Zẹfanaia 2 - Edo Bible (E Baibol Ẹdo) Version 1996

A Wẹ Ne Emwa Fiwerriẹ

¹ Ẹvbo ne ekhue i mu, wa gie aro hian uwa vbe uhunmwu nian,

² vbe a te do miẹn wẹ wa luẹluẹ ua, wa keghi vbe wulo zẹ vbe obobo, vbene ohu nọkhua ọghe Nọyaẹnmwa te hihiẹ yan uwa, ọ te do sẹ ẹdẹ nii ne ọ gha rhie ohu ẹre maa.

³ Wa fiwerriẹ bu e Nọyaẹnmwa gha dee, wa hia ni mwẹ amuegberriotọ ni rre otọe na, wa ni vbe ru vbene ọ khare. Wa gha ru vbene ọ kere, ne uwa vbe mu egbe rriotọ vbe odaro e Nọyaẹnmwa, ughaghe, ọ gha la uwa ban ighẹ irrioya nii, vbe ẹdẹ ne Nọyaẹnmwa gha rhie izohu ẹre maa.

Ọfuan Ọghe Avbe Uhunmwu Ẹvbo Ni Lẹga Izrẹl

⁴ Orhiọnkpa i vbe kẹe vbe ore Gaza. Askẹlọn gha khian ne emwa i ghi ye vbe a te wa ẹdẹ eva, a gha khulo emwa ni rre Asdọd kua fo, a gha khulo ivbi Ẹkrọn hin ẹvbo iran rre.

⁵ Ọghe uwa fo nẹ, ivbi e Filistin, avbe uwa ni yin eghute. E Nọyaẹnmwa bu ohiẹn gbe uwa nẹ. Te ọ ra fuẹn uwa a, ọkpa i ra vbe kẹe vbe uwu uwa.

⁶ Otọe uwa ni rre eghute gha khian oha kẹkan ne avbe ọsuohuan bọlọ eko yi kevbe ehe ne a viọ ohuan yi.

⁷ Iran ni ghi miẹn uhunmwu vbe ivbi e Juda ọ re ọ ra mu otọe uwa gha ye, evba iran ra na gha koko emwirri iran, iran ghi vbe gha vbiẹ owa ni rre Askẹlọn. E Nọyaẹnmwa ne Osanobua iran gha yaba iran, agbọn gha vbe dọlegbe maa iran.

⁸ E Nọyaẹnmwa ne Oghodua khare wẹẹ, “I họẹn vbe ivbi e Moab kevbe Amọn zan emwa mwẹ iran keghi vbe tie ihen ne iran, iran keghi vbe rhuọ wẹ iran gha miẹn iran otọ iran.

⁹ Omwa vbene a na miẹn wẹ mẹ ọrọre Osanobua ne ọ rrọọ ọghe Izrẹl, I vẹn ihen nẹ wẹ te a ra fuẹn Moab kevbe Amọn zẹ vbe Sọdom kevbe Gomorra. Iran gha khian otọ uye umwẹ kevbe itowa ẹdẹdẹmwẹdẹ ne ekie hinrin. Iran ni ghi miẹn uhunmwu vbe emwa mwẹ gha hẹ rhu iran, iran ghi mu otọ iran.”

¹⁰ Erriọ ọ re a ra ya rri iran oya ighẹ ivbi e Moab kevbe Amọn ba ẹmwẹ uhiomwẹ kevbe itengbemu iran, kevbe ne iran na gha tie ihen ne emwa e Nọyaẹnmwa ne Oghodua.

¹¹ E Nọyaẹnmwa gha runran iran. Ọ gha ye avbe ẹbọ ni rre agbọn khian kẹkan fẹẹrẹ, ẹghẹ nii, avbe uhunmwu ẹvbo ghi do gha ga ẹe, dọmwadẹ ọghọe vbe ẹvbo ẹre.

¹² E Nọyaẹnmwa gha vbe gbele iran an ighe ivbi e Sudan.

¹³ E Nọyaẹnmwa gha ya ẹtin ẹnrẹn fuẹn Asiria rua, ọ gha ya ore Ninevi khian itowa ne a lẹ sẹrae, ato ne amẹ i ye.

¹⁴ Ọ gha do khian ehe ne avbe oghẹn ohuan, oghẹn ẹmila kevbe avbe aranmwẹ ughughan hia gha na gha lovbiẹ. Esughusughu gha di itowa ẹre ya, iran ghi gha tu la avbe ewindo ẹre ladian. Ẹrekhue ghi gha tu vbe onurho. A gha bannọ erhan isida ni rre owa ẹre hin rre.

¹⁵ Emwi ne ọ ra rruan rẹn ọre ọnii khin ighe ẹvbo ni ne ọ ya ẹtin ẹnrẹn rhuọ vberriọ ne ọ na vbe ro wẹ ẹbe fo. Emwa rẹn ro wẹ ẹvbo iran ọ re ọ ghi kpọlọ sẹẹ vbe agbọn na hia. U miẹn egbe ehe ne ọ dihoi rua ne ọ ra khian, ehe ne avbe aranmwẹ oha gha na gha kẹtin. Ọmwa ne ọ rhirhi a la evba gberra gha ya iyeke werriegbe rhunmwuda vbene ọ ya mu ọmwa ohan.