Zẹkaraia 3 - Edo Bible (E Baibol Ẹdo) Version 1996

Umian Ogie Ohẹn Ne Akhasẹ Miẹn

¹ Vbe umian ọvbehe, e Nọyaẹnmwa keghi mu Ogie Ohẹn ighe Jọsua ma mwẹ, ọ keghi mudia ye odaro odibosa e Nọyaẹnmwa. E Satan keghi vbe mudia ke Jọsua, ọ mu egbe ne ọ ba ẹre ifi ẹzọ.

² Odibosa e Nọyaẹnmwa nii keghi tama e Satan wẹẹ, “E Nọyaẹnmwa ọ gha bu ohiẹn gbe uẹ Satan! E Nọyaẹnmwa ne o hoẹmwẹ Jerusalẹm ọ gha bu ohiẹn gbe uẹ. Ọmwa na, te ọ yevbe ovbi erhan ne a sanmwẹ ke uwu aranmwerhẹn ladian.”

³ E Jọsua mudia vbe evba, ke ẹe kevbe ukpọn ne ọ gbe iruẹn ne ọ hẹ ye egbe.

⁴ Odibosa nii keghi tama avbe ikuekẹn ne ọkpọmwa rẹn wẹẹ, “Wa bannọ avbe ukpọn ni gbiruẹn ne okpia na hẹ ye egbe.” Rẹn keghi vbe tama e Jọsua wẹẹ, “I viọ orukhọ ruẹ hin rre nẹ, I gha viọ ukpọn ọgbọn ne uẹn ne u hẹ ye egbe.”

⁵ Rẹn keghi tama avbe ọkpọmwa rẹn wẹ ne iran ye ukpọn ne ọ huanrẹn gbalọ e Jọsua uhunmwu. Iran keghi ru ẹe vberriọ, iran keghi vbe sirra odibosa e Nọyaẹnmwa nii viọ ukpọn ọgbọn nii yọ e Jọsua.

⁶ Ẹre odibosa nii na tama e Jọsua wẹ,

⁷ e Nọyaẹnmwa khare wẹẹ, “U gha ye uhi mwẹ ru emwi, u na vbe gha ru iwinna ne I wa ne uẹn, ẹghẹ nii, u ghi gha re ọmwa ne ọ gbearoghe Ọgua Osa mwẹ kevbe ehe ne ọ lẹga ẹre rhinrin, mẹ gha vbe họn erhunmwu ruẹn, zẹ vbene I họn erhunmwu avbe odibosa ni rre ehe ne imẹ ye.

⁸ Rhunmwuda ọnii nian, danmwehọ, e Jọsua, wẹ ne ọre Ogie Ohẹn; wa vbe danmwehọ, wa ne avbe ohẹn ne ihua ẹre, wa ni re ama ọghe ẹdẹ nakhuẹ ne ọ maa. I gha rhie ẹre ladian ne a miẹn ighe ọguọmwadia mwẹ ne a tie ẹre Nene Abọ!

⁹ I ra mu okuta ne ọ mwẹ aro ihinrọn ye odaro Jọsua. I gha gbẹn emwi yọ, I gha viọ orukhọ otọe na kua vbe ikpẹdẹ ọkpa kẹkan.

¹⁰ Ọ gha sẹ ẹdẹ ne a kha na, dọmwadẹ ọghọe vbe uwu uwa gha gie na tie emwa ẹdogbo ẹre ne ọ do gu ẹe ghae vbe oghọghọ ọfumwegbe kevbe ẹkun ne ọ sẹ otọ, vbe ehe ne ọ na ye ogba azara kevbe erhan ohọ gba ogba ga egbe.”