Ebe ne Pọl gbẹẹn gie emwa Rom 14 - Edo Bible (E Baibol Ẹdo) Version 1996

Wa ghẹ Gha Zan Egbe

¹ Wa gha miẹn iran yi ighẹ iran ne iyayi ẹre ma he wegbe vbe uwu uwa. Sokpan wa ghẹ guee gha gbe agbanmwẹ vbekpa vbene emwi ye hẹ vbe ekhọe ẹre.

² Iyayi emwa eso sẹtin gha re ne ọ giẹe ya rri emwikemwi, sokpan ọmwa ne iyayi ẹre ma wegbe, ghi gha rri asakan.

³ Ọmwa nọ rri emwi hia, wẹ ne oghẹ gha zan ọmwa ne ẹ i re, nọ rri a sakan, wẹ ne oghẹ gha zan nọ rri emwi hia, rhunmwuda Osanobua rhan obọ miẹn rẹn nẹ.

⁴ Vbe uwẹ a ke rre yi ne ọ bu ohiẹn ọguọmwadia ẹrrẹe. Arowa ẹre ọ ra tae a deghẹ ọ ru ne a gban ra deghẹ te ọ bubu ua. Ẹi mwẹ ọ ma ru na gban, rhunmwuda Osanobua gha giẹe ru na gban.

⁵ Emwa eso ghi gha ka ẹdẹ ọkpa ye ne ọ ru ekpataki sẹe avbe ẹdẹ ọvbehe, vbene ọmwa ọvbehe na ka ẹdẹ hia ye abọkpa. Gie dọmwadẹ ọghọe rẹn ne ọ mu ẹre ekhọe vbọ.

⁶ Ọmwa ne ọ ka ẹdẹ ọkpa ye kpataki, te ọ ruẹe ne uyi Osanobua. Ọmwa ne ọ rri evbare hia, uyi Osanobua ọre ọ vbe ruẹe na rhunmwuda, te ọ kpọnmwẹ Osanobua ye evbare nii. Ọmwa ne ọ vbe wẹẹ rẹn i rri evbare eso, uyi Nọyaẹnmwa ọre ọ ruẹe na, ọ ghi vbe kpọnmwẹ Osanobua.

⁷ Rhunmwuda ọmwa ọkpa ne ọ rrọọ ne egbe ẹre, ẹ i rre uwu ima, ne ọ vbe wu ne egbe ẹre ọkpa, ẹ i vbe rrọọ. Deghẹ ma rre agbọn, Osanobua ma rre agbọn na.

⁸ A deghẹ te ima vbe wu, Nọyaẹnmwa ọre ima wu na. Rhunmwuda ọnii, ọ re te ima wu ra te a rre agbọn, ọghe Nọyaẹnmwa ọre ima khin.

⁹ Rhunmwuda Nọyaẹnmwa Jesu wu, ọ keghi vbe rhiọkpaegbe, ne ọ miẹn ehe na gha re nọyan iran ni wu kevbe ni rrọọ.

¹⁰ Rhunmwuda ọnii nian, vbe ọ zẹ ne uwẹ na bu ohiẹn ọtuẹn yi? Kevbe uwẹ, vbe ọ zẹ ne u na zan ọtuẹn, ma hia gha mudia ye odaro Osanobua ne ọ bu ohiẹn ima.

¹¹ Rhunmwuda ebe khare wẹẹ, “Nọyaẹnmwa kha re wẹẹ, ‘Ugbẹn vbe imẹ rrọọ, emwa hia gha de igue vbe odaro mwẹ. Emwa hia ghi vbe ya unu iran tae wẹẹ mẹ ọrọre Osanobua.’ ”

¹² Dọmwadẹ ọghọe vbe uwu ima ọre ọ ra na iyẹn egbe ẹre ma Osanobua.

Ghẹ Sua Ọtuẹn Gbe Otọ

¹³ Rhunmwuda ọnii, wa gie ima dobọ ne a na zan egbe yi, sokpan emwi ne uwa gha hẹnhẹn unu ẹnrẹn ọrọre wẹẹ ne a ghẹ ru emwikemwi ne ọ gha ya ọtuẹn rrua owẹ, ra ne ogha ya ẹe ru orukhọ.

¹⁴ Akugbe ne I mwẹ ba Kristi, rhie ma mwẹ vbe ne aro na da ẹe wẹẹ emwi ọkpa i rrọọ ne ọ wa tobọ ẹre re ne ọ ma huan, sokpan deghẹ ọmwaikọmwa na ghi ka emwi ọkpa ye ne ọ ma huan nẹ, emwi ni khian ne ọ ma huan ne irẹn.

¹⁵ Deghẹ te uwẹ ghi ya emwi ne u re ru emwi ikuan egbe ne ọtuẹn, ọnii rhie maa ighẹ ẹ i re ahoẹmwọmwa ọre u ghi ya ru emwi. Ghẹ gia a miẹn ighẹ rhunmwuda evbare ne uwẹ re ọre ọtuẹn ne Kristi wu na ghi na khian ne ọ wiruaa.

¹⁶ Ghẹ gie a miẹn wẹẹ emwi ne uwẹ ka ye emwi esi do khian ne a ghi so eni ẹnrẹn ne ọ khọ.

¹⁷ Rhunmwuda, Arriọba Osanobua i re ẹmwẹ ne a gha re kevbe ne a gha da, sokpan ọghe nene emwi ẹmwata kevbe ọfumwegbe kevbe ọyẹnmwẹ ne nene Orhiọn Ne Ọ Huanrẹn rhie ne ọmwa.

¹⁸ Ọmwaikọmwa ne ọ ye vberriọ ga Jesu miẹn aro ne ọ maa ọghe Osanobua kevbe ne agbọn tu ọma lele.

¹⁹ Rhunmwuda ọnii nian, wa gie ima gha rhie ekhọe ye ẹmwẹ emwi ne ọ gha rhie ọfumwegbe rre kevbe ne ọ gha rhie ẹtin ye egbe iwu.

²⁰ Ghẹ rhunmwuda evbare mu emwi ne Osanobua ru nẹ rhia. A sẹtin rri evbare ke evbare, sokpan ọ ma kei ne a rri emwi ne ọ gha ye ọmwa ọvbehe de ye orukhọ.

²¹ Emwi ne ọ kere ne a gha ru ọrọre ne a ghẹ rri emiowo ra ne a da ayọn, ra ne a ru emwi ke emwi ne ọ gha mu ọtuẹn gbe otọ.

²² Rhunmwuda ọnii vbene uwẹ a rhirhi roro ẹmwẹ na yi, giẹe gha rre ẹkpo uwẹ vbe Osanobua.

²³ Ọ maa ne ọmwa ni ne ekhọe ẹre ma bu ohiẹn gbe vbe ọ gha ru emwi ne irẹn kha nẹ ighẹ ọ maa! Sokpan a deghẹ ọ gbe ọ khọn mwẹ ẹ i khọn mwẹ ye ẹmwẹ evbare ne ọ re, Osanobua gha bu abe gbe ẹe vbe ọ gha rriọe, rhunmwuda ẹ i re iyayi ọre ọ ya ẹe ru emwi ne ọ ru. Emwi ke emwi ne a ma ye iyayi ru, orukhọ nọ.