Ebe ne Pọl gbẹẹn gie emwa Rom 13 - Edo Bible (E Baibol Ẹdo) Version 1996

Vbe Ne Ayin Ghe Ukọ Ẹvbo Hẹ

¹ Ọ kere ne emwa hia gha họn ẹmwẹ ne avbe ukọ ẹvbo, rhunmwuda asẹ ọkpa i sẹtin gha rrọọ vbe ẹ i re te Osanobua ye obọ yọ, avbe emwa ni rre asẹ hia, Osanobua ọre ọ viọ iran ye evba.

² Ọmwaikọmwa nọ gu asẹ ne ọ rrọọ gha suan, iyi ne Osanobua yi ọre ọ gbe odan yi, ọmwaikọmwa ne ọ ru vberriọ, oya ọre ọ ya obọ si rri egbe.

³ Rhunmwuda iran ni rre asẹ i re ne afianma rẹn fian ọmwa ne ọ ru emwi ẹse, sokpan iran ni ru emwi dan, deghẹ wẹ i ho ne afianma iran ni rre asẹ gha fian an, gha ru emwi esi, ọ gha tian ruẹn.

⁴ Rhunmwuda ọguọmwadia Osanobua ne ọ winna ye umamwẹ ruẹn ọre nọ. Sokpan, u gha ru emwi dan, gie afianma rẹn gha fian an, rhunmwuda, ẹtin ne ọ mwẹ ne ọ ya rri ọmwa oya, ẹ i re ọghe abawẹ, ọguọmwadia Osanobua nọ, oya ọre ọ rri iran ni ru emwi dan re ne Osanobua.

⁵ Rhunmwuda ọna ọre a na miẹn wẹ iwinna uwa nọ ne uwa gha họn ẹmwẹ ne iran ni rre asẹ, ẹ i re rhunmwuda afianma izohu Osanobua ọkpa, sokpan zẹ vbe ne ekhọe ọmwa i na gu ọmwa gui.

⁶ Otọe emwi nọ ye uwa zẹ igho uhunmwu ọre ọna khin, rhunmwuda Osanobua ọre iran ni rre asẹ winna na, deghẹ iran winna iwinna ne ọ kan iran.

⁷ Rhunmwuda ọnii wa ha osa kevbe igho ne a fian ye emwi ne uwa mwẹ ne iran, wa ghi vbe gha ye ọghọ vbe ute da ne iran.

Emwi Ne A Ru Ne Egbe

⁸ Ghẹ rri ọmwa rhọkpa osa, osa ọkpa ne u gha re ọrọre ne uwa gha ho ẹmwẹ egbe, ọmwaikọmwa ne ọ mwẹ ahoẹmwọmwa ghe ihua ẹre, mu nene Uhi sẹ nẹ.

⁹ Avbe uhi na, “Ghẹ ghẹ, ghẹ di zigha, ghẹ rha, ghẹ ye aro ye emwi ẹrrẹe,” ena hia kevbe ọvbehe ne ọ rhirhi gha khin, uhi ọkpa ọre a ya fian ehia ifi wẹ, “Ho ẹmwẹ ogieva ruẹ zẹ vbene u ho ẹmwẹ egbe ruẹ.”

¹⁰ Ọmwaikọmwa ne ọ ho ẹmwẹ ogieva ẹre, ẹ i ru ẹre emwi khọọ. De ghẹ a ghi mwẹ ahoẹmwọmwa nẹ khekherriọ, ọnii ọre wẹ a mu nene Uhi hia sẹ nẹ.

¹¹ Ọ kere ne uwa gha ru vbenian, rhunmwuda, wa rẹn vbene ẹghẹ kha hẹ na, ẹghẹ sẹ ne uwa gha ya rhiọrre vbe ovbe. Rhunmwuda, ẹghẹ ne a gha ya miẹn ima fan, ẹghẹ na ọre ọ na sikẹ otọ sẹ vbene ọ ye ẹghẹ ne ima na da yayi.

¹² Asọn ye egbe khian buan nẹ, te ẹdẹ ghi ra gbe. Wa gie ima viọ emwi igbinna ne a ya gbinna vbe uwu uwanmwẹ mwẹ obọ.

¹³ Wa gie ima gha ru emwi ọmwa ne ọ rẹn enegbe, zẹ vbe ivbi uwanmwẹ ẹdẹ, ẹ i re vbe uwu oyanghan, ra ayọn ne a da gbe egbe, ẹ i re uwu alama oghẹ ra u sakanmwẹ, ẹ i re vbe uwu igbinna ra oya ọmwa da ọmwa.

¹⁴ Sokpan wa viọ emwi igbinna ọghe Nọyaẹnmwa Jesu Kristi mwẹ obọ, wa ghẹ gie ẹmwẹ egbe orukhọ uwa mu uwa, vbe ekpa ne uwa na rhie emwi ne ọ ho nẹẹn ne ẹko vuọẹn.