Taitọs 1 - Edo Bible (E Baibol Ẹdo) Version 1996

¹ E Pọl ne ọguọmwadia Osanobua, kevbe ukọ ọghe Jesu Kristi, ọre ọ gbẹn ebe na rre. Te a hannọ mwẹ zẹ, a na vbe gie mwẹ wẹ, ne I ya ru iyobọ ne iyayi emwa ne Osanobua hannọ zẹ, kevbe ne I vbe dia iran ye odẹ ẹmwata, zẹ vbene iwinna ugamwẹ mwa ma emwa ẹre.

² Idaehọ ẹfe etẹbitẹ ọre a hẹnhẹn ọẹn yan, Osanobua ne ẹ i ta ohoghe, ọ re ọ ve ima arrọọ na, vbe ẹghẹ te do suẹn,

³ ọ ghi vbe sẹ ẹghẹ ne ọ kei yi, ọ keghi gie uhunmwu ya ta ẹe ladian ne ima họn. Ọnọna ọre a mu yọ mwẹ obọ, vbene Osanobua Ọmiọnmwafan mwa gie, ọ re I ta ẹe khian.

⁴ I gbẹn ebe gie Taitọs ne ovbi mwẹ ne ovbi mwẹ vbe ekpa iyayi ne ima gba yaẹn. Osanobua ne Erha kevbe Kristi ne Ọmiọnmwafan mwa ne ọ rhie ẹsọhẹ kevbe ọfumwegbe nuẹn.

Iwinna Taitọs Vbe Kret

⁵ Te I sẹ uẹ rae vbe Kret ne u miẹn ehe na dọlọ avbe emwi ne a ma he ru fo vbe evba nii yi, kevbe ne u vbe gha zẹ ediọn esọsi ye dọmwadẹ esọsi. U ghi yerre vbene I ta ẹe hẹ:

⁶ ọ kere ne ọmwa ne ọre ọdiọn gha re ne ẹ i mwẹ abaku ru, okhuo ọkpa ọre ọ kere ne ọ gha mwẹ, ivbiẹre ghi vbe gha re emwa ni yayi, ẹ i re ne a ta ẹmwẹ ọnrẹn khian wẹ iran wa kan ye ẹvbo ra ne ẹ i họn ẹmwẹ.

⁷ Rhunmwuda, ugbẹn vbe a miẹn wẹ, rẹn ọrọre ne ọ gbe aro ghe iwinna Osanobua, ọ kere ne ọkaolotu esọsi gha re ne ẹ i mwẹ abaku ru. Ọma kei ne ọ gha re ọmwa ne ọ tọn egbe mu, ra ne egbe balọ, ra ne ọ da ayọn gbe egbe, ra ọmwa ne ọ khọọ ra ne ọ zuan.

⁸ Ọ kere ne ọ gha re ọmwa ne obọ ẹse tọlọ, kevbe ne emwi ne ọ maa yẹẹ, ọ ghi gha re ọmwa ne ọ rẹn enegbe, ne ọ mudia ẹse, ne ọ huanrẹn, kevbe ne a ma ẹre emwi.

⁹ Ọ ghi gha re ne ọ yobọ da ẹmwẹ nii yi gbangbaangban, ẹmwẹ nii ne ọ gia mu ẹtin yan kevbe ne ọ gu iruẹmwi nii ro. Odẹ vberriọ ọre ọ gha na sẹtin ye iruẹmwi ẹmwata nii, rhie igiẹdu ne emwa ọvbehe, ọ ghi vbe sẹtin rhie ehe ne iran ni gbe odan yọ na ba odẹ ku, ma agbọn.

¹⁰ Rhunmwuda emwa ni bun ọre ọ sọtẹ, iran ghi vbe gha ya ẹmwẹ nọ ma khian rẹn iran, rẹrẹ emwa ọvbehe, kpataki iran ne a fi ẹre ekhọe werriẹ hin ugamwẹ avbe Ju nẹdẹ rre.

¹¹ Ọ kere ne a da iran obọ ẹmwẹ ne iran guan yi, rhunmwuda, igiowa ni bun ọre iran ye emwi ne ọ ma te kei ne iran ma emwa ẹre, gbe sẹ otọ, ba ẹmwẹ emwiekhue wẹ, te iran gualọ igho.

¹² Kretan ne ọre ọkpa vbe uwu avbe akhasẹ iran ọre ọ ta ẹe wẹ, “Emwa Kret re emwa nii ta ohoghe vbe ẹghẹ hia, aranmwẹ dan ni khọ kevbe emwa oregbe ne obọ ẹ i ru i re ọre iran khin.”

¹³ Ẹmwata ọre ẹmwẹ ne ọ tae khin, rhunmwuda ọnii, u ghi gha kakabọ gu iran gui ye abakuru iran, ne iran miẹn ehe na gha mwẹ iyayi ne egbe rran rẹn.

¹⁴ Ne iran ghẹ gha lele umaranmwẹ avbe Ju, kevbe iyi ne emwa ne agbọn yi, ne ọ ke obọ iran ni fi iyeke gbe ẹmwata rre.

¹⁵ Emwi hia ọrọre ne ọ huanrẹn vbe obọ emwa ne iran tobọ iran vbe huan, sokpan a i miẹn emwi ọkpa ne ọ huanrẹn vbe obọ iran ne a ru ẹre awua mu rhia kevbe ne ẹ i mwẹ iyayi, rhunmwuda a ru orhiọn kevbe ekhọe iran awua mu ẹn rhia nẹ.

¹⁶ Iran ghi gha ye unu kha ighẹ iran rẹn Osanobua, sokpan uyinmwẹ iran ghi gha kha ighẹ ohoghe nọ. Iran ghi vuọn ne ẹkokhọmwẹ, iran i họn ẹmwẹ, iran i vbe sẹtin ru emwi ne ọ maa rhọkpa.