Ebe ne Pọl gbẹẹn gie emwa Rom 4 - Edo Bible (E Baibol Ẹdo) Version 1996

Igiemwi Ebraham

¹ Vbe ima gha kha hẹ khekherriọ vbe ekpa ọghe Ebraham ne erha mwa odede? Vbekpa emwi ne ọ sunu vbe egbe ẹre.

² Akpawẹ avbe emwi ne ọ ru ọre a ya kae ye ọmwata vbe odaro Osanobua, rẹn gha miẹn emwi ne ọ gha ya gha rhuọ. Sokpan rẹn i sẹtin rhuọ vbe odaro Osanobua.

³ Ebe kha re wẹẹ, “Ebraham ya Osanobua yi, rhunmwuda iyayi ẹre, Osanobua keghi kae ye ọmwata.”

⁴ Ọmwa gha winna, a ghi ha ẹre osa, igho ne ọ miẹn rẹn, a i kha ighẹ te a ya ẹe ru ẹre ẹse, sokpan emwi ne ọ khuẹn nọ.

⁵ Sokpan, ọmwa ne ọ ma mu ẹtin yan iwinna, ọ kegha mwẹ iyayi, ọ na hẹko mu ẹtin yan Osanobua ne ọ ye ne ọ rri abe khian ne ọ ma rri abe, iyayi ẹre ọre Osanobua ghe re ne ọ na ya ẹe khian ọmwata vbe odaro ẹre.

⁶ Ọnọna ọre Devid kha ẹghẹ ne ọ na guan vbekpa ọyẹnmwẹ ọmwa ne Osanobua ka ye ọmwata vbe ne ọ ma na ghe emwi ne ọ ru:

⁷ “Ọ ma kan iran ne Osanobua ya orukhọ bọ, iran ne ọ gbe gue na!

⁸ Ọ ma kan iran ne Osanobua i ka orukhọ ye ọre urhu.”

⁹ Oghogho ne Devid kha na, ọghe iran ni rhuẹre ọkpa nọ ra kevbe ọghe iran ni ma rhuẹ nọ? Hiehiere, ọghe iran ni ma rhuẹ ọre vbe nọ. Ma ka tie ẹre ke uwu ebe ladian wan wẹẹ, “Ebraham ya Osanobua yi, Osanobua keghi ka ẹe ye ọmwata rhunmwuda iyayi ẹre na.”

¹⁰ De ẹghẹ ne emwi na ya sunu yi? Vbe Ebraham rhuẹ nẹ nọ ra vbe ọ ma he rhuẹ? Vbe ọ ma he rhuẹ nọ ighẹ ẹ i re vbe ọ rhuẹ nẹ.

¹¹ Okiekie ọre a ghi do ya rhuẹ ọre. Arhuẹ ne ọ rhuẹre keghi re ne a ya rhie maa wẹ ẹghẹ ne Ebraham ma na he rhuẹ Osanobua ka ẹe ye ọmwata vbe odaro ẹre rhunmwuda iyayi ẹre rhunmwuda ọnii, Ebraham keghi re erha vbekpa ọghe orhiọn ne iran hia ni ya Osanobua yi, ne irẹn vbe ka ye emwata vbe odaro ẹre, a gha rhe miẹn wẹ iran ma rhuẹ.

¹² Rẹn ọre ọ vbe re erha iran ni rhuẹre, ẹ i re rhunmwuda ne iran na rhuẹ, sokpan rhunmwuda iran rrọọ vbe uwu iyayi egbe ne Ebraham vbe gha ye vbe ọ te do rhuẹ.

Vbekpa Iyayi Ọre Osanobua Na Ve Emwi

¹³ Osanobua tama Ebraham wẹ, agbọn na gha khian ọghọe. Emwi ne Osanobua ve na, ẹ i re rhunmwuda ighẹ Ebraham ru vbene nene Uhi kha re, sokpan rhunmwuda ighẹ ọ yayi, Osanobua keghi ka ẹe ye ọmwata.

¹⁴ Rhunmwuda, a deghẹ emwa ne ọ ru vbene Uhi khare ọre a rhie emwi ne Osanobua ve na, iyayi ọmwa, kẹkan ghi nọ khekherriọ, emwi ne Osanobua ve i vbe mwẹ esa ne ọ khin.

¹⁵ Izohu Osanobua ọre nene uhi si tuorre, sokpan ehe ne Uhi i ye, ọmwa i vbe rra uhi vbe evba.

¹⁶ Emwi ne a ve na, iyayi ọre a la ekpa ẹre vẹe, ne a miẹn ehe na ta ẹe guọbọ ighẹ emwi ne a ve na emwi ne Osanobua rhie ne ivbi Ebraham hia ọghe ọhẹ ọre nọ, ẹ i re ni ru vbene nene Uhi kha re ọkpa, sokpan kevbe iran ni yayi zẹ vbe ne Ebraham vbe yayi. Rhunmwuda Ebraham ọrọre erha ima hia fẹẹrẹ vbekpa ọghe orhiọn.

¹⁷ Zẹ vbene ebe kha re, “Mẹ ya uwẹ khian erha uhunmwu ẹvbo ni bun nẹ.” Ọnii nọ wẹ, emwi ne a ve na wa maa vbe aro Osanobua ne Ebraham yayi, Osanobua ne ọ huẹn ne ọ wu kpaegbe, ne ẹmwẹ ọnrẹn ye emwi ne ẹ i te ka rrọọ khian ne ọ ghi rrọọ.

¹⁸ Ebraham yayi, ọ keghi vbe gha mwẹ idaehọ vbe ẹghẹ ne idaehọ i na rrọọ, rhunmwuda ọnii, ọ keghi do khian erha uhunmwu ẹvbo ni bun. Zẹ vbene ebe ta ẹe wẹ, “Ekhuarha ruẹ gha bun.”

¹⁹ Te ọ ghi ra sẹ ọmọ ukpo iyisẹn sokpan iyayi ẹre ma beghe vbe ọ roro ẹmwẹ vbene egbe ẹre ye hẹ ne a miẹn wẹ ọ wa wu nẹ vbe ẹghẹ ne a kha na, ra ẹmwẹ ne a ma miẹn wẹ agan ọre Sera gha khin.

²⁰ Iyayi ẹre ma sẹ ọe rae, vberriọ, ọ ma vbe bọ iro eva ye emwi ne Osanobua ve, iyayi ẹre keghi rhie orhiọn ye ọre iwu, ọ keghi rho Osanobua vbe uyi.

²¹ Rhunmwuda ekhọe ẹre wa muẹn gbangbaangban wẹ Osanobua gha sẹtin ru vbe ne ọ yan rẹn.

²² Ọnii ọ si ẹe ne a na miẹn wẹẹ, la ekpa iyayi, “Osanobua keghi ka ẹe ye ọmwata.”

²³ Ẹmwẹ na wẹẹ, “A ka ẹe ye ọmwata” ẹ i re rhunmwuda irẹn ọkpa ọre a na gbẹn ọẹn.

²⁴ Rhunmwuda mwa ọre a na gbẹn ọẹn, ma ne a gha ka ye emwata, ma ne ọ yaeyi ighẹ ọmwa ne ọ huẹn Jesu Nọyaẹnmwa kpao vbe orinmwi.

²⁵ A keghi yae fi ohan ne ọ wu ye orukhọ mwa, a keghi vbe huẹn ọnrẹn kpaegbe ne ọ miẹn ehe na ye ima khian emwata vbe odaro Osanobua.