Ebe ne Pọl gbẹẹn gie emwa Rom 16 - Edo Bible (E Baibol Ẹdo) Version 1996

Igiotuẹ Obọ Ẹre

¹ I ta ẹmwẹ ne ọ maa ọghe Fobe ọtẹn mwa nokhuo ma uwa, ọmwa ne ọ winna ne esọsi ne ọ rre Senkrea.

² Wa ghi rhan obọ miẹn rẹn vbe eni Nọyaẹnmwa zẹ vbene ọ khẹ ke emwa Osanobua, wa ghi ru iyobọ ne ọ rhirhi nọ uwa re nẹẹn, rhunmwuda rẹn tobọ ẹre, ọse emwa ni bun rẹn wa khin dee, erriọ ọre ọ vbe ye ne imẹ.

³ Wa we Priskila kevbe Akuila ne ogieva mwẹ ne ima gba winna ne Kristi Jesu do.

⁴ Iran ni rhie uhunmwu mwẹ atataobọ ba ẹmwẹ mwẹ. Wa gun mwẹ kpọnmwẹ iran, ẹ i re mẹ ọkpa, sokpan kevbe esọsi emwa ne ẹ i re Ju hia.

⁵ Wa vbe guotuẹ esọsi ne ọ do gha miẹn egbe vbe owa iran. Wa we Epaonetọs ne ọse mwẹ ne ọ ghan do, rẹn ọre ọmwa ne ọ ka gha ye Kristi yi vbe otọ Esia hia.

⁶ Wa we Meri dọ, ọmwa ne ọ mobọ winna ye uwa.

⁷ Wa we Andronikọs kevbe Junias do, avbe Ju ne iho mwa ne ima gba gha rre eghan, avbe ukọ wa rẹn iran ẹsẹse, iran ọre ọ vbe ka gha yayi khẹ mwẹ.

⁸ Wa we Ampliatọs do, ọse mwẹ ne ọ ghan vbe uwu ne ima na gha gu Kristi re ọkpa.

⁹ Wa we Ọbanus do, ọmwa ne ima gba winna kugbe vbe uwu ugamwẹ Kristi, wa vbe giotuẹ Stakis ne ọse mwẹ ne ọ ghan.

¹⁰ Wa we Apẹlẹs do, ọmwa ne ọ vẹ ne agbọn hia rẹn ighẹ ọ guobọ Kristi. Wa we emwa ẹgbẹe Aristobulọs do.

¹¹ Wa we Hẹrodia do, ọmwa ne imẹ vbe ọre gba re Ju, kevbe etẹn Ni yayi ni rre ẹgbẹe Nasisọs.

¹² Wa giotuẹ Trifaena kevbe Trifosa mẹ, emwa ni winna vbe uwu iwinna Nọyaẹnmwa kevbe Pasis ne ọse mwẹ ne ọ ghan ne ọ winnaẹn ẹsẹse ne Nọyaẹnmwa.

¹³ Wa we Rufọs do, ọmwa ne iwinna rẹn rhie ugbaro maa vbe uwu iwinna Nọyaẹnmwa, kevbe iye ẹe ne ọ wa ya mwẹ ye ọmọ.

¹⁴ Wa we Asinkritọs do, kevbe Flegon, Hẹmis, Patrobas, Hemas deba etẹn ne ikpia ni yayi ni rre ehe ne iran ye.

¹⁵ Wa we Filologos kevbe Judia do. Nerius ke ẹe kevbe ọtiọnrẹn nokhuo, Olimpas kevbe emwa Osanobua ni rre ehe ne iran ye hia.

¹⁶ Wa ya isoso unu etẹn tuẹ egbe uwa. Esọsi Kristi hia we uwa do.

Ẹmwẹ Ibude Ne Okiekie

¹⁷ Gun mwẹ tama uwa etẹn mwẹ, wa gha baba iran ni si iwannegbe rre ne iran na vbe mu iyayi emwa eso rhia ye iran obọ, iran ni ghe odan ye iruẹmwi ne uwa ka rhan obọ miẹn nẹ, wa gha lẹ ne iran.

¹⁸ Rhunmwuda iran ni ru emwi vbe nian, ẹ i re Kristi Nọyaẹnmwa ọre iran ga, gberra evbare ne ọ khọn iran. Iran ghi ya ẹmwẹ ne ọ rhiẹnrhiẹn kevbe aranmwẹ erẹrẹ iran gha ye iran ni ma rẹn ọkpa ọ ma rẹn eva de odẹ.

¹⁹ Agbọn hia họn ẹn vbene uwa rhie egbe ye ẹmwẹ iyẹn ne ọ maa hẹ, rhunmwuda ọna, ọyẹnmwẹ uwa keghi sẹ mwẹ. I ho ne uwa gha re ni wan vbe uwu emwi ni maa sokpan ne ọ ma rẹn ne a ye vbe emwi dan.

²⁰ Vbe ọ ma he kpẹe wan, Osanobua ne ọ re uhunmwu ọfumwegbe mwa, gha guọghọ Setan ye atataowẹ uwa. Te ẹsọhẹ Nọyaẹnmwa Jesu gha guwa gha rrọọ.

²¹ Timoti ne ima gba winna, wẹ uwa do, kevbe Lusiọs, kevbe Sosipata, avbe Ju ne iho mwa.

²² Mẹ ne Tẹtiọs ne ọ gbẹn ebe na, giotuẹ uwa zẹ vbe ne ọ yayi.

²³ Gaiọs ne imẹ di owa ẹre ya, ọmwa ne a do esọsi vbe owa ẹre we uwa do, Ẹrastọs ne ọ da igho yi ne ẹvbo kevbe ọtẹn mwa Kuatọs we uwa do. [

²⁴ Te ẹsọhẹ Nọyaẹnmwa Jesu Kristi gha guwa gha rrọọ. Isẹ.]

Erhunmwu Okiekie Ọghe Ẹsọhẹ

²⁵ Gie ima rhie uyi ne Osanobua! Rẹn gha sẹtin ya uwa mudia gbain vbe iyayi uwa, zẹ vbe Iyẹn Ne ọ maa ne I kpe orhu ẹre ighẹ ẹmwẹ Jesu Kristi, kevbe zẹ vbe ẹmwata ne a rhie lẹre ne ẹkpo i mwẹ arria gha dee, ne a miẹn nian wẹ ọ vẹe ne a rẹn.

²⁶ Vbene ọ rhirhi gha ye hẹ, banbanna nian, a rhie ẹmwata ni ladian azagba nẹ la ekpa emwi ne avbe akhasẹ gbẹnnẹ, kevbe zẹ vbe ne Osanobua etẹbitẹ yi ẹre iyi, a rhie ẹre ma uhunmwu ẹvbo hia nẹ, ne emwa hia miẹn ehe na yayi, ne iran vbe gha ya ẹe ru emwi.

²⁷ Osanobua ọkpa nii ọmwa ne irẹn ọkpa mwẹ ẹwaẹn hia, ọre uyi gha rrọọ na vbekpa Jesu Kristi ẹdẹdẹmwẹdẹ. Isẹ.