Ebe ne Pọl gbẹẹn gie emwa Rom 6 - Edo Bible (E Baibol Ẹdo) Version 1996

A Wu Hin Orukhọ, A Rrọọ Vbe Ekpa Kristi

¹ Vbe ima ghẹ ghi kha hẹ yi khekherriọ. Te ima ghẹ ghi gha kakabọ ru orukhọ yọ ra ne ẹse ọhẹ Osanobua miẹn ehe na gha muan yọ?

² Hiehiere. Ma wu hin orukhọ rre nẹ, vbe a ghi ra na vbe dọlegbe gha yin uyinmwẹ ọnrẹn hẹ?

³ Wa ma rẹn ra ighẹ, ẹghẹ ne a na sa amẹ ne ima ba Kristi Jesu, ighẹ te a sa amẹ ne ima kugbe ba uwu ne ọ wu.

⁴ Vbe ekpa ne a na sa amẹ ne ima, te a re ima ba irẹn, ma keghi vbe ghae vbe uwu ne irẹn wu, wẹ vbene a huẹn Jesu kpao vbe orinmwi vbe ekpa ẹtin Uyi ọghe Evbavba, erriọ zẹẹ ọre ima gha vbe gha rrọọ vbe uyinmwẹ ọgbọn.

⁵ Rhunmwuda, a deghẹ ma do khian ọkpa deba irẹn vbe ekpa ne ima na wu vbene irẹn wu, erriọ zẹẹ vbe nọ, ma gha khian ọkpa yaba irẹn vbe ekpa ne a gha na huẹn ima kpaegbe vbene a vbe huẹn irẹn kpaegbe.

⁶ Rhunmwuda, ma rẹn ọnọna wẹ a gbe emwi ne ima te khin uan nẹ ba Kristi vbe uhunmwu ugbugbe ẹre, ne a miẹn ehe na fuẹn uan ighẹ ẹtin egbe nọ re ọghe orukhọ, ne ima ghẹ gha re ọviẹn orukhọ ọvbehe.

⁷ Rhunmwuda, ọmwa gha wu nẹ, a faẹn ye otọ hin obọ ẹtin orukhọ rre.

⁸ Deghẹ ma deba Kristi wu, ma yayi ighẹ ma gha vbe guee gha rrọọ.

⁹ Rhunmwuda ma rẹnrẹn ighẹ a huẹn Jesu kpao vbe idin rre nẹ, ẹ ghi wu ọvbehe, uwu i ghi mwẹ ẹtin vbe uhunmwu ẹnrẹn ọvbehe.

¹⁰ Uwu ne ọ wu, te ọ wu ẹe hin orukhọ rre uhukpa ni fẹẹrẹ. Arrọọ ne ọ ghi rrọọ na nian, Osanobua ọre ọ ghi rrọọ na.

¹¹ Erriọ zẹẹ ọre uwa vbe gha ka egbe uwa ye ni wulo hin orukhọ rre nẹ, sokpan ni rre agbọn ne Osanobua, yaba Jesu Kristi.

¹² Ọ ma kei ne orukhọ gha khaemwisẹ yan ikinnegbe uwa ne ọ gha he wu na ọvbehe, ne uwa ghẹ ghi gha ru vbe ne ikinnegbe uwa kẹkan ho.

¹³ Ra ne uwa vbe fan obọ egbe uwa rhọkpa ne orukhọ, ne a gha lo ẹre ye odẹ ọkhọ, sokpan wa fan obọ egbe uwa ne Osanobua zẹ vbe emwa ne a viọ ke uwu ladian la ẹfe nẹ, wa ghi zẹ egbe uwa hia obọ nẹẹn, ne ọ gha lo ẹre ye odẹ ẹmwata.

¹⁴ Rhunmwuda, ọ ma kei ne orukhọ gha khaemwisẹ yan uwa, wa i rre ototọ uhi, ighẹ ototọ ẹsọhẹ ọre uwa ye.

Eviẹn Emwi Ẹmwata

¹⁵ Vbe a ghi ta ẹe hẹ nian? Te ima ghẹ ghi gha ru orukhọ ra rhunmwuda ighẹ ma i rre ototọ uhi, ighẹ ototọ ẹse ọhẹ Osanobua ọre ima ye? a wua.

¹⁶ Rhunmwuda, wa rẹnrẹn wẹ, wa gha zẹ egbe uwa obọ zẹ vbe eviẹn, ne uwa gha ru vbe ne ọmwa ọkpa kha re, eviẹn arowa ne uwa ru vbene ọ kha re ni, ọre uwa gele khin vbe ọ ghe ẹmwata, ọ sẹtin gha re orukhọ ne a miẹn wẹ uwu ọre ọ ke ẹre ikian, ra a họn ẹmwẹ ne a do gha la ekpa ẹre ka ọmwa ye ọmwata vbe odaro Osanobua!

¹⁷ Rhunmwuda, vbe ẹghẹ ọkpa, eviẹn orukhọ ọre uwa te gha khin, sokpan vbe ne a ghi ye na nian, ekhọe uwa hia ọre uwa ghi ya ru zẹ vbene ẹmwata ne ọ rre uwu emwi ne a ma uwa ẹre khare.

¹⁸ A fannọ uwa hin obọ orukhọ rre nẹ, wa ke do gha re eviẹn emwi ni re emwi ẹmwata.

¹⁹ I ta ẹe vbene a wa ya guan kẹkan, rhunmwuda, wa ma he wegbe vbe oghẹ vbene a yi uwa hẹ. Vbe ẹghẹ ọkpa yi, wa ke wa zẹ egbe uwa obọ fẹẹrẹ zẹ vbe eviẹn ne emwi iruẹn kevbe ekhọe dan, ne a miẹn ehe na gha ru emwi dan. Vbe odẹ vberriọ zẹ, wa vbe zẹ egbe obọ fẹẹrẹ nian, zẹ vbe eviẹn emwi ẹmwata ne a ya gha ru emwi ne ọ huanrẹn.

²⁰ Ẹghẹ ne uwa na gha re eviẹn orukhọ, emwi ẹmwata ma gha mwẹ obọ vbe egbe uwa.

²¹ Sokpan, de ere ne uwa ghi miẹn re vbe ne uwa na gha ru avbe emwi ni ne ekhue ẹre ghi mu uwa ẹghẹ na? Uwu ọre ọ ke avbe emwi ni ikian.

²² Sokpan, banbanna nian, a fannọ uwa hin obọ orukhọ rre nẹ, eviẹn Osanobua ọre uwa ghi khin nian, rhunmwuda ọnii ẹdẹ agbọn uwa keghi re ne a ya fiohan nẹẹn, vbe okiekie, wa ghi do gha mwẹ ẹfe ne ẹ fo.

²³ Rhunmwuda, uwu ọre orukhọ ya ha osa. Sokpan ẹse ọhẹ Osanobua keghi re ẹfe arrọọ, vbe ayegbe ba Jesu Kristi Nọyaẹnmwa.