Zẹkaraia 12 - Edo Bible (E Baibol Ẹdo) Version 1996

Vbene A Gha Miẹn Jerusalẹm Fan Hẹ

¹ Uhunmwu ne Nọyaẹnmwa gie rre vbe ekpa Izrẹl ọ re ọna khin, e Nọyaẹnmwa ne ọ tan iso vbe ukpọn, ne ọ yi agbọn, ọ na rhie arrọọ ne ọmwa. Rẹn wẹẹ,

² “I gha ye Jerusalẹm khian vbene ukpu ayọn ye, avbe ẹvbo ni lẹga ẹre gha da ẹe, iran ghi gha ye owẹ fi otọe dọn zẹ vbe ọdayọn. Iran gha mu okuo la e Jerusalẹm, iran gha vbe mu okuo la avbe okpẹvbo nekpa ni rre Juda.

³ Sokpan, ọ gha sẹ ẹghẹ ne a kha na, I gha ye Jerusalẹm khian emwi ne ọ ye vbe okuta ne ọ khua. Ẹvboikẹvbo ne ọ wẹ rẹn ra tọn ẹn mu gha miẹn ikuangbe. Avbe uhunmwu ẹvbo hia ni rre agbọn gha ku obọ gbe ne iran gu ẹe gbinna.

⁴ Ọ gha sẹ ẹghẹ nii, I gha runran avbe ẹsin iran, I ghi fi emwẹmwẹ ku iran ni hin ẹnrẹn uhunmwu. I gha tobọ mwẹ gha gbearoghe ivbi e Juda, sokpan, I gha rhu avbe ẹsin eghian iran aro.

⁵ Ẹghẹ nii, avbe ẹwae ni rre Juda gha tama egbe iran wẹẹ, ‘E Nọyaẹnmwa Osanobua ne Oghodua ọ re ọ rhie ẹtin ne emwa rẹn ni rre Jerusalẹm.’

⁶ “Ọ gha sẹ ẹghẹ nii, I gha ru ẹe ne ẹwae ni rre Juda gha ye vbe erhẹn ne ọ rre otọe ẹgbo ra ni rre ugbo ọka ne ọ wo nẹ, iran gha fuẹn avbe ẹvbo ni lẹga iran an. Ivbi e Jerusalẹm ghi gha rrọ vbe ne ẹkun na sẹ iran otọ vbe ore ẹvbo.

⁷ “Mẹ ne Nọyaẹnmwa, ọ re ọ ra rhie akhọnmiotọ ne ivbiyokuo e Juda vbe okaro vbene a gha na miẹn wẹ uyi ne ọ gha rre ivbi e Devid kevbe ivbi e Jerusalẹm egbe i ra kpọlọ sẹẹ ne ọ gha rre egbe ivbi e Juda ni dekẹe.

⁸ Ọ gha sẹ ẹghẹ nii, e Nọyaẹnmwa gha degue emwa ni rre Jerusalẹm sẹrriọ we ọmwa ne ọ ghi vburriẹ sẹẹ vbọ gha wegbe vba vbene Devid gha ye. Ivbi uniẹn Devid gha su iran zẹ vbe odibo Nọyaẹnmwa zẹ vbe Osanobua tobọ ẹre.

⁹ Ọ gha se ẹghẹ ne a kha na, I gha fuẹn iran an ighe ẹvboikẹvbo ne ọ ho ne ọ gu e Jerusalẹm gbinna.

¹⁰ “I gha ye orhiọn itohan kevbe orhiọn erhunmwu vuọn ivbi uniẹn e Devid ni rre Jerusalẹm kevbe ivbi Jerusalẹm ọvbehe. Iran gha ghe ọmwa ne a ya agbada bi gbe ua, iran gha vbe khiẹ ọre vbe ọmwa ne ọ khiẹ ukpọmọkpa ne ọ mwẹ. Iran gha viẹ eve orriara zẹ vbe ọmwa ne ọmọdiọn rẹn nokpia wu.

¹¹ Ọ gha sẹ ẹghẹ ne a kha na, akhiẹ ne ọ gha rre Jerusalẹm gha vba akhiẹ ne emwa khiẹ ne Hadadrimon vbe otọe Mẹgido.

^12-14 Dọmwadẹ ẹgbẹe ni rre otọe nii ọ re ọ ra ru akhiẹ obọ ẹre, ivbi uniẹn e Devid, ivbi uniẹn e Natan, ivbi uniẹn Livai, ivbi uniẹn Simẹi, kevbe avbe ẹgbẹe ghi gha khiẹ vbe obọkpa, ikhuo ni rrọ ghi vbe gha khiẹ ọghe obọ iran vbe obọkpa.”