Ebe ne Pọl gbẹẹn gie emwa Rom 10 - Edo Bible (E Baibol Ẹdo) Version 1996

¹ Etẹn mwẹ, ekhọekekhọe ọre I ya tae wẹ, vbe ọ rrọọ nian akpawẹ te a miẹn emwa fan! Erhunmwu ọre I na ghe Osanobua ne iran.

² Rhunmwuda I gha wa sẹ osẹe ne iran. wẹ ẹmwẹ Osanobua wa rre iran ekhọe ẹsẹse. Sokpan, vbene ẹmwẹ ọnrẹn rre iran ekhọe ma lele uviẹn ọghe ọmwa ne ọ rẹn emwi ẹse.

³ Rhunmwuda iran ma rẹn vbene Osanobua ya dọlọ ọmwa kugbe be egbe ẹre hẹ, iran keghi rhunmwuda ọnii gha bẹlẹ odẹ ọghe egbe iran, rhunmwuda ọnii, iran ma ghi ye obọ ye Osanobua re vbekpa ọghe vbene ọ ho ne ọ ya dọlọ iran kugbe ba egbe irẹn hẹẹ.

⁴ Rhunmwuda, Jesu mu ẹmwẹ nene Uhi sẹ ufomwẹ nẹ, ne a miẹn ehe na miẹn wẹ ọmwaikọmwa ne ọ yayi, ọ khian ne a dọlọ kugbe ba Osanobua.

Imiẹnfan, Ọghe Emwa Hia Nọ

⁵ Ẹmwẹ ne Mosis gbẹn ọ na khin, vbekpa ọghe ne a rhunmwuda ighẹ a mu nene Uhi sẹ, dọlọ ọmwa kugbe ba Osanobua: “Ọmwa ne ọ rhirhi mu nene Uhi sẹ gha la ekpa ẹre gha rrọọ.”

⁶ Sokpan vbe ọghe wẹ ne a rhunmwuda iyayi dọlọ ọmwa kugbe ba Osanobua, ọ wẹẹ, “Ghẹ gbe agbanmwẹ wẹẹ, ‘De ọmwa ne ọ khian yo odukhunmwu vbe ẹrinmwi yi?’ ” (Ọnii nọ wẹ ne ọ ya tie Kristi rre.)

⁷ “Erriọ ghẹ vbe kha wẹẹ, ‘De ọmwa ne ọ ra yo agbọn ne ọ rre uwu otọ?’ ” (Ọnii nọ wẹ ne ọ ya rhie Kristi ke orinmwi gha dee.)

⁸ Vbene ọ khare ọre ọna khin: “Uhunmwu ne Osanobua gie sikẹ ruẹ, ọ rre aranmwẹ kevbe ekhọe ruẹ” ọnii ọrọre ẹmwẹ iyayi ne ima kpe orhu ẹre.

⁹ Deghẹ wẹ ye akhuarhamwunu ruẹn tae wẹẹ, “Nọyaẹnmwa ọre Jesu khin,” U na vbe yayi vbe ekhọe ruẹ wẹ, Osanobua huẹn ọnrẹn hin idin rre, U gha re ne amiẹnfan.

¹⁰ Rhunmwuda ekhọe ọre ima ya yayi, a keghi dọlọ ima kugbe ba Osanobua, ma ye unu mwa tae ladian, a keghi miẹn mwa fan.

¹¹ Rhunmwuda ebe tae wẹ, “Ọmwaikọmwa ne ọ yaeyi, ẹ i ra gbe I ma rẹn.”

¹² Emwa hia ọre a kha, rhunmwuda alughaẹn i rrọọ ne Ju ra iran ne ẹ i re Ju, Osanobua ọrọre Nọyan ehia, ọ ghi vbe gha fiangbe iran hia ni datie ẹre wọrhọwọrhọ.

¹³ Zẹ vbene ebe khare “Ọmwaikọmwa ne ọ datie eni Nọyaẹnmwa, ọ gha re ne a miẹnfan.”

¹⁴ Sokpan vbe iran gha na datie ẹre hẹ yi deghẹ iran ma yayi? Vbe iran gha na yayi hẹ deghẹ iran ma họn nene ẹmwẹ? Vbe iran gha na họn hẹ deghẹ i re te a kpe orhu ẹre.

¹⁵ Vbe a gha na kpe orhu hẹ, a deghẹ i re te a gie emwa gha khian? Zẹ vbene ebe tae, “A miẹn vbene urremwẹ iran ru ọyunnuan hẹ ighẹ iran ni rhie iyẹn ne ọ maa dee!”

¹⁶ Sokpan ẹ i re iran hia ọre ọ rhan obọ miẹn nene Iyẹn Ne ọ maa. Aizaia tobọ ẹre tae wẹ, “Nọyaẹnmwa, de ọmwa ne ọ ya ẹmwẹ ne ima tae yi?”

¹⁷ Ọnii nọ wẹ a gha họn ẹmwẹ nii ọre a na yae yi, ekpa a kpe orhu Kristi ọre nene ẹmwẹ la rre.

¹⁸ Sokpan ọta ne I mẹ nọ rẹn ọna khin: Iran ma gele họn nene ẹmwẹ ra? Ẹsẹse, iran wa họn, zẹ vbene ebe khare: “Urhu iran la otọ agbọn hia, ẹmwẹ iran sẹ ehe ne agbọn sẹe.”

¹⁹ I ye vbe dọlegbe nọ wẹẹ, Ivbi Izrẹl ma gele rẹn ra? Mosis ọre ọ ka rhie ewanniẹn yọ wẹẹ, “I gha ye uwa khian ne oya ẹvbo ne ọ maa sẹ ẹvbo ghi daa I ghi vbe ye uwa gha mu ohu ẹvbo ne ọre ẹvbo akpa.”

²⁰ Aizaia ọre ọ ghi wa din sẹ, ọ keghi kha wẹẹ, “Emwa ni ma zẹdẹ gualọ mwẹ, miẹn mwẹ, I keghi rhie egbe maa emwa ne ẹ i nọ ẹmwẹ mwẹ.”

²¹ Sokpan ọ ghi ra guan vbe ekpa Izrẹl, ọ wẹẹ, “Ẹdẹ hoho rhurhuurhu ọre I ya viọ obọ da odẹ wẹ ne iran dede ighẹ ẹvbo ne ẹ i họn ẹmwẹ kevbe ne ọ sọtẹ.”