Taitọs 3 - Edo Bible (E Baibol Ẹdo) Version 1996

Uyinmwẹ Ovbi Iyayi

¹ Ye avbe emwa ruẹn ẹre rre, ne iran gha gbe uhunmwu ke otọ ne iran ni rre asẹ kevbe ọdakha, ne iran gha họn ẹmwẹ ne iran, ne iran mu egbe ne iran gha ya gha ru emwi ne ọ maa vbe ẹghẹ hia.

² Tama iran ne iran ghẹ ta ọmwaikọmwa ọtakhọ, sokpan ne iran gha re ne ọ ho ẹmwẹ ọfumwegbe, kevbe ne ọ gu emwa hia ru ọse, kevbe ne iran gha gu emwa hia yin uyinmwẹ ọmẹhẹ.

³ Rhunmwuda ẹghẹ ọkpa rrọọ ne ima tobọ ima na te vbe kọn, a i họn ẹmwẹ, a keghi vbe ba emwi ku ru. Orriarria kevbe emwi ni rhiẹnrhiẹn ughughan keghi mu ima oghunmwu. A ke gha lo ẹdẹ mwa hia vbe uwu ikhọẹko, kevbe oya ọmwa da ọmwa, emwa eso kegha khu iwu mwa, ma keghi vbe gha khọ ẹko iran.

⁴ Sokpan ugbẹn vbe itohan kevbe aho ẹmwẹ ọmwa Osanobua kevbe Ọmiọnmwafan mwa ghi rhie egbe maa nẹ.

⁵ Ọ keghi miẹn ima fan. Ẹ i re rhunmwuda iwinna esi ne ima tobọ mwa winna, sokpan, rhunmwuda itohan rẹn ọre ọ na miẹn ima fan, vbe ekpa akhuẹ ne Orhiọn Ne Ọ Huanrẹn ya dọlọ mwa biẹ, ọ na vbe rhie arrọọ ọghe ọgbọn ne ima.

⁶ Te Osanobua wa mobọ tue Orhiọn Ne Ọ Huanrẹn yan ima ẹsẹse, la ekpa Jesu Kristi Ọmiọnmwafan mwa.

⁷ Ne a sẹtin la ekpa ẹsọhẹ ọghe ọe dọlọ ima kugbe ba Osanobua, ne ẹfe ẹtẹbitẹ ne ima danmwehọ ẹre miẹn ehe na sẹ ima obọ.

⁸ Ẹmwata ọre ẹmwẹ na khin. I ho ne u kakabọ tua unu mu ẹmwẹ na, ne iran ni ya Osanobua yi miẹn ehe na mu aro ye ẹmwẹ iwinna esi ne a winna. Ena ọrọre emwi ne ọ maa kevbe ne ọ ke ne emwa.

⁹ Sokpan wẹ ghi gha lẹ ne imuan ẹmwẹ oya, eni ne lọghọ ọghe erha odede ne ọ biẹ erha odede, ẹzọ, okhọn ne a khọn ba ẹmwẹ nene Uhi. Emwi oya ne ẹ i mwẹ esa ọre ehia khin.

¹⁰ Ọmwa ne ọ si iwannegbe rre, u ghi tie ẹre gu ẹe guan igbaeva, vbe iyeke ọnii, u ghi wa zobọ vbe egbe ẹre fẹẹrẹ.

¹¹ Rhunmwuda, u rẹnrẹn ighẹ te ọmwa vberriọ sakan an, orukhọ ẹre vbe rhie maa ighẹ te ọ ba odẹ ku.

Ẹmwẹ Okiekie

¹² I gha gie Atẹmas ra Taikikọs bu ruẹ gha dee, u ghi hia ne u bu mwẹ gha die Nikopolis, rhunmwuda, evba i wẹ i ra na gbe ẹghẹ okhuakhua.

¹³ Hia ne u ru iyobọ ne Zenas ne ulaya, ke ẹe kevbe Apọlọs, ne iran ya suẹn okhian iran, u ghi miẹn wẹ, a viọ emwi ne iran gha lo hia ne iran.

¹⁴ Ma emwa ima ẹre ne iran gha lo ẹghẹ iran ya winna iwinna esi, ne iran gha khuan ye emwi ne ọ kere ne a gha mwẹ. Wẹ ne iran ghẹ gha rre agbọn ọ rhiae.

¹⁵ Iran hia ni rre ehe ne I ye we uẹ do. We avbe ọse ima vbe uwu iyayi hia do. Te ẹsọhẹ Osanobua gha gu uwa hia gha rrọọ.