Ebe ne Pọl gbẹẹn gie emwa Rom 9 - Edo Bible (E Baibol Ẹdo) Version 1996

Osanobua Kevbe Emwa Rẹn Ne Ọ Hannọ Zẹ

¹ Ẹmwẹ ne I ta ẹe, ẹmwata nọ, ọghe Kristi mẹ khin, I ma ta ohoghe. Ekhọe mwẹ ne Orhiọn Ne Ọ Huanrẹn khaemwisẹ yan, vbe tama mwẹ wẹ ẹ i re ohoghe ọre I ta.

² U miẹn vbene I khiẹ hẹ, u miẹn vbene ekhọe mwẹ vuọn ne orriara ne ẹ i fo hẹ rhunmwuda emwa mwẹ ne ima gba re egbe ọkpa kevbe esagiẹn ọkpa.

³ Vbe ọrrọ akpawẹ mẹ khian ne Osanobua fi ẹre unu kevbe ne a wannọ hin egbe Kristi rre rhunmwuda iran.

⁴ Emwa ne a hannọ zẹ ọghe Osanobua ọre iran khin. Ọ ya iran ye emọ, ọ keghi vbe ghae ne iran vbe uwu uyi ẹre. Ọ gu iran ta ile, ọ na rhie nene uhi ne iran. Iran ọ re ọ rẹn vbene a ya ga hẹ vbe ẹmwata. Iran ọ re Osanobua vbe ve ẹre emwi.

⁵ Uniẹn avbe erha nikaro iran khin, a gha ta ẹmwẹ Kristi zẹ vbe ọmwa kẹkan, uniẹn iran nii vbe nọ. Osanobua ne ọ kha yan emwi hia ọre a gha rho ẹdẹdẹmwẹdẹ! Isẹ.

⁶ Ẹ i re te I khare ighẹ emwi ne Osanobua ve firaa nẹ, rhunmwuda ẹ i re ivbi Izrẹl hia ọre ọ wa re emwa ne Osanobua hannọ zẹ.

⁷ Erriọ vbe nọ, ẹ i re ivbi uniẹn Ebraham hia ọre ọ vbe re ivbi Osanobua, rhunmwuda Osanobua tama Ebraham wẹẹ, “Ivbi uniẹn Aizik ọkpa ọre a gha ka ye ọwuẹ.”

⁸ Ọna rhie maa wẹ emọ ne a biẹ ẹe zẹ vbene a biẹ ọmwa kẹkan, iran i re ivbi Osanobua, sokpan iran ne a biẹ ẹe rhunmwuda ighẹ Osanobua ọre ọ ve emwa re, ọre a ka ye ivbi eseserese.

⁹ Rhunmwuda vbene Osanobua ya vẹe ọre ọna khin wẹẹ, “Ọ gha sẹ ẹghẹ ne ọ ke yi, I gha dọlegbe rre, Sera gha biẹ ọmọ okpia.”

¹⁰ Ẹ i re erriọ ọ sẹe. Ivbi e Ribẹka eva, erha ọkpa ọre ọ biẹ ẹe iran, ọnii nọ wẹẹ, Aizik ne erha mwa odede.

¹¹ Sokpan, ne a miẹn ehe na miẹn wẹẹ, ne a na zẹ ọkpa vbe uwu emọ nii ighẹ vbene Osanobua mwamwaẹn nọ, Osanobua keghi tama rẹn wẹẹ,

¹² “Nọdiọn ọre ọ khian gha ga e nekherhe.” Ọ ta ẹmwẹ na nẹ a ke do biẹlẹ iran, vbe iran ma he ru emwi rhọkpa, ọ maa ra ọ khọọ, ọnii rhie maa wẹ ọmwa ne Osanobua hannọ zẹ, rhunmwuda ighẹ ọ tie ẹre, ọre nọ ighẹ ẹ i re rhunmwuda emwi ne iran ru.

¹³ Zẹ vbene ebe tae, “Ẹmwẹ Jekọb yẹ mwẹ, sokpan ohu Isọ mu mwẹ.”

¹⁴ Vbe a ghẹ ghi tae hẹ yi khekherriọ? Wẹ Osanobua i ru emwi ẹmwata ra? Hiehiere!

¹⁵ Rhunmwuda rẹn tama Mosis wẹẹ, “Ọmwa ne ọ khaemwisẹ ọre I ra tohan rẹn, ọmwa ne ọ khaemwisẹ ọre I ra lekhue ẹre.”

¹⁶ Ọnii rhie maa khekherriọ wẹ ẹ i zẹdẹ re obọ vbene ọmwa họ, ra emwi ne ọmwa ru, sokpan obọ itohan Osanobua ọre ọ ye.

¹⁷ Rhunmwuda ebe tama Fero wẹẹ, “Emwi ọre ọ zẹẹ ne I na ya a ma ọba, ne I miẹn ehe na la egbe ruẹ rhie ẹtin mwẹ ma an, kevbe ne I miẹn ehe na ya eni mwẹ khian ne a rẹnrẹn vbe uhunmwu otọ agbọn hia.”

¹⁸ Ọnii rhie maa khekherriọ wẹẹ, ọmwa ne ọ khọn Osanobua ọre ọ tohan rẹn, ọ ghi vbe ya ne ọ khọn rẹn ze vbe ẹkoko udu.

Itohan Kevbe Izohu Osanobua

¹⁹ Emwa eso vbe uwu uwa gha kha nian wẹẹ, “A deghẹ vberriọ ọre ọ ye, vbe Osanobua ghi na vbe gualọ ọmwa ẹmwẹ ne unu hẹẹ. De ọmwa ne ọ gha sẹtin wẹ ne ọ ghẹ ru emwi ne ọ rre ọre ekhọe yi?”

²⁰ Sokpan, vbe uwẹ a ke rre yi ọse mwẹ ne ọ zẹ azẹ wanniẹn ma Osanobua? Akhe vbe nọ ọmwa ne ọ maẹn wẹẹ, “Vbua na ma mwẹ vbenian hẹ yi?”

²¹ A rẹnrẹn ighẹ ọmakhe sẹtin ya obuẹ ma emwi ne ọ khọn rẹn, ọ sẹtin fian vbe obuẹ ọkpa nii ya ma akhe ọpuẹkẹ ra ọghe aghanghan.

²² Erriọ emwi ne Osanobua ru wa vbe ye zẹẹ. Ọ ho ne ọ rhie ohu ẹre maa kevbe ne ọ vbe rhie iwegbe ẹre ladian ne a miẹn. Ọ keghi wa kakabọ ziengbe ya mu ẹmwẹ iran ne ohu ẹre muẹn woo egbe, emwa ne ọ te kei ne a rẹnkhẹn uan.

²³ Ọ keghi vbe gha ho ne ọ rhie ẹre ne a miẹn ighẹ ukpọlọmwẹ uyi ẹre ne ọ tue yan ima ne ọ wẹ ne irẹn tohan rẹn, ma ne ọ hannọ ye otọ nẹ ne uyi ẹre sẹ ima obọ.

²⁴ Rhunmwuda ma na ọrọre emwa ne irẹn tie ẹre ẹ i re vbe uwu avbe Ju ọkpa sokpan kevbe uwu iran ne ẹ i re Ju bare.

²⁵ Rhunmwuda ẹmwẹ ne ọ tae vbe ebe Hosia ọre ọ na khin wẹẹ, “Emwa ne ẹ i te re emwa mwẹ ‘I gha tie iran emwa mwẹ,’ Okpẹvbo ne I ma te ho ẹmwẹ ọnrẹn, I gha tie ẹre ‘Ne ẹko mwẹ rhiẹnrhiẹn ghe.’

²⁶ Ihe ọkpa nii ne a na tae zẹẹ wẹ, ‘Wa i re emwa mwẹ,’ ọre a gha na tie iran ivbi Osanobua ne ọ rrọọ.”

²⁷ Aizaia keghi vbe kha vbekpa Izrẹl wẹẹ, “Ọ gha khọn rẹn ne ivbi Izrẹl gha ye vbe ikpekhae ni rre ọkpẹn okun, ibozẹghẹ ọre a ra miẹnfan vbe uwu iran.

²⁸ Rhunmwuda Nọyaẹnmwa ra do tae rhuan ne ọ vbe mu ẹmwẹ agbọn na ye vbe ne ọ ra mu ẹn yi ẹgiẹgiẹ.”

²⁹ Te ọ ye vbe ẹmwẹ ne Aizaia ka vbe ta yi wẹẹ, “Akpawẹ ẹ i re ne Nọyaẹnmwa Oghodua na sẹ rae ne ima vbe ivbi uniẹn mwa, ma ghẹ ghi do ye vbe Sọdom, ma ghẹ gha ye vbe Gomorra.”

Ivbi Izrẹl Kevbe Iyẹn Ne ọ Maa

³⁰ Vbe ima a ghẹ ghi tae hẹ yi? Vbe nian, wẹ emwa ne ẹ i re Ju, ni ma zẹdẹ hia ne iran gu Osanobua dọlọ kugbe, keghi do khian ne iyayi dọlọ kugbe ba ẹre.

³¹ Vbe rriọ, iran na hannọ zẹ ni gha gualọ uhi ne ogha dọlọ iran kugbe ba Osanobua, keghi baeku.

³² Vbe ọ zẹ yi? Rhunmwuda, vbe emwi ne iran gha ru, iran ma hẹnhẹn egbe yan iyayi, sokpan iran keghi mu ẹtin yan iwinna obọ iran. Iran keghi ya rrua ọwẹ vbe “Okuta ne ọ rrua ọmwa owẹ.”

³³ Ne ebe ta ẹmwẹ ọnrẹn wẹẹ: “Ghe, I mu okuta ne ọ rrua ọmwa owẹ ọkpa ye Zaiọn okuta nọkhua ne ọ gha rrua iran gbe otọ. Sokpan ọmwa ne ọ mu ẹtin ya rẹn, ẹ i ra gbe I ma rẹn.”