Zẹkaraia 14 - Edo Bible (E Baibol Ẹdo) Version 1996

E Jerusalẹm Kevbe Avbe Uhunmwu Ẹvbo Nekpa

¹ Ẹdẹ ne Nọyaẹnmwa ra tota gha bu ohiẹn sẹ otọ nẹ. Ẹdẹrriọ, a gha fu emwi viọ vbe Jerusalẹm, a ghi wa vbe sirra ruẹ gha ghae emwi ne a fu viọ nii.

² E Nọyaẹnmwa gha si avbe uhunmwu ẹvbo hia kugbe ne iran do gu e Jerusalẹm gbinna. A gha khọn mu ẹvbo nii, a gha fu emwi ni rre owa vbọ viọ. A gha mu avbe ikhuo ni rrọ yagha. A gha wa ẹvbo nii ye ihe eva, obọkpa vbọ gha yo iwe, sokpan, a i ra viọ iran ni ghi dekẹe hin ore ẹvbo rre.

³ Ẹghẹ nii, e Nọyaẹnmwa gha ladian ya gu avbe uhunmwu ẹvbo nii gbinna zẹ vbene ọ ka ru ẹe yi vbe ẹghẹ ne ọ gberra.

⁴ Ọ gha sẹ ẹghẹ nii, ọ gha mudia ye Oke Ọliv ne ọ rre odẹ ahọ ọghe Jerusalẹm, ẹghẹ nii iya nọkhua ghi gia Oke Ọliv ye ihe eva ke odẹ ahọ ya sẹ orrie. Ukhiọnmwẹ ọkpa vbọ ghi laghe odẹ okuọ, ukhiọnmwẹ nọkpa ghi laghe odẹ ekẹn.

⁵ We ghi lẹ la iya na ne ọ fian oke ni rra ya sẹ obọ nọkpa ladian. Wa ghi lẹ zẹ vbene avbe erha uwa odede ka lẹ vbe ẹghẹ ne igbohiotọ na gha rrọ vbe ẹghẹ Ọba Uzaia ọghe Juda. E Nọyaẹnmwa Osanobua mwẹ gha viọ avbe odibosa hia mwẹ obọ gha dee.

⁶ Ọ gha sẹ ẹghẹ nii, oni i ra gha rrọ.

⁷ Amawẹ amẹ ne ọ rhọ vbe evbu, ra ebiebi ke ebiebi, uwanmwẹ ẹdẹ ghi gha rrọ uhin vbe a rhe gha rre asọn. E Nọyaẹnmwa ọkpa ọ re ọ rẹn ẹghẹ ne emwi na hia gha ya sunu.

⁸ Ọ gha sẹ ẹdẹ ne ẹdẹrriọ, amẹ ne ọ hianrẹn gha lẹ ke Jerusalẹm rre, obọ ọkpa vbọ gha lẹ ghe Okun nọwu, obọ ọkpa ghe Meditẹrrenian. te ọ ra wa lẹ ne ukpo gbe, vbe ẹghẹ orhọ kevbe uyunmwu.

⁹ Ẹghẹ nii e Nọyaẹnmwa ghi gha re ọba yan otọ agbọn hia, emwa hia gha ga ẹe zẹ vbe Osanobua, iran ghi vbe gha ya eni ọkpa tie ẹre.

¹⁰ A gha hẹnhẹn otọe nii hia fẹẹrẹ ke Geba vbe odẹ okuọ ya sẹ Rimọn vbe odẹ ekẹn, e Jerusalẹm ghi gha ghe avbe otọ ni lẹga ẹre adesẹ uhunmwu; ẹvbo ni gha tan vbe otọ ke urho e Bẹnjamin ya sẹ Onurho igọgọ, ehe ne onurho ka gha ye yi, kevbe ke Owa ọkhẹ e Hananẹl ya sẹ okọ ne a na minọ ayọn ọghe ọba.

¹¹ Emwa ni ghi gha rrọ vbene ẹkun na sẹ iran otọ, vbene ọfuan i ghi na vbe runran iran ọvbehe.

¹² E Nọyaẹnmwa gha mu emianmwẹ ne ọ wegbe ku avbe uhunmwu ẹvbo hia ni mu okuo ye Jerusalẹm. Ikpakpa egbe iran gha kẹkẹ ua vbe iran ma he wu, aro iran kevbe aranmwẹ iran gha kẹkẹ ua.

¹³ Ọ gha sẹ ẹghẹ nii, e Nọyaẹnmwa gha fian otighi ne ọ sẹrriọ fi iran egbe ohan ghi vbe mu iran sẹrriọ wẹ dọmwadẹ ọghọe gha dobọ mu ọmwa ne ọ sikẹ ọre sẹ, ọ ghi suẹn gha gu ẹe gbinna.

¹⁴ Ivbi e Juda gha gbinna ne a tan obọ gue Jerusalẹm. Iran gha fu emwi avbe uhunmwu ẹvbo hia viọ, zẹ vbe emwi ne a miẹn viọ vbe okuo igoru, esiliva kevbe ukpọn nibun ẹsẹse.

¹⁵ Emianmwẹ dan gha vbe dekun avbe ẹsin, avbe ẹsin amwẹ, avbe kamẹl kevbe ekẹtẹkẹtẹ, kevbe emwirri hia ni rre agọ avbe eghian.

¹⁶ Ẹghẹ nii, avbe emwa ni ghi miẹn uhunmwu vbe ẹvbo nii hia ni gu e Jerusalẹm khọn, ghi gha yo evba ukpukpo ne iran ya gha ga e Nọyaẹnmwa ne Oghodua zẹ vbe ọba kevbe ne iran ya ru emwiukpo Igbagọ.

¹⁷ A deghẹ uhunmwu ẹvbo ọkpa ma ga e Nọyaẹnmwa ne Oghodua zẹ vbe ọba, amẹ i rhọ ye otọ iran.

¹⁸ A deghẹ ivbi Igipt wẹ iran i ru Emwiukpo Ibuagọ, egbe emianmwẹ ne Nọyaẹnmwa mu ku avbe uhunmwu ẹvbo ni ma yo, gha vbe sẹ iran egbe.

¹⁹ Ọna ọ re ọ khian gha re oya ne Igipt gha re kevbe avbe ẹvbo nekpa, a deghẹ iran ma ru emwiukpo Ibuagọ.

²⁰ Ọ gha sẹ ẹghẹ nii, ya sẹ egbe ẹgogo ne a gba ginna ẹsin ne a hin khian, te a ra gbẹn yọ wẹẹ, “A ya ẹe ne Nọyaẹnmwa.” Avbe uwawa ne a ya le evbare vbe Ọgua Osa, te ehia ra gha re emwi nihuanrẹn zẹ vbene iran ye ighe avbe ọkpan ne a viọ ye odaro Ogiukpo.

²¹ Uwawa ne a ya le evbare hia vbe Jerusalẹm kevbe Juda, a gha zẹ ehia kọ ye ne a ya ga e Nọyaẹnmwa ne Oghodua. Iran ni do zọ ese gha ya ẹe le emiowo ne iran ya zọ ese. Ọ gha sẹ ẹghẹ nii, a i ghi miẹn avbe emwa ni do ẹki vbe uwu Ọgua Osa ọghe Nọyaẹnmwa ne Oghodua.