Ebe ne Pọl gbẹẹn gie emwa Rom 7 - Edo Bible (E Baibol Ẹdo) Version 1996

Igiemwi Ọghe Orọnmwẹ

¹ Vbe ne ẹmwata, wa hia rẹn otọ ẹmwẹ ne I ra ta na etẹn mwẹ, rhunmwuda wa hia ọre ọ rẹn uhi, ẹghẹ ne ọmwa na rre agbọn ọre uhi na mwẹ ọdakha vbe uhunmwu ẹnrẹn.

² Vbe igiemwi, okhuo ne ọ rọnmwẹ ọdọ nẹ, uhi de ẹre ginna ọdọ ẹre vbe okpia ni a gha rre agbọn, sokpan a deghẹ okpia ni wu, ẹghẹ ni, a rhan okhuo nii hin obọ uhi ne ọ te dẹ ẹre ginna ọdọ ẹre rre.

³ Ọnii nọ wẹ, okhuo nii gha bu okpia ọvbehe vbe ọdọ ẹre he rre agbọn, a ghi kha wẹ okhuo ne ọ ghẹre nọ, sokpan a deghẹ ọdọ ẹre wu, ẹghẹ nii, egbe ẹre ọre okhuo ni ghi gue, zẹ vbene uhi khare, a deghẹ ọ ghi rọnmwẹ ọdọ ọvbehe, ọ ma ghi ru oghẹe.

⁴ Vbe nian ọre ọ ye vbe egbe uwa, etẹn mwẹ. Zẹ vbe emwi ni la ghe odẹ ọghe nene Uhi, wa wulo nẹ, rhunmwuda, efẹn ọkpa vbe egbe Kristi ọre uwa khin. Banbanna nian, ọmwa ne a huẹn kpaegbe vbe idin ọre ọ ghi yan uwa, ne ima miẹn ehe na gha re ne ẹdẹ agbọn rẹn mwẹ esa ne ọ ye vbe ohọ Osanobua.

⁵ Rhunmwuda, ẹghẹ ne ima na gha ru vbene ọ khọn ikinnegbe mwa, avbe emwi orukhọ ne nene Uhi gi ẹe gha viẹn ye ọmwa aro, keghi ya ima winna ẹsẹse ne uwu.

⁶ Vbene ọ rhirhi gha ye hẹ, vbe banbanna nian, ma i ghi rre obọ nene Uhi, rhunmwuda, ma wulo hin emwi ne ọ te ka munọ ima zẹ vbe oghunmwu yi, rre nẹ. ma i ghi lele oba uhi nẹdẹ ne a gbẹnnẹ ye otọ ru emwi, sokpan, ọ ghe odẹ ọgbọn ne Orhiọn khare.

Uhi Kevbe Orukhọ

⁷ Vbe a ghẹ ghi ta ẹ hẹ yi khekherriọ? We nene Uhi tobọ ẹre ighẹ emwi orukhọ nọ ra? Hiehie re. sokpan nene Uhi ọre ọ ma mwẹ emwi ne ọ re orukhọ, rhunmwuda mẹ i ghẹ te rẹn emwi ne ọ re a ya aro ye emwi ẹrrẹ, akpawẹ nene Uhi ma kha wẹẹ, “Ghẹ ye aro ye emwi ẹrrẹe.”

⁸ Orukhọ keghi miẹn ehe la la mwẹ egbe vbe ne ọ ghi na rhie uhi mwẹ obọ do gha kpikpi mwẹ ne I gha ye aro ye emwi ẹrrẹe vbe odẹ ni bun ughughan. Rhunmwuda, akpawẹ uhi i rrọọ, emwi ne ọ wu ọre orukhọ khin.

⁹ Mẹ tobọ mwẹ ka gha rre agbọn yi vbe ne uhi i na rre evba, sokpan, a ghi yi uhi nẹ nian, orukhọ keghi rhiọrre, mẹ na ghi wu.

¹⁰ Uhi ne a te yi wẹ ne ọ do ya emwa gha rre agbọn, ọ ghi sẹ egbe mwẹ, ọ keghi gbe mwẹ uan.

¹¹ Rhunmwuda, orukhọ keghi miẹn ehe la la mwẹ egbe, ọ na rhie uhi mwẹ obọ gha rẹrẹ mwẹ, nene uhi nii ọre orukhọ ya gbe mwẹ uan.

¹² Nene Uhi tobọ ẹre, emwi ne ọ huanrẹn nọ, emwi ne ọ huanrẹn ọre iyi ne a yi vbe khin, ọ vbe kei, ọ vbe maa.

¹³ Ọnii rhie maa wẹ, te emwi ne ọ ma ghi gbe mwẹ uan ra? Hiehiere. Orukhọ ọre ọ ruẹe. Orukhọ keghi ya rhie emwi ne ọ maa mwẹ obọ, ya rhie uwu bu mwẹ gha dee, ne vbene ọ ye hẹ ne a na gha tie ẹre orukhọ, miẹn ehe na vẹ ne agbọn rẹn. Erriọ a miẹn ọẹn wẹ uhi ọre ọ ghi ruẹe, ne orukhọ na dọlegbe khian ne ọ kakabọ re orukhọ sẹ ayọ.

Osuan Ne Ọ Rre Uwu Ọmwa

¹⁴ Ma rẹnrẹn wẹ emwi orhiọn ọre Uhi khin, sokpan, ọmwa ne ọ sẹtin wu mẹ khin, ne a vbe khiẹn ọre ọviẹn ne orukhọ.

¹⁵ Me ma rẹn vbene I ru emwi hẹ rhunmwuda ẹ i re emwi ne ọ rrọ mwẹ ekhọe ne I ru ọre I gele ru, sokpan emwi ne ọ sọnnọ mwẹ ọre I ru.

¹⁶ A deghẹ ẹ i re emwi ne ọ rrọ mwẹ ekhọe ne I ru, ọre I gele ru, ọnii rhie maa ighẹ mẹ rhie obọ yọ wẹ nene uhi gbae.

¹⁷ Ọnii rhie maa wẹẹ ẹ i re imẹ ọre ọ wa ru avbe emwi na, sokpan orukhọ ne ọ rre uwu imẹ ọre ọ ruẹe.

¹⁸ Mẹ rẹnrẹn wẹ, emwi ne ọ maa rhọkpa i rre uwu imẹ, vbe ikinnegbe mwẹ kẹkan na, rhunmwuda, a gha rhe miẹn wẹ emwi ne ọ maa te yẹ mwẹ ne a ru, sokpan ẹ i gun mwẹ ru.

¹⁹ Mẹ i sẹtin ru emwi ne ọ maa ne I te ho ne I ru, sokpan emwi dan ne ẹ i te khọn mwẹ ne I ru ọ re I ru.

²⁰ Adeghẹ emwi ne ẹ i khọn mwẹ ne I ru ọre I ru, ọnii rhie maa khekherriọ wẹ ẹ i re imẹ ọre ọ ru ẹe, sokpan, orukhọ ne ọ rre uwu imẹ nọ.

²¹ Mẹ keghi do miẹn wẹ, emwi ne ọ sunu ọrọre wẹ, mẹ gha wẹ ne I ru emwi esi, emwi dan ọkpa ọre ẹtin mwẹ sẹ.

²² Sokpan otọ ẹko mwẹ ghi gha sẹ ọyẹnmwẹ ye uhi Osanobua.

²³ Sokpan emwi ọvbehe ọre ọ sunu vbe ikinnegbe mwẹ, ọnii nọ wẹ, emwi ne ọ gu emwi ne ekhọe mwẹ ye obọ yi gbinna, ọ keghi do ya mwẹ khian oghunmwu emwi orukhọ ne ọ zẹ evbọguẹe ru vbe ikinnegbe mwẹ.

²⁴ Ọ sẹ mwẹ sẹ egbe mwẹ! Gha ọ ghi ra fan mwẹ hin obọ ikinnegbe ne ọ si mwẹ khian ya rhie gbe ua na?

²⁵ Ekpọnmwẹ nọ ne Osanobua, vbekpa Nọyaẹnmwa Jesu Kristi. Vbene ọ ye mwẹ hẹ ọre ọna khin: vbe ọghe obọ mwẹ, ekhọe mwẹ ọkpa ọre I ya ru vbene Osanobua kha re, vberriọ ikinnegbe mwẹ, vbene orukhọ kha re, ọre ọ ru.