Ebe ne Pọl gbẹẹn gie emwa Rom 11 - Edo Bible (E Baibol Ẹdo) Version 1996

Itohan Osanobua Ghe Izrẹl

¹ Te I mẹ ghi nọọn nian. Te Osanobua ghi he emwa rẹn ra? Hiehiere, mẹ tobọ mwẹ, ovbi Izrẹl mẹ khin, ovbi uniẹn Ebraham, ẹwae emwa Bẹnjamin.

² Osanobua ma he emwa rẹn ne irẹn hannọ zẹ ke omuhẹn gha dee. Wẹ gha yerre wẹ Osanobua tae vbe ebe ne Elaija na gha ha ivbi Izrẹl ifi ẹzọ wẹẹ,

³ “Nọyaẹnmwa, iran gbele avbe akhasẹ ruẹ hia ua, iran guọghọ ogiukpo ruẹ hia se otọ. Mẹ ọkpa ọ ghi te vbe kẹe, iran vbe ho ne iran gbe mwẹ uan.”

⁴ De ewanniẹn ne Osanobua ghi rhie nẹẹn? Ọ wẹẹ, “I ye mwẹ arhin arriaisẹn ihinrọn, emwa ne ọ ma ya uhunmwu rhanmwẹ otọ ne Bal ne ẹbọ ohoghe.”

⁵ Erriọ ọre ọ wa vbe ye vbe ẹghẹ na zẹẹ, ọmwa ibozẹghẹ ye rrọọ vbe uwu iran ne Osanobua ye itohan rẹn hannọ zẹ.

⁶ Itohan rẹn ọre ọ lele zẹ emwa ne ọ hannọ zẹ ighẹ ẹ i re rhunmwuda uyinmwẹ iran. Rhunmwuda, akpawẹ rhunmwuda uyinmwẹ emwa ọre Osanobua ya hannọ emwa zẹ, itohan rẹn i ghẹ ghi gha re itohan ẹmwata.

⁷ Vbe a ghi tae hẹ na yi? Obọ ivbi Izrẹl ma vba emwi ne iran te gualọ. Omwa ibozẹghe ne Osanobua hannọ zẹ ọre ọ miẹn ọẹn. Iran nekpa keghi yin ehọ vbe Osanobua tie iran.

⁸ Zẹ vbene ebe tae, “Osanobua keghi gbin iran orhiọn kevbe ekhọe ẹwaẹn, do sẹ ẹdẹnẹrẹ na, iran i sẹtin ye aro iran dẹghe odẹ, iran i sẹtin he ehọ iran họn ẹmwẹ.”

⁹ Devid keghi vbe kha wẹẹ, “Te obọ gha vba iran vbe ehe ne iran na rri evbare, te iran gha dele, te a gha rri iran oya.

¹⁰ Te aro iran gha mimi, ne iran ghẹ dẹghe, ne usẹ ne ọ sẹ iran gha su iran uke vbe ẹghẹ hia.”

¹¹ Te imẹ ghi nọọn nian: Ẹghẹ ne avbe Ju na rrua owẹ, te iran wa dele guọghọ ua ra? Hiehiere! Rhunmwuda ne iran na ru orukhọ, imiẹnfan keghi do sẹ egbe iran ne ẹ i re Ju, ne oya iran miẹn ehe na gha da avbe Ju.

¹² Afiangbe wọrhọ ọre orukhọ ne avbe Ju ru rhie gie agbọn. Ogue ẹmwẹ orhiọn iran keghi rhie afiangbe wọrhọ gie iran ne ẹ i re Ju. Wẹ ma ghi la evba rẹn ighẹ a gha viọ avbe Ju hia la owa, afiangbe ne ọ gha la evba rre gha mobọ kpọlọ sẹ ẹsẹse.

Imiẹnfan Iran Ni I Re Ju

¹³ Wa ne ẹ i re Ju ọre I ra gu guan na. Ugbẹn vbe a ghi miẹn wẹ mẹ ọrọre ukọ iran ne ẹ i rẹ Ju, te I gha ye iwinna mwẹ ghagha.

¹⁴ U gha ghe, I gha sẹtin ruẹe ne oya gha da iran ne emwa mwẹ ne a sẹtin la ekpa ọnii miẹn eso fan vbọ.

¹⁵ Rhunmwuda, ugbẹn vbe a he iran, a keghi ya agbọn khian ọse Osanobua. Vbe uwẹ a ghi yayi ighẹ ogha ye hẹẹ khekherriọ ugbẹn vbe a gha rhan obọ miẹn iran? Iran ni te wulo gha wa rrie agbọn!

¹⁶ A deghẹ a rhie ekan unu eka ne okaro ne Osanobua, rẹn ọ ghi wa yan ududu eka ni hia, erriọ, a deghẹ a vbe ye inian ni rre erhan fiohan ne Osanobua, rẹn ọre ọ wa vbe yan abọ ẹre ba ẹre.

¹⁷ A ghi giagia ahọ eso kua vbe erhan ohọ ne a kọe, a keghi do mu abọ erhan ohọ ni rre oha mama yọ. Wa ne ẹ i re Ju, te uwa yevbe erhan ohọ ni rre oha nii, wanwan nian, agbọn ẹfe kevbe ne ọ mwẹ ẹtin ne ọre ọghe avbe Ju, sẹ uwa obọ.

¹⁸ Rhunmwuda ọnii, wa ghẹ zan iran ne a giagia kua zẹ vbe abọ. De emwi ne uwa ya hio yi? Abọ ọre uwa khin kẹkan ẹ i re uwa ọre ọ da ẹzi erhan yi, inian ọre ọ da uwa yi.

¹⁹ Wa sẹtin kha nian wẹẹ, “Ẹn, ẹ i re te a gia abọ kua ne a miẹn ehe na rhie otọ mẹ?”

²⁰ Ẹmwata ọnii khin. A giagia iran kua rhunmwuda ighẹ uwẹ yayi. Sokpan, ghẹ tọn egbe mu gbe ye ẹmwẹ na, vberriọ, gie ohan gha mu ẹn.

²¹ Osanobua ma sẹ avbe Ju ni ye vbe abọnabọ rae, wẹ ma yayi ighẹ ọ gha sẹ uwẹ ra?

²² Emwa na ọre ima na rẹn vbene Osanobua fu hẹẹ kevbe vbene ọ vbe khọ hẹẹ, ọ keghi khọ mu iran ni dele, ọ keghi fu ne uwa a deghẹ uwa gba ọghọ ufumwẹ ọnrẹn ginna egbe, sokpan deghẹ wa ma ru vberriọ, a gha vbe giagia uwa kua.

²³ Kevbe avbe Ju, a deghẹ iran rhie obọ hin ẹmwẹ a ma yayi iran rre, a ghi dọlegbe viọ iran ye ihe iran, rhunmwuda te Osanobua ye sẹtin viọ iran dọlegbe ye ihe.

²⁴ Wa ne ẹ i re Ju, te uwa yevbe abọ erhan oliv ne oha, ne a fian, a na do mamaẹn mu erhan oliv vbe odẹ ne ọwa la ihan nẹ vbene a ru emwi la. Te avbe Ju yevbe erhan ne a mobọ kọ na, rhunmwuda ọnii, ẹ i ra lọghọ Osanobua khekherriọ vbe ọ gha mama abọ ne a giagiae kua nẹ mu nene erhan ne a ke giagiae rre.

Itohan Osanobua Vbe Egbe Emwa Hia

²⁵ Ẹmwata ọkpa rrọọ. oro wa nọ, sokpan i ho ne uwa rẹn ọnrẹn etẹn mwẹ, ọnii gha kie uwa ukpẹ ne uwa na ro ighẹ uwa wan gbe. Ọre ọnii khin wẹẹ, Izevbudu ivbi Izrẹl, ẹ i re emwi etẹbitẹ, sokpan, ọ gha ye gha khian rhinrin emwa ne ẹ i re Ju ne ogha bu Osanobua rre to do gba.

²⁶ Erriọ ọre a ra ya miẹn emwa Izrẹl fan. Zẹ vbene ebe khare: “Ọmiọnmwafan gha ke Zaiọn rre, ọ ghi rhie ekhọe dan hin uniẹn Jekọb rre.

²⁷ I gha gu iran ta ile na, vbe I gha ghi rhie orukhọ iran hin rre nẹ.”

²⁸ Rhunmwuda ne iran na he Iyẹn Ne ọ maa ọghe Osanobua, avbe Ju keghi la ekpa uwa ne ẹ i re Ju khian oghian Osanobua, sokpan zẹ vbe emwa ne Osanobua hannọ zẹ, iran keghi la ekpa avbe erha mwa odede do gha re ọse Osanobua.

²⁹ Rhunmwuda Osanobua i fi ekhọe werriẹ vbekpa ọmwa ne irẹn hannọ zẹ kevbe ne ọ fiangbe.

³⁰ Zẹ vbe ọghe uwa ne ẹ i re Ju, wa ma ka họn ẹmwẹ Osanobua ẹghẹ nii, sokpan, banbanna nian, wa miẹn itohan Osanobua rhie, rhunmwuda, ne avbe Ju ma na họn ẹmwẹ.

³¹ Erriọ vbe nọ, rhunmwuda itohan ne uwa miẹn rhie, avbe Ju keghi do khian ne ẹ i họn ẹmwẹ Osanobua, ne iran miẹn ehe na miẹn itohan rhie ẹghẹ na.

³² Rhunmwuda te Osanobua ya emwa hia khian oghunmwu iyin ehọ ne ọ miẹn ehe na tohan emwa hia.

Urhomwẹ Nọ Ne Osanobua

³³ U miẹn vbe ẹfe Osanobua bun hẹẹ! U miẹn vbene ẹwaẹn kevbe irẹnmwi ọnrẹn dinmwi hẹẹ! De ọmwa nọ gha sẹtin rhan otọ vbene ọ ta ẹmwẹ yi hẹẹ? Gha ọ rẹn vbene ọ ru emwi hẹẹ.

³⁴ Zẹ vbene ebe tae: “De ọmwa nọ rẹn ekhọe Nọyaẹnmwa? De ọmwa nọ bu ẹre ude?

³⁵ De ọmwa ne ọ he rhie emwi nẹẹn ẹdẹ, ne ọ miẹn ehe na dọlegbe ha ẹre nẹẹn?”

³⁶ Rhunmwuda rẹn ọre ọ yi emwi hia, rhunmwuda ẹre ọre emwi hia na rrọọ, rẹn iran vbe rrọọ na: Uyi ọre ọghe Osanobua ẹdẹdẹmwẹdẹ. Isẹ!