Zẹkaraia 5 - Edo Bible (E Baibol Ẹdo) Version 1996

Umian Ebe Ne A Kiri Ne Ọ Tin Khian

¹ I keghi dọlegbe gbe aro ke otọ, I ghi ya ghe, ghe ebe ne a kiri, ọ wa tin la odukhunmwu khian.

² Odibosa nii keghi nọ mwẹ emwi ne I bẹghe. Mẹ keghi wanniẹn wẹẹ, “Ebe ne a kiri ne ọ tin la odukhunmwu khian. Utanmwẹ ọnrẹn re ibata ọgban vbe ne uvbẹmwẹ ọnrẹn na re ibata ekesugie.”

³ Rẹn keghi tama mwẹ wẹẹ, “Emwi ne a gbẹn ye uwu ẹre ọrọre ihen ne a ra tie ne uhunmwu otọe hia. Vbe obọkpa vbe ebe nii, a gbẹn ọẹn yọ wẹ a gha hẹ avbe oyi hia kua vbe otọe nii; a keghi gbẹn ye obọ nọkpa wẹ emwa ni ye ta ohoghe vbe iran a vbe vẹn ihen nẹ, a gha vbe hẹ iran kua.

⁴ E Nọyaẹnmwa ne Oghodua khare wẹ te irẹn ra tie ihen na. Ọ gha la uwu owa avbe oyi hia kevbe iran ni vẹn ihen ta ohoghe. Te ọ ra gha rre iran owa, ọ ghi ya iran khian itowa.”

Umian Ọghe Okhuo Ne Ọ Rre Uwu Okhuae

⁵ Odibosa nii keghi vbe dọlegbe rhie egbe maa, ọ wẹẹ, “Ghe, emwi ọvbehe vbe dee!”

⁶ Mẹ keghi nọ wẹẹ, “De emwi ne ọ khin?” Rẹn keghi wanniẹn wẹẹ, “Okhuae nọ, ọ vbe mudia ye ihe orukhọ otọe na hia.”

⁷ Okhuae na mwẹ ugue ne a ye oze ru. Zẹ vbene I wa ghe ẹre nii, a keghi tọn ugue ẹre mu, okhuo ọkpa kegha rre uwu ẹre, ọ tota!

⁸ Odibosa nii keghi kha wẹẹ, “Okhuo na mudia ye ihe uyinmwẹ dan.” Rẹn keghi rrua okhuo nii gbe otọ vbe uwu okhuae nii, ọ na mu ugue ẹre rhu ẹe.

⁹ Mẹ ghi tọn aro mu, I ghi ya ghe ikhuo eva wa tin bu mwẹ dee, ifuẹn iran ni wegbe zẹ vbe ọghe avbe ahua, ọ re iran ya gha tin dee. Iran tọn okhuae nii mu, iran na mu ẹẹn tin kpao.

¹⁰ Mẹ keghi nọ odibosa ni wẹẹ, “Vbe iran mu ẹẹn rrie?”

¹¹ Rẹn wanniẹn wẹẹ, “E Babilọn nọ, te iran ra ya bọ aro ẹre ye odọ. Iran ghẹ ghi bọ ẹe fo nẹ iran ghi mu okhuae ni yọ, iran ghi gha gho ẹre.”