne Oghodua khare wẹẹ, “Ẹghẹ dee ne emwa nibun gha na ke ẹvbo nibun gha die Jerusalẹm.

²¹ Iran ni ke ẹvbo ọkpa rre ghi tama ni ke nọkpa rre wẹẹ, ‘Ma ra ya ga e Nọyaẹnmwa ne Oghodua, ne a vbe nọ afiangbe ẹre. Lele ima gha khian.’

²² Emwa nibun ẹsẹse kevbe ẹvbo ni mwẹ ẹtin gha rrie Jerusalẹm do ga Nọyaẹnmwa ne Oghodua kevbe ne iran vbe nọ afiangbe ẹre.

²³ Ọ gha sẹ ẹghẹ ne a kha na, erhunmwuyẹn igbe gha bu ovbi e Ju ọkpa rre, iran ghi tama rẹn wẹẹ, ‘Ma ho ne ima vbe ghae vbe uhunmwu ne ọ maa ọghe uwa rhunmwuda ma họẹn ighe Osanobua rrọọ yaba uwa.’ ”