Ebe ne Pọl gbẹẹn gie emwa Rom 5 - Edo Bible (E Baibol Ẹdo) Version 1996

A Gu Osanobua Mudia Ẹse

¹ Vbene a ghi na miẹn wẹ a la ekpa iyayi ya ima khian emwa ni gu Osanobua mudia ẹse, te ima ghi mwẹ ọfumwegbe vbe ehe ne Osanobua ye vbekpa Nọyaẹnmwa Jesu Kristi.

² Rẹn keghi ye iyayi viọ ima gha die uwu ẹse ọhẹ Osanobua, ehe ne ima ghi mudia yi na. Rhunmwuda ọnii nian, te ima ghi ghọghọ vbe idanwehọ wẹ ma gha ghae vbe uwu uyi ọghe Osanobua.

³ Ma ghi vbe gha ghọghọ vbe uwu ọlọghọmwa, rhunmwuda ọlọghọmwa ọre ọ biẹ i ziengbe,

⁴ i ziengbe ọre a ya rri ase vbe obọ Osanobua, arriase ọghọe ọre ọ rhie idaehọ ne ọmwa.

⁵ Idaehọ na ẹ i hiẹ ọmwa, rhunmwuda Osanobua tue ahoẹmwọmwa ẹnrẹn ye ima ekhọe nẹ vbekpa Orhiọn Ne Ọ Huanrẹn ne Osanobua ya ru ima ẹse.

⁶ Rhunmwuda, uhin vbe uwu ẹghẹ ne ima i na mwẹ iyobọ, Kristi wu ne emwa dan vbe ọ sẹ ẹghẹ ne Osanobua rhie yọ.

⁷ Emwi ne ọ lọghọ nọ ọmwa te do wu ba ẹmwẹ ọmwa ne ẹ i ba emwi ku ru. Ughaghe a ghi miẹn ọmwa ne ọ gha sẹtin wu ne ọmwa esi.

⁸ Sokpan Osanobua rhie ma ima nẹ vbene irẹn kakabọ ho ẹmwẹ mwa sẹ hẹ ẹghẹ ne ima na gha re emwa orukhọ ọre Kristi na wu ne ima.

⁹ Uwu ẹre a ghi ya dọlọ ima kugbe ba Osanobua, wẹ ma ghi la evba rẹn wẹ, ẹ i mwẹ ọ ma miẹn ima fan vbe obọ izohu Osanobua.

¹⁰ Eghian Osanobua ọre ima te gha khin, sokpan rẹn keghi la ekpa uwu ovbi ẹre ya ima khian ọse ẹre. Vbe ne a ghi na miẹn na ighẹ ọse Osanobua ma ghi khin, u ma rẹn ẹ i mwẹ ọ ma ye arrọọ ọghe Kristi miẹn ima fan.

¹¹ Sokpan ẹ i re erriọ ọ sẹe, te ima ghi sẹ ọyẹnmwẹ vbe uwu Osanobua vbe ekpa Nọyaẹnmwa Jesu Kristi ne ọ ya ima khian ọse Osanobua.

Adam Kevbe Kristi

¹² Obọ orhiọnkpa kẹkan ọre orukhọ la la agbọn, orukhọ keghi rhie uwu mwẹ obọ gha dee. Emwi ne ọ ghi ke ẹre ikian ọrọre wẹ uwu keghi sẹ egbe emwa ni rre agbọn na hia, rhunmwuda ighẹ ima hia ọre ọ ru orukhọ.

¹³ Orukhọ ka rre agbọn nẹ a ke do rhie nene Uhi rre, sokpan ugbẹn vbe a miẹn wẹ uhi i rrọ, a ma vbe gha ka orukhọ ye ọmwa urhu.

¹⁴ Sokpan ke ẹghẹ Adam gha dee do sẹ ẹghẹ Mosis, uwu keghi mu yan emwa hia, ya sẹ egbe avbe emwa ne ọ ma ru khọ zẹ vbene Adam rukhọ vbekpa ne ọ ma na ru vbene Osanobua kha re. Adam keghi re emwi ne a ya gie ọmwa ne ọ dee.

¹⁵ Sokpan iran eva i re ọkpa, rhunmwuda ẹse ọhẹ Osanobua, ma khọ orukhọ Adam. Ẹmwata nọ wẹẹ emwa ni bun ọre ọ ya uhunmwu ye ẹmwẹ orukhọ ne orhiọnkpa kẹkan ru, sokpan ẹsọhẹ Osanobua kpọlọ sẹ ọre ẹsẹse, erriọ vbe nọ vbe ọghe emwi ọhẹ ne ọ viọ ne emwa ni bun vbekpa ẹsọhẹ ọmwa ọkpa kẹkan ni, Jesu Kristi.

¹⁶ Alughaẹn vbe rrọọ ne emwi ne Osanobua ya ru ọmwa ẹse kevbe orukhọ orhiọnkpa. Orhiọnkpa ghi ru orukhọ nẹ, a keghi bu ohiẹn wẹ, “Ọ rri abe” sokpan vbe iyeke orukhọ ni bun ọre a na miẹn ọhẹ, “Ọ ma rri abe” rhie vbe nọ ma na khẹ ke ọmwa.

¹⁷ Ẹmwata nọ wẹẹ, vbe ekpa orukhọ ne orhiọnkpa kẹkan ru, uwu keghi hin ẹkete dia rhunmwuda orhiọnkpa nii. Sokpan u ma miẹn ọrhẹnrhẹn emwi ne a lae miẹn ighẹ emwi ne Jesu Kristi ne orhiọnkpa kẹkan ru, ya kpọlọ sẹ. Iran hia ne ẹse ọhẹ ne wọrhọ ọghe Osanobua sẹ ọre obọ, deba ọmwa ẹmwata ọghọe ne ọ ya ru ọmwa ẹse vbe ọhẹ, gha la ekpa Kristi gha khaemwisẹ vbe arrọọ.

¹⁸ Zẹ vbene orukhọ ya emwa hia rri abe, erriọ vbe nọ, emwi ẹmwata ọkpa ne a ru keghi vbe fannọ emwa hia ye otọ, ọ keghi vbe rhie arrọọ ne iran.

¹⁹ Zẹ vbene iyin ehọ orhiọnkpa ya emwa hia khian emwa orukhọ, erriọ zẹẹ ọre ahọn ẹmwẹ ọghe ọrhiọnkpa gha vbe ya emwa hia khian emwata vbe odaro Osanobua.

²⁰ Te a mu Uhi rre, ne abaku ru miẹn ehe na bun sẹ ayọ, sokpan ehe ne orukhọ na do bun sẹ ayọ, ẹsọhẹ Osanobua ghi ye vbe bun sẹ ayọ sẹ ọre.

²¹ Erriọ vbe nọ, zẹ vbene orukhọ gha ya uwu khaemwisẹ, erriọ zẹẹ ọre ẹsọhẹ Osanobua vbe ya ẹmwata gha khaemwisẹ, ọ ghi gha su ima rrie arrọọ ẹtẹbitẹ vbekpa Jesu Kristi Nọyaẹnmwa.