Zẹkaraia 1 - Edo Bible (E Baibol Ẹdo) Version 1996

E Nọyaẹnmwa Tiere Wẹ Ne Emwa Dọlọ Bu Irẹn Rre

¹ Vbe uki ne ogierẹnrẹn ọghe ukpo nogieva ne Dariọs ya gha re ọgbaisi e Pẹsia, e Nọyaẹnmwa keghi gie ẹre uhunmwu na ighe Zẹkaraia ne ovbi e Berakia kevbe eyẹ Iddo.

² E Nọyaẹnmwa ne Oghodua keghi gie Zẹkaraia ne ọ tama emwa nii wẹẹ, “Ohu avbe erha uwa odede wa kakabọ mu imẹ ne Nọyaẹnmwa,

³ sokpan, banbanna nian, mẹ tama uwa wẹẹ wa werriegbe bu mwẹ gha dee, mẹ gha vbe werriegbe bu uwa rre.

⁴ Wa ghẹ gha ye vbe avbe erha uwa odede. Vbe ẹghẹ ne ọ kpee fua, avbe akhasẹ ta uhunmwu ne I giee gie iran ma iran, wẹ ne iran ghẹ gha ru emwi dan ra ne iran gha yin uyinmwẹ dan, sokpan iran ma zẹ yọ mwẹ re, ra ne iran họn ẹmwẹ mwẹ.

⁵ Ke avbe erha uwa odede, kevbe nene avbe akhasẹ, erhọkpa i ghi rre agbọn.

⁶ Avbe eguọmwadia mwẹ i ghẹ avbe akhasẹ ọ re I giee ne a tama avbe erha uwa odede, emwi ne I ho ne iran ru kevbe emwi ne ọ gha he sunu, sokpan, iran ma zẹye rhọkpa, ọre obọ na vba iran. Ẹghẹ nii, iran keghi fi uyinmwẹ werriẹ, iran keghi do miẹnkue wẹ, mẹ ne Nọyaẹnmwa ne Osanobua ọ re ọ rri iran oya vbene ọ ma iran zẹ vbene I ta ẹe wẹ I gha ru ẹe.”

Umian Avbe Ẹsin Ne Akhasẹ Ni Miẹn

⁷ Vbe ukpo ne ogieva ne Dariọs ya gha re ọgbaisi, vbe ikpẹdẹ enẹyan-ugie ọghe uki ne ogiowọrọ (uki ne a tie ẹre siebat), e Nọyaẹnmwa keghi la ekpa umian ne I miẹn vbe asọn gie mwẹ uhunmwu.

⁸ Mẹ keghi bẹghe odibosa ọkpa ọghe Nọyaẹnmwa, ọ keghi hini ẹsin ne ọ baa. Ọ keghi yakọ vbe uwu ẹbu erhan eso vbe iya, avbe ẹsin ọvbehe eso keghi vbe rre ọre iyeke, ni baa, ni gbẹnnẹ ekẹnnẹkẹnnẹ, kevbe ni fuọfua.

⁹ I keghi nọ rẹn wẹẹ, “Dọmọ o, de emwi ne a ya avbe ẹsin na kha yi?” Rẹn keghi wanniẹn wẹẹ, “I gha ta emwi ne a ya iran kha ma ruẹn.

¹⁰ Te Nọyaẹnmwa gie iran ne iran ya rhuan otọe agbọn ghe.”

¹¹ Iran keghi do na iyẹn ma odibosa nii wẹẹ: “Ma la agbọn na hia khinkhian, ma keghi miẹn wẹ te agbọn na hia wa khian ne egbe wọre kevbe ne a siẹnrhu ginna otọ.”

¹² Ẹre odibosa nii na kha wẹẹ, “E Nọyaẹnmwa ne Oghodua, wẹ mu ohu e Jerusalẹm nẹ kevbe avbe okpẹvbo e Juda la ukpo ekigbesiyenẹ nian. Vbe ọ gha ghi kpẹe sẹ hẹ u te do mwẹ itohan?”

¹³ E Nọyaẹnmwa keghi ye avbe ẹmwẹ ni fu ọmwa ẹko rre rhie ewanniẹn ne odibosa nii.

¹⁴ Odibosa keghi tama mwẹ wẹ ne I ya mu ẹmwẹ ne Nọyaẹnmwa ne Oghodua ta ẹe ni go wẹẹ, “I mwẹ aho kevbe ẹnina nọkhua ghe Jerusalẹm ne ẹvbo mwẹ nọhuanrẹn.

¹⁵ Ohu avbe ẹvbo nii ne ọfurre kevbe ne ọfumwegbe ye wa mu mwẹ. Rhunmwuda, ẹghẹ ne imẹ na gha si egbe vbe ẹmwẹ ohu emwa mwẹ ne ọ mu mwẹ, avbe uhunmwu ẹvbo na kegha tua oya nẹ emwa mwẹ re sẹẹ ayọ.

¹⁶ Rhunmwuda ọnii, mẹ dọlegbe gha die Jerusalẹm nian, ne I do rhie itohan mwẹ ma ẹvbo nii. A ghi rhie Ọgua Osa mwẹ ye ihe, a gha vbe dọlegbe gbe ekẹn ẹvbo nii.”

¹⁷ Odibosa nii keghi vbe tama mwẹ wẹ ne I ya ta ẹe ladian ma emwa wẹẹ, “E Nọyaẹnmwa ne Oghodua khare wẹ agbọn gha ma emwa vbe avbe ẹvbo irẹn nekhua hia, kevbe wẹ rẹn gha dọlegbe ye gha dee do yi e Jerusalẹm obọ, ne ọ vbe ya ẹvbo nii khian ọghe obọ irẹn.”

Umian Avbe Igho Aranmwẹ

¹⁸ Vbe umian ọvbehe, I keghi bẹghe igho enẹ ọghe ẹkhuia ẹmila.

¹⁹ I keghi nọ odibosa ne ọ gunmwẹ guan usin wẹẹ, “De emwi ne a ya avbe igho na kha?” Rẹn keghi wanniẹn wẹẹ, “Iran mudia ye ihe ẹvbo ni mwẹ ẹtin ni zagha ivbi Juda, Izrẹl kevbe Jerusalẹm kua.”

²⁰ Ẹre Nọyaẹnmwa na ma mwẹ arhiẹn enẹ ni winna, ni viọ umọmọ mwẹ obọ.

²¹ Mẹ keghi nọ wẹẹ, “De emwi ne avbe emwa na do ru yi?” Rẹn keghi wanniẹn wẹẹ, “Te iran rre do runran kevbe ne iran vbe ya iran uhunmwu rhu ighe avbe ẹvbo nii ni wa dunmwu ẹn mu otọ fo fẹẹrẹ ighe otọe Juda, ne ọ na vbe zagha emwa ni rrọọ kua.”