Taitọs 2 - Edo Bible (E Baibol Ẹdo) Version 1996

Iruẹmwi Ne Ọ Gbae

¹ Sokpan, wẹ ghi gha ma emwa emwi zẹ vbene iruẹmwi ne ọ gbae kha re.

² Tama avbe eniwanrẹn wẹ, te ọ kere ne iran gha re emwa ni gba ọghọ ginna egbe, ni mwẹ ẹwaẹn vbe uhunmwu kevbe ni i balọ egbe, ni iran gha re emwa ni mudia ẹse vbe iyayi, aho ẹmwẹ ọmwa kevbe iziengbe.

³ Erriọ vbe nọ, vbe tama avbe edede wẹ, ne iran gha ru emwi ọmwa ne ọ yin uyinmwẹ ne ọ huanrẹn. Ọ ma kei ne iran gha ta ọtakhọ ra ne ẹmwẹ ayọn i gi ẹe ya rẹn enegbe. Iran ghi gha ma emwa emwi esi.

⁴ Ne iran miẹn ehe na gha ma avbe ikhuo ni ma he khian ọmaẹn re, ne iran gha hoẹmwẹ ọdafẹn iran kevbe ivbi iran.

⁵ Ne iran ghẹ gha balọ egbe, ne iran gha re ne ẹ i mwẹ awua, kevbe amwẹ ne iye ọwa esi ni họn ẹmwẹ ne ọdafẹn iran, ne ọmwaikọmwa ghẹ ya ukpẹ sakan, ẹmwẹ Osanobua.

⁶ Erriọ vbe nọ, u ghi vbe tama avbe igbama ne iran ghẹ gha balọ egbe.

⁷ Wẹ tobọ ruẹ gha re igiemwi vbe uwu iwinna esi hia. U ghi mu aro yọ ne u vbe gha ta ẹmwata vbe u a gha ma emwa emwi.

⁸ Gha lo ẹmwẹ ne ọ gbae ne ẹ i gia gbe odan ye ọmwa ẹre, ne ekhue miẹn ehe na mu avbe eghian ighẹ iran ma ghi miẹn emwi rhọkpa ya zan ima.

⁹ Te ọ kere ne avbe eviẹn gha họn ẹmwẹ ne arowa iran, ne iran vbe gha ru vbene ọ gha yẹ iran vbe emwi hia. Iran ghẹ gha zẹ ẹmwẹ wanniẹn iran.

¹⁰ Iran ghẹ do iran emwi hẹ. Sokpan, ọ kere ne iran gha rhie maa vbe ẹghẹ hia, vbe emwi ne iran ru hia ighẹ iran maa, iran vbe gie a mu ẹtin yan, ne iran miẹn ehe na gie emwa gha ta ẹmwẹ ọnrẹn ẹse, ighẹ emwi ne a ma emwa ẹre, vbe ekpa Osanobua ne Ọmiọnmwafan mwa.

¹¹ Rhunmwuda, Osanobua rhie ẹsọhẹ ọghọe ne a miẹn nẹ, vbe ekpa ọghe imiẹnfan emwa hia.

¹² Ẹsọhẹ ni ọre ọ ma ima ẹre, ne a gha zobọ vbe avbe uyinmwẹ ne ẹ i re ọghe Osanobua, kevbe orriarria emwi agbọn na hia, ne a gha yin uyinmwẹ a i balọ egbe ne ọ mudia ẹse, kevbe uyinmwẹ ne ọ khọ ọghe Osanobua vbe agbọn na.

¹³ Zẹ vbene ima mudia khẹ Ẹdẹ ne afiangbe nii, ne ima mwẹ idaehọ ẹre, ẹdẹ ne uyi ọghe Osanobua mwa nọkhua, kevbe Ọmiọnmwafan mwa Jesu Kristi, gha rhie egbe maa.

¹⁴ Rẹn keghi rhie egbe ẹre ne ima, khian emwa ne ẹ i mwẹ iruẹn, ne ọ re ọghe irẹn ọkpa, kevbe ne ho ne iran gha ru emwi esi.

¹⁵ Gha ma emwa avbe emwi na hia, vbe gha lo asẹ hia ne ọ gu ẹe vbe uwu ẹghẹ ne u na rhie igiẹdu ne iran, kevbe ne u na vbe gu iran gui hin ọkhọ rre, ighẹ iran ni danmwehọ ruẹ. Ghẹ gie ọmwa rhọkpa vbe uwu iran ye aro gue uẹ re.