Zẹkaraia 6 - Edo Bible (E Baibol Ẹdo) Version 1996

Umian Ikẹkẹ okuo Enẹ

¹ I keghi vbe miẹn umian ọvbehe. Vbe ọnọna, I keghi ya bẹghe ikẹkẹ okuo enẹ iran la ẹkpo oke oze eva dee.

² Ẹsin ni baa ọ re ọ gha si ikẹkẹ okuo nokaro khian; ne ogieva, avbe ẹsin nekhui;

³ ne ogieha, avbe ẹsin nọfua; ne ogienẹ avbe ẹsin ni gbẹnnẹ ekẹnnẹkẹnnẹ.

⁴ Ẹre imẹ ghi na nọ odibosa nii wẹẹ, “Enọwanrẹn, de emwi ne a ya avbe ikẹkẹ okuo nii kha yi?”

⁵ Rẹn keghi wanniẹn wẹẹ, “Avbe ẹhoho enenẹ ena khin, te iran wa da ke akharha e Nọyaẹnmwa ọghe otọ agbọn hia dee na.”

⁶ Ikẹkẹ okuo ne avbe ẹsin nekhui si, keghi mu uhunmwu da odẹ okuọ gha rrie Babilọn. Avbe ẹsin nọfua keghi mu aro da odẹ orrie, iran ni gbẹnnẹ ekẹnnẹkẹnnẹ keghi mu aro da ẹvbo ni rre odẹ ekẹn.

⁷ Avbe ẹsin nii gbẹnnẹ ekẹnnẹkẹnnẹ ghi wa ladian, ọ ke wa gha fi iran egbe wẹ iran ra ya rhuan otọ agbọn ghe. Odibosa nii keghi tama iran wẹẹ, “Wa gha khian ya rhuan otọ agbọn ghe,” iran keghi gele ru vberriọ.

⁸ Ẹre odibosa nii na ni urhu tama mwẹ wẹẹ, “Avbe ẹsin ni mu uhunmwu da odẹ okuọ gha rrie Babilọn, ya ohu e Nọyaẹnmwa dọyọ nẹ.”

A Wẹ Ne A Ma Jọsua Ọba

⁹ E Nọyaẹnmwa keghi gie mwẹ uhunmwu na.

¹⁰ Ọ wẹẹ, “Viọ emwi ihaoko ọghe iran ni rre iwe ighe Heldai, Tobaija kevbe Jedaia, ne uwa gha rrie owa e Josaia ne ovbi e Zẹfanaia ọwarọkpa. Emwa na hia ke iwe rre nẹ ke Babilọn gha dee.

¹¹ Ya avbe igoru kevbe esiliva ne iran viọ rre ru ẹde ne u mu ẹẹn yan e Jọsua ne ovbi e Jehozadak uhunmwu.

¹² Tama rẹn wẹ e Nọyaẹnmwa ne Oghodua khare wẹẹ, ‘Agbọn gha maa ọmwa ne a tie ẹre Abọ vbe ehe ne ọ ye ọ gha vbe dọlọ Ọgua Osa e Nọyaẹnmwa họ.

¹³ Rẹn ọrọre ne ọ ra bọ ẹe, ọ ghi vbe miẹn uyi ne ọ khẹke ọha, rẹn gha vbe gha khaemwisẹ yan avbe emwa rẹn. Ohẹn gha mudia ke ẹkete ẹre, iran ghi vbe gha winna kugbe vbe ọfumwegbe kevbe akugbe ne ọ rriẹe.’

¹⁴ Ẹdẹ ni gha rre nẹ a ya gbe ayere vbe Ọgua Osa e Nọyaẹnmwa vbe eni e Heldai, Tobaija, Jedaia, kevbe Josaia.”

¹⁵ Emwa ni rre urria gha rre, iran ghi do ru iyobọ ye ubọmwẹ Ọgua Osa e Nọyaẹnmwa. A ghẹ ghi dọlọ ẹe bọọ nẹ, wa gha rẹn wẹ e Nọyaẹnmwa ne Oghodua ọre ọ gie mwẹ bu uwa gha dee. Ena hia gha wa sunu fẹẹrẹ a deghẹ wa họn ẹmwẹ ne Nọyaẹnmwa Osanobua rua tama uwa, wa na vbe ya ẹe ru emwi.