Zẹkaraia 4 - Edo Bible (E Baibol Ẹdo) Version 1996

Umian Erhan Ọmukpa

¹ Odibosa nii ne ọ gha gunmwẹ guan usin keghi rre, ọ keghi huẹn mwẹ kpaegbe vbe ne a miẹn wẹ te I te vbiẹ.

² Rẹn keghi nọ mwẹ wẹẹ, “De emwi ne u bẹghe yi?” Mẹ keghi wanniẹn wẹẹ, “Erhan ne a mu ukpa yan ne a ye igoru ru. Ọkpan ne a sa ofigbọn yi rre odukhunmwu ẹnrẹn. Ukpa ihinrọn rre uhunmwu ọmukpa na, ukpa ọkpọkpa mwẹ uvun ihinrọn ne a rhie oru la.

³ Eran oliv eha diake nene erhan ọmukpa, ọkpa vbe obọ na kevbe nọkpa vbe obọ nọkpa.”

⁴ Ẹrẹ mẹ na ghi nọ odibosa nii wẹẹ, “Dọmọ o, de emwi ne a ya enena kha yi?”

⁵ Rẹn nọọn mwẹ wẹẹ, “Wẹ ma rẹn ra?” Mẹ keghi wanniẹn wẹẹ, “I ma rẹn enọwanrẹn.”

^10b Odibosa nii keghi tama mwẹ wẹẹ, “Erhan ọmukpa ihinrọn ni keghi re avbe aro ihinrọn ọghe Nọyaẹnmwa ne ọ bẹghe otọ agbọn hia.”

¹¹ Mẹ keghi nọ wẹẹ, “De emwi ne avbe erhan oliv ni rre obọ eveva ọghe erhan ọmukpa ni mudia yi?

¹² De emwi ne a vbe ye abọ erhan oliv eva ni rre ọkpẹn uhoro igoru eva ne ofigbọn oliv keghi le ladian kha?”

¹³ Rẹn keghi nọ. mwẹ wẹẹ, “Wẹ ma rẹn ra?” Mẹ keghi wanniẹn wẹẹ, “I ma rẹn enọwanrẹn.”

¹⁴ Ẹre irẹn ghi na kha wẹẹ, “Iran na ọrọre avbe ikpia eva ne Osanobua zẹe, ọ na vbe nọnọ ori ye iran uhunmwu ne iran gha ga irẹn, ne e Nọyaẹnmwa ne ọ yan otọ agbọn hia.”

Emwi Ne Nọyaẹnmwa Ve Zerubabẹl Re

⁶ Odibosa nii keghi tama mwẹ ne I ta uhunmwu ne Nọyaẹnmwa gie gie Zerubabẹl na ma rẹn wẹẹ, “U gha khọnmiotọ, sokpan, ẹ i re vbe ekpa ẹtin ivbiyokuo ra ẹtin ọghe obọ ruẹ sokpan, orhiọn mwẹ.

⁷ Idobo ni ye vbe oke ni yo gha we yo hin odaro ruẹ rre. U gha dọlọ Ọgua Osa bọ. U gha ghi mu ibiriki ne okiekie yọ, emwa hia ghi wee, ‘Imose, imose!’ ”

⁸ A keghi vbe gie uhunmwu ọvbehe ke ehe ne Nọyaẹnmwa ye gunmwẹ.

⁹ Ọ wẹẹ, “E Zerubabẹl gbe ẹyotọ Ọgua Osa nẹ, te ọ ra bọ ẹe fo. Ọna ghẹghi sunu, emwa mwẹ gha rẹn wẹ mẹ ọ re ọ giọ gie uwẹ bu iran gha dee.

^10a Egbe gha wọ iran rhunmwuda, obọ i kẹe vbe nene iwinna, sokpan, iran gha miẹn vbe Zerubabẹl a gha bọ Ọgua Osa ni khian, iran gha ghọghọ.”