Ebe ne Pọl gbẹẹn gie emwa Rom 12 - Edo Bible (E Baibol Ẹdo) Version 1996

Ẹdẹ Agbọn Vbe Uwu Ugamwẹ Osanobua

¹ Rhunmwuda ọnii etẹn mwẹ, I la ekpa itohan nọkhua ọghe Osanobua ghe emwa rinmwian uwa ne uwa ya egbe uwa fi ohan ne Osanobua zẹ vbe emwi izọ ese ne ọ ye rre agbọn, ne ọ mu aro ye ẹmwẹ iwinna ẹnrẹn, kevbe ne ọ vbe yẹ ọre. Ọnọna ọrọre ugamwẹ ẹmwata ne uwa gha rhie nẹẹn.

² Wa ghẹ ya egbe ba emwi ne agbọn na ru, sokpan wa gie Osanobua fi uwa werriẹ vbe uwu egbe vbe ekpa ne ọ gha na fi ekhọe uwa werriẹ. Ẹghẹ nii wa gha na sẹtin rẹn emwi ne Osanobua ho emwi ne ọ maa, ne ọ yẹ ọre kevbe ne ọ gbae.

³ Rhunmwuda, ẹsọhẹ Osanobua ne ọ ya ru mwẹ ẹse, I tama uwa hia wẹẹ, wa ghẹ mwa egbe ye ukpo ne ọ gberra ehe ne ọ ke yi. Sokpan wa gha re ne ẹ i si ukankan vbe iro ne uwa zẹ, ne dọmwadẹ ọghọe vbe uwu uwa gha mwa egbe ẹre ye vbene Osanobua rhie iyayi nẹẹn sẹ.

⁴ Ina ni rre egbe bun, ọkpọkpa vbe uwu iran mwẹ iwinna ne ọ ye.

⁵ Erriọ vbe nọ zẹ, ma gha rhe bun, egbe ọkpa ne a kugbe ba Kristi ma khin, a keghi vbe ku ima kugbe ye ọkpa, zẹ vbene dọmwadẹ ina ni rre egbe ye.

⁶ Rhunmwuda ọnii, wa gie ima gha lo dọmwadẹ emwi ughughan ne Osa ya we mwa ye omwa ẹsọhẹ ne Osanobua rhie ne ima. Deghẹ ne a gha kpe orhu Osanobua ọrọre emwi ne a ya we mwa, wa gie ima gha ruẹe vbene iyayi mwa sẹe.

⁷ A deghẹ ne a gha ga emwa ọvbehe nọ, wa gie a gha ga emwa ọvbehe, deghẹ ne a gha ma emwa emwi nọ, gia gha ma emwa emwi.

⁸ Deghẹ ne a gha rhie igiọdu ne emwa ọvbehe nọ, gie a gha ru vberriọ, ọmwa ẹ ọ ghae ne emwa ọvbehe vbe emwi ẹnrẹn, giẹe gha ye ẹkoata ruẹe, ọmwa ne ọ mwẹ asẹ, wẹ ne ọ gha winna ẹsẹse, ọmwa ne ọ tohan emwa ọvbehe, giẹe gha ye aro ne ọ hian rẹn vbe uhunmwu ruẹe.

⁹ Wa gie aho ẹmwẹ ọmwa gha re ne ọ sẹ otọ ẹko. Ghẹ gha ma ẹko emwi dan. De obọ mu emwi esi.

¹⁰ Wa kakabọ gha ho ẹmwẹ egbe zẹ vbe etẹn vbe uwu Kristi, wa gie ẹe gha bọbọ uwa egbe ighẹ ẹmwẹ ọghọ na rhie ne egbe.

¹¹ Wa kakabọ gha winna, wa ghẹ so oroho, wa gha ya ekhọe ne ọ vuọn ne oyọnyọn ga Nọyaẹnmwa.

¹² Wa gie idaehọ ne uwa mwẹ gha ye ọyẹnmwẹ sẹ uwa vbe ẹghẹ hia, wa gha ziengbe vbe ẹghẹ ọlọghọmwa, wa ghi vbe gha na erhunmwu vbe ẹghẹ hia.

¹³ Wa gha ghae ne etẹn uwa ne ẹ i mwẹ emwi vbe uwu emwi ne uwa mwẹ, wa gha sẹ oyaya mu erhunmwuyẹn.

¹⁴ Gha na erhunmwu ne iran ni zẹ uwẹ kpokpo, ẹn, gha na erhunmwu ne iran, ghẹ tie ihẹn.

¹⁵ Gha gu enọghọghọ ghọghọ vbe gu enọviẹ gha viẹ.

¹⁶ Gha ya obọ ọkpa mu emwa hia, ghẹ gha tọn egbe mu, gha rhan obọ miẹn iwinna ne ọ ma te khẹke ukpo ne u ye. Wa ghẹ gha ka egbe uwa ye umẹwaẹn.

¹⁷ Ọmwa gha ruẹ khọ, ghẹ vbe ye ọkhọ ha ẹre nẹẹn. Hia ne u gha ru emwi ne emwa hia ka ye ne ọ maa.

¹⁸ Zẹ vbene ọ kan ruẹn, hia vbe odẹikodẹ ne uwa vbe emwa hia gba gha ma ẹko egbe.

¹⁹ Ọse mwẹ, ghẹ rria ikhi, sokpan, gie izohu Osanobua ruẹe, rhunmwuda ebe tae wẹẹ, “I gha rria ikhi, I gha ruẹe werriegbe, erriọ Nọyaẹnmwa khare.”

²⁰ Sokpan, zẹ vbene ehe tae, “Deghẹ ohanmwẹ gbe oghian ruẹn, kokẹe, deghẹ ohanmwẹ amẹ gbe ẹe, sa amẹ nẹ wọn rhunmwuda, vbe ne u na ru vberriọ, ogiọnmwẹ erhẹn ẹyin ọre u koko ye ọre uhunmwu.”

²¹ Ghẹ gia obọ ọkhọ ke odukhunmwu nuẹn, sokpan, ya ọ maa rhie obọ yan ọkhọ uhunmwu.