Zẹfanaia 1 - Edo Bible (E Baibol Ẹdo) Version 1996

¹ Uhunmwu ne Nọyaẹnmwa giee Zẹfanaia re ọna khin, vbe ẹghẹ ne Josaia ne ovbi Amọn na gha re ọba e Juda (e Zẹfanaia na, ovbi uniẹn e Hẹzekaia ne ọba ọ re ọ gha khin, vbe obọ ne ọ laghe ọghe Amaraia, Gedalaia kevbe Kusi.)

Ẹdẹ Ibuohiẹn E Nọyaẹnmwa

² E Nọyaẹnmwa khare wẹẹ, “I ra fuẹn emwi ni rre otọ agbọn na an.

³ Emwa ne agbọn hia kevbe avbe aranmwẹ oha, avbe ahianmwẹ kevbe avbe ehẹn. I gha ru ẹe ne avbe emwa dan de guọghọ ua. I gha fuẹn emwa ne agbọn uan, ọkpa ne ọ ra kẹe i rrọ. Mẹ ne Nọyaẹnmwa ọ re ọ ta ẹe.

⁴ “I gha rri emwa ni rre Jerusalẹm oya deba ivbi e Juda hia, I gha fuẹn ọnrẹn uan ighe iyama ọghe Baal ne iran gho vbe evba, a i ghi vbe miẹn ọmwa ne ọ gha ye avbe ohẹn ẹbọ ni gho ẹre rre ọvbehe.

⁵ I gha fuẹn ọnrẹn uan ighe ọmwaikọmwa ne ọ hin ẹrhunrhun owa ya gha ga owẹn, uki ra orhọnmwẹ. I gha vbe fuẹn iran ni ga mwẹ, iran na vbe gha ya eni mwẹ vẹn ihen zẹ vbe ọmwa ne ọ mudia ẹse, sokpan, iran ghi vbe gha ya eni e Milkọm ne ẹbọ vẹn ihẹn.

⁶ I gha fuẹn iran ighe iran ni werriegbe, ne iran na ma ghi lele mwẹ ọvbehe, iran ni ma bu mwẹ rre do nọ mwẹ wẹ ne I ru igiodẹ ne iran.”

⁷ Ẹdẹ ne Nọyaẹnmwa gha tota bu ohiẹn dee, rhunmwuda ọnii, wẹ hunwan zẹẹ vbe ehe ne ọ ye. E Nọyaẹnmwa wa mu egbe nian ne ọ ya emwa rẹn zọ ese, Ọ vbe gie ne a tie avbe eghian ne iran do fu emwi viọ vbe Juda.

⁸ E Nọyaẹnmwa khare wẹẹ, “Ọ gha sẹ ẹdẹ igbemwi nii, I gha rri avbe ekhaẹmwẹ oya, deba avbe ivbi ọba, kevbe emwa hia ni lele uyinmwẹ ne ẹ i re ọghe ẹvbo iran ru emwi.

⁹ I gha rri iran hia oya ighẹ iran ni ru ugamwẹ zẹ vbe ivbi ẹbọ, iran ni rha, ni vbe do izigha ne a miẹn ehe na ye emwi ne a fu hẹ vuọn owa arowa iran; deba erẹrẹ kevbe uyinmwẹ ne ọ wegbe.

¹⁰ “Ọ gha sẹ ẹdẹ ne ẹdẹrriọ,” erriọ Nọyaẹnmwa khare, “U gha họn urhu eve vbe Onurho Ehẹn vbe Jerusalẹm. U gha họn ugomwẹ vbe idunmwu ọgbọn ọghe ẹvbo nii, kevbe owogho emwi ne ọ de guọghọ ua vbe avbe uhunmwu oke.

¹¹ U gha họn ọnọna, gha go ne u vbe gha viẹ, wa ni rre odẹ iya vbe ẹvbo nii, rhunmwuda, emwa ni do ẹki hia ọ re ọ ra wulo.

¹² Vbe ẹghẹ ne a kha na, I gha mu ukpa ya gualọ Jerusalẹm. Avbe iran ne ẹko owa iran vuọẹn ke ni ya obọ rra ẹwẹe iran, I gha rri iran oya. Iran ni kha wẹẹ, ‘E Nọyaẹnmwa i ru emwi rhọkpa.’

¹³ Emwa gha fu iran emwi viọ, a gha dunmwu owa iran an. Iran i yin owa ne iran bọlọe ra ne iran da ayọn vbe ọghe ugbo azara ne iran gbee.”

¹⁴ Ẹdẹ nọkhua ọghe Nọyaẹnmwa sikẹ otọ nẹ, ọ wa sẹẹ otọ fo, ọ wa dee ẹgiẹgiẹ! Ẹdẹ ne ẹdẹrriọ gha wa rriara, rhunmwuda, ovbiyokuo ne ọ wegbe sẹ gha rhie urhu hoho ua ẹdẹrriọ vbe ẹtin a ghi fo ẹe!

¹⁵ Ẹdẹ ohu nọkhua khian gha nọ, ẹdẹ ọlọghọmwa kevbe ibaro, ẹdẹ ọrhiae kevbe ọfuan, ẹdẹ ebiebi kevbe akhiẹ, ẹdẹ ne ọ vuọn ne okuku kevbe ne ọ siere ua.

¹⁶ Ẹdẹ ne ọ vuọn ne owogho okpe okuo, kevbe uvannọmwẹ okuo ọghe ivbiyokuo ni dekun ẹvbo ne a gbe odin gaa kevbe avbe owa ọkhẹ ni yo.

¹⁷ E Nọyaẹnmwa khare wẹẹ, “I gha gie emwi nọ wegbe rruan emwa ne agbọn sẹrriọ wẹ edọmwadẹ ọghe ọe ghi gha ye obọ baba odẹ khian zẹ vbe arhuaro. Iran rukhọ ghe mwẹ nẹ, banbanna nian, te a ghi ra gbe esagiẹn iran ye otọ zẹ vbe amẹ, ikun orinmwi iran ghi vbe gha kẹkẹ ua vbe otọ.”

¹⁸ Vbe ẹdẹ nii ne Nọyaẹnmwa gha rhie izohu ẹre maa, igoru kevbe esiliva iran hia ne ọ gha sẹtin miẹn iran fan, ẹ i rrọọ. Erhẹn ohu ẹre gha fuẹn agbọn na hia a. Ọ gha rhie ufomwẹ udomwurri ye ẹmwẹ emwa ni rre agbọn na hia.