Ebe ne Pọl gbẹẹn gie emwa Rom 15 - Edo Bible (E Baibol Ẹdo) Version 1996

Gha Sẹ Ọdamwẹ Rae Ru Ọ Daa

¹ Ọ kere ne ima ne iyayi ẹre wegbe gha kpa iran ni ma wegbe ihẹ. Ọ ma kei ne ima gha ru ne ọ yẹ egbe mwa.

² Sokpan ọ kere ne dọmwadẹ ọghọe vbe uwu ima gha ru ne ọ yẹ ọtiọnrẹn, ne umamwẹ ọnrẹn, ne a miẹn ehe na gbe ẹre igie vbe uwu iyayi.

³ Rhunmwuda ẹ i re ọghe enegbe Kristi ọre ọ gha ru. Sokpan zẹ vbene ebe khare, “Ẹbọ ne iran ni tie ihẹn nuẹn tie nuẹn do sẹ ima egbe.”

⁴ Rhunmwuda emwi hia ne a gbẹn ye nene Ebe, te a gbẹn ọẹn ne a ya ma ima emwi, ne ima sẹtin la ekpa izinebe kevbe ẹtin ne Ebe rhie ye ọmwa iwu, gha mwẹ idaehọ.

⁵ Ne Osanobua, obọ ọmwa ne i ziengbe kevbe a rhie ẹtin ye ọmwa iwu ke rre, gie uwa sẹtin gha zẹ iro kugbe, vbe emwi ne uwa ru, vbe ekpa ne uwa gha na gha lele igiemwi Jesu.

⁶ Ne uwa hia miẹn ehe na sẹtin gha ye urhu ọkpa rho Nọyaẹnmwa, ne uwa gha rho Osanobua kevbe Erha Nọyaẹnmwa Jesu Kristi.

Iyẹn Ne O Maa Ne A Rhie Gie Iran Ni I Re Ju

⁷ Wa gha rhan obọ miẹn egbe, ne uyi Osanobua. Zẹ vbene Kristi rhan obọ miẹn uwa.

⁸ Ne I tama uwa wẹ Kristi khian ọguọmwadia iran ne Ju ne ọ miẹn ehe na rhie maa wẹ Osanobua i hiẹ ọmwa, ne ẹmwẹ ne ọ tama avbe erha mwa odede miẹn ehe na sẹ.

⁹ Ke ne iran ne ẹ i re Ju miẹn ehe na gha rho Osanobua rhunmwuda itohan rẹn. zẹ vbene ebe khare: “Rhunmwuda ọnii, mẹ gha kpọnmwẹ ọn vbe uwu ẹbu avbe iran ne ẹ i re Ju I gha so ihuan urhomwẹ ghe eni ruẹn.”

¹⁰ Ọ kevbe dọlegbe ta ẹe wẹẹ, “Wa ne ẹ i re Ju, wa deba emwa ne Osanobua hannọ zẹ gha ghọghọ!”

¹¹ Ọ yevbe ta eẹ ba ẹre wẹẹ, “Wa rho Nọyaẹnmwa, wa ne ẹ i re Ju hia. Wa kakabọ rho ẹre, wa ne emwa hia.”

¹² Deba ẹre Aizaia vbe ta ẹe wẹ, “Ọmọ ọkpa gha la uniẹn Jese rre. A gha tọn ẹn mu ne ọ gha khaemwisẹ ya iran ne ẹ i re Ju.”

¹³ Te Osanobua obọ ọmwa ne idaehọ hia ke rre gha ya oghogho kevbe ọfumwegbe vuọn uwa, vbekpa iyayi ne uwa mwẹ vbe uwu irẹn, ne idaehọ uwa miẹn ehe na gha muan yọ vbekpa ẹtin Orhiọn Ne Ọ Huanrẹn.

Emwi Ne Ọ Ya E Pọl Gha Gbẹn Ebe Udinmwẹ

¹⁴ Etẹn mwẹ, mẹ rẹnrẹn wẹ te emwi ni maa hia wa gba uwa obọ, kevbe wẹ wa rẹn emwi ẹsẹse, ighẹ wa gha sẹtin gha ma egbe uwa emwi.

¹⁵ Sokpan vbe ebe ne I gbẹn gie uwa, emwi ne I ta ẹe vbọ, I ma vbe zẹdẹ rhie aranmwẹ kọ ẹho guan. Emwi ne ọ ya mwẹ si agbada vbe unu guan ọrọre rhunmwuda ukpo ne Osanobua mu mwẹ yi.

¹⁶ Ọnii nọ wẹ ne I gha re ọguọmwadia Jesu Kristi ne ọ gha winna ne iran ne ẹ i re Ju. Mẹ ghi gha kpe orhu Iyẹn Ne ọ maa Osanobua zẹ vbe ohẹn, ne iran ne ẹ i re Ju sẹtin do gha re emwi izọ ese ne ọ gie Osanobua rhan obọ miẹn, kevbe ne Orhiọn Ne Ọ Huanrẹn ya fi ohan nẹẹn.

¹⁷ Vbe ne I na yevbe rrọ ba Jesu. I sẹtin wa ya iwinna mwẹ ne I winna ne Osanobua gha rhuẹ.

¹⁸ I gha si agbada vbe unu guan kan ẹmwẹ emwi ọkpa kẹkan, ọnii ọrọre emwi ne Kristi ru, ne ọ na ya mwẹ viọ iran ne ẹ i re Ju do gha họn ẹmwẹ ne Osanobua, la ekpa ẹmwẹ ne a guan kevbe emwi na ru.

¹⁹ La ekpa ẹtin, ama kevbe iwinna ọyunnuan kevbe ẹtin ọghe Orhiọn. Ọre a na miẹn wẹẹ I ke Jerusalẹm khian ya sẹ Ilirikọm. I kegha na ọna ọre ọ na fo ighẹ Iyẹn Ne ọ maa vbe ekpa Jesu Kristi.

²⁰ Emwi ne ọ gha fifi mwẹ egbe ọrọre ne I kpe orhu Iyẹn Ne ọ maa nii, vbe ehe ne a ma he na ka họn ẹmwẹ Jesu, ne I ghẹ miẹn ehe na gha bọ owa yan ẹyotọ ne ọmwa ọvbehe ka gbe nẹ.

²¹ Zẹ vbene ebe khare: “Emwa ne a ma he ta ẹmwẹ ọnrẹn ma, gha miẹn. Emwa ni ma he họn, gha rẹn otọ ẹre.”

Vbene Pọl Mu Egbe Rom Hẹ

²² Ọna ọre ọ si ẹe ne idobo na gha larọ vbe ẹghẹ ni bun ne ọ ma gun mwẹ do miẹn uwa aro.

²³ Vbene a ghi na miẹn nian ighẹ I winna iwinna mwẹ fo nẹ vbe ikinkin na, kevbe ne a na miẹn wẹ, ẹghẹ ni bun ọre I he ya gha ho ne I do miẹn uwa aro.

²⁴ I mwẹ idaehọ ighẹ I gha ru vberriọ nian. I gha do miẹn uwa aro vbe i a gha rrie Spen, ne uwa miẹn ehe na ru iyobọ mẹ ne I ya sẹ odọ vbe I gha ghi tuẹ uwa kpẹe nẹ kherhe.

²⁵ Vbene ọ rhirhi gha ye hẹ, I he rrie Jerusalẹm ne I ya ga emwa Osanobua ni rre evba.

²⁶ Rhunmwuda, avbe esọsi ni rre Masidonia kevbe Gris ya ẹkoata zẹ emwi obọ ne iran ya ye ivbi ogue ni rre uwu emwa Osanobua ni rre Jerusalẹm obọ.

²⁷ Iran ọre ọ tobọ iran kha ighẹ iran ra ruẹe, sokpan ne a ta ẹmwata, te ọ bi ye iran egbe ne iran ye avbe ivbiogue nii obọ. Rhunmwuda avbe Ju ghae afiangbe ọghe orhiọn iran sẹ iran ne ẹ i re Ju obọ. Rhunmwuda ọnii, te ọ vbe kei ne iran ne ẹ i re Ju vbe ya emwi afiangbe ne ọ re ọghe egbe ne iran mwẹ, ga avbe Ju.

²⁸ I gha ghi winna iwinna na fo nẹ, ighẹ I ghi viọ igho hia ne a koko ne iran ye iran obọ nẹ, I ghi gha rrie Spen, I gha khian nii ọre I gha na do van tuẹ uwa.

²⁹ I gha rre, I rẹnrẹn ighẹ ke imẹ kevbe afiangbe ne ọ gbae ọghe Kristi ọre ọ gba dee.

³⁰ Etẹn mwẹ, I kakabọ ye Nọyaẹnmwa Jesu Kristi, kevbe ahoẹmwọmwa ne Orhiọn rhie ne ọmwa rinmwian uwa ne uwa deba mwẹ kakabọ gha na erhunmwu ghe Osanobua mẹ.

³¹ Wa na erhunmwu ne a miẹn mwẹ fan vbe obọ iran ni ma yayi ni rre Judia, kevbe ne iwinna ne I gha winna vbe Jerusalẹm gie iran ne emwa Osanobua ni rre evba rhan obọ miẹn.

³² Erriọ I gha na ye ẹko ọyẹnmwẹ bu uwa gha dee, a deghẹ Osanobua ho, ne ima kugbe bọbọ egbe rọkhọmwẹ ọghe otuẹ na.

³³ Te Osanobua ne ọ re uhunmwu ẹzẹ ọfumwegbe mwa gha deba uwa. Isẹ.