Ebe ne Pọl gbẹẹn gie emwa Rom 1 - Edo Bible (E Baibol Ẹdo) Version 1996

¹ E Pọl ne Ọguọmwadia Kristi Jesu, kevbe ukọ Osa ne Osanobua tie re ne ọ gha kpe orhu Iyẹn Ne ọ maa ọghe irẹn, ọre ọ gbẹn ehe na rre.

² Ọ kpẹre ne Osanobua ghi la unu avbe akhasẹ ve Iyẹn Ne ọ maa na a kevbe gbẹn ọẹn ye Ebe Ne Ọ Huanrẹn.

³ Vbe ekpa ọghe Ovbi ẹre ighẹ Nọyaẹnmwa Jesu Kristi vbe agbọn na, uniẹn Devid ọre ọ la rre.

⁴ Zẹ vbe ọghe uhuanmwẹ ọnrẹn ke ẹrinmwi re, a keghi ya ẹtin nọkhua rhie maa ighẹ Ovbi Osanobua nọ vbe ekpa ne a na huẹn ọẹn kpao vbe idin orinmwi.

⁵ Obọ ẹre ọre Osanobua la ru mwẹ ẹse wẹ ne I gha re Ukọ Osanobua vbekpa Kristi, ne I sẹtin ye emwa hia ni rre uhunmwu ẹvbo hia yayi kevbe ne iran vbe gha họn ẹmwẹ.

⁶ Ne usun ọre uwa ne emwa Rom vbe ye, emwi ne Osanobua tie re ne iran do gha re emwa Jesu Kristi.

⁷ Rhunmwuda ọnii, ọre I na gbẹn ebe gie uwa hia ni rre Rom ne Osanobua ho ẹmwẹ ọnrẹn, ọ na tie uwa ne uwa do gha re emwa irẹn. Te Osanobua ne Erha mwa kevbe Nọyaẹnmwa Jesu Kristi gha rhie ẹsọhẹ kevbe ọfumwegbe ne uwa.

Erhunmwu Ekpọnmwẹ

⁸ Vbe okaro I kpọnmwẹ Osanobua mwẹ ne uwa hia vbe kpa Jesu Kristi rhunmwuda, uhunmwu otọ agbọn hia wa họn ẹmwẹ iyayi uwa.

⁹ Osanobua ne imẹ ya ekhọe mwẹ hia ga vbe uwu ne I na ya ekhọe mwẹ hia kpe orhu Iyẹn Ne ọ maa rẹnrẹn ighẹ ẹghẹ ne I ya na erhunmwu hia ọre I ya ye uwa rre.

¹⁰ I na erhunmwu ghe Osanobua wẹ, vbe iho ne ọ maa ọghọe, ne ọ mwẹ uhunmwu mẹ ẹghẹ na ighẹ otuẹ ne I ra do tuẹ uwa re.

¹¹ Rhunmwuda, I wa ho ne I miẹn uwa ro ẹsẹse ne I miẹn ehe na gu uwa ghae vbe uwu afiangbe ọghe orhiọn ne ọ ya uwa wo vbe egbe.

¹² Emwi ne I yae kha ọrọre wẹ ne a gba ru iyobọ ne egbe, ne iyayi mwẹ ya uwa obọ kevbe ne ọghe uwa vbe ye imẹ obọ.

¹³ I ho ne uwa rẹn, etẹn mwẹ wẹ ẹghẹ ni bun ọre I he ya mu egbe ne I do tuẹ uwa sokpan, emwi eso ghi de gbe odẹ, ẹ i gun mwẹ rre. I te vbe ho ne I fi emwa eso ekhọe werriẹ ye iyayi vbe uwu uwa zẹ vbe ne I vbe fi eso ekhọe werriẹ ye iyayi vbe uwu iran ne ẹ i re Ju ni rre ehe ọvbehe.

¹⁴ Rhunmwuda, te I rri osa ẹre ye urhu vbe obọ emwa hia, iran ni rhan aro kevbe iran ni ma rha aro, iran ni rẹn emwi kevbe iran ni ma rẹn emwi rhọkpa.

¹⁵ Ọnii ọ siẹe ne ọ na bọbọ mwẹ egbe ne I do vbe kpe orhu Iyẹn Ne ọ maa ma uwa ni rre Rom.

Ẹtin Iyẹn Ne Ọ Maa

¹⁶ I wa mu ẹtin yan iyẹn ne ọ maa, ẹtin ne Osanobua ya miẹn iran ni yayi fan nọ, okaro, avbe Ju sokpan kevbe iran ne ẹ i re Ju ba ẹre.

¹⁷ Rhunmwuda, iyẹn ne ọ maa tae ladian nẹ vbene Osanobua ya ye ọmwa khian ọmwata vbe odaro ẹre hẹ vbe ekpa iyayi ọkpa ne ọ ke omuhẹn ya sẹ ufomwẹ, rhunmwuda, Ebe ta ẹe nẹ wẹ, “Ọmwa ne a la ekpa iyayi ya khian ọmwata vbe odaro Osanobua, ọ gha fe.”

Agbọn Hia Rri Abe

¹⁸ Aro da ẹe wẹ izohu Osanobua hihiẹ ke odukhunmwu dee do siẹn yan uyinmwẹ dan kevbe orukhọ emwa dan, emwa ne iba dan ne iran zẹ I gia rẹn ẹmwata ne ọ rrọ.

¹⁹ Osanobua rri iran oya rhunmwuda te a wa rhie ẹre ye idagbo vbe odaro iran ighẹ emwi hia ne ọmwa gha sẹtin rẹn vbekpa Osanobua, Osanobua tobọ ẹre ọre ọ ruẹe ne aro iran dae.

²⁰ Rhunmwuda, ke ẹghẹ ne Osanobua ya bu agbọn gha dee, a vbe emwi ne a ya gie Osa ne a i sẹtin dẹghe, ẹtin etẹbitẹghori ọghọe, kevbe ama emwi ne Osanobua ya ru Osa ne ọ rre ọre egbe, keghi do khian ne aro dae ẹsẹse. Emwa gha sẹtin dẹghe emwi na hia vbe uwu emwi ne Osanobua yi. Rhunmwuda ọnii, iran i miẹn emwi mu na hiehie.

²¹ Iran rẹn Osanobua, sokpan iran ma rhie uyi ne ọ khẹ kẹe nẹẹn, debare, iran ma kpọnmwẹ ọẹn. Ne iran gha na te ru vberriọ, ekhọe iran keghi do khian emwi oya fẹẹrẹ.

²² Iran khare ighẹ iran waan, sokpan akpa iran wa khin.

²³ Ne iran gha na te gha ga Osanobua Ne ẹ i wu, iran keghi ya gha ga amazẹ ne a ma ẹn ya ta ọmwa ne ọ sẹtin wu, ra ahianmwẹ, ra aranmwẹ oha, ra emwi ni ye ẹko hiọrọ.

²⁴ Rhunmwuda ukọnmwẹ dan ne emwa ne agbọn kọẹn, Osanobua keghi he iran yọ ne iran gha yin uyinmwẹ ẹwia ni rre iran ekhọe, iran keghi vbe gu egbe iran yin uyinmwẹ emwi ekhue.

²⁵ Iran fi ẹmwata ne ọ rre ẹmwẹ Osanobua werriẹ ya khian ohoghe. Iran keghi ga, iran na vbe gha ya uhunmwu rhanmwẹ otọe ne emwi ne Osanobua yi, ne iran gha na te gha ga Ayi Ne ọ yi tobọ ẹre, ne a gha rhie uyi na ẹdẹdẹmwẹdẹ, Isẹ.

²⁶ Rhunmwuda emwi ne emwa ne agbọn ru, Osanobua keghi he iran ye orriarria emwi ekhue iran. Uhin ighẹ te ikhuo ne a rẹngbe ghi fi ogamwẹ na ne a rhie ne iran werriẹ khian ọvbehe, iran ghi gha lo ẹre la ihan ne emwi ne a te wẹ ne a yae gha ru.

²⁷ Erriọ vbe nọ zẹ, ikpia ni rrọọ i ghi tie ikhuo ovbe zẹ vbe ne Osa mwamwa ẹn, sokpan iran ghi rhikhan lele egbe, okpia vbe okpia. Ikpia ghi gha gu egbe ru emwi emwi ekhue. Emwi ne ọ ghi ke ẹre ikian ọrọre wẹ, a keghi rri iran tobọ iran oya ne ọ khẹ ke emwi dan ne iran ru.

²⁸ Rhunmwuda ighẹ emwa ne agbọn ma giẹ irẹnmwẹ Osanobua ẹmwata di iran uhunmwu ya, Osanobua keghi he iran ye ẹmwẹ ekhọe iran ne ọ kulo, sẹrriọ wẹ, a ghẹ ru ọre iran ghi ru.

²⁹ Uyinmwẹ dan hia wa gua iran obọ ro, ọkhọ, orriarria, iba, uwu igbọvo iran wa ye, izigha, igbinna, erẹrẹ, kevbe irriakhuẹ.

³⁰ Iran ta ewẹwẹwẹ, iran ta egbe ọtakhọ, iran khui iwu Osanobua, iran zẹ vbe udu, iran tọn egbe mu, iran rhuọ, iran ghi gha gualọ iba ọgbọn ne iran gha zẹ, iran i họn ẹmwẹ ne evbibiẹ iran.

³¹ Iran ghi gha gbe alama oghẹ, iran i mu eyan iran sẹ, iran i tohan ọmwa rhọkpa.

³² Iran rẹnrẹn wẹ Uhi Osanobua kha re ighẹ uhunmwu ọre emwa ni ru emwi vberriọ ya khiọ ẹre. Sẹ evba, te iran ye ru avbe emwi na, ne ọ ghi wa rhia sẹ vbọ ọrọre wẹ, iran ghi vbe gha kpe ọbọbọ ye emwa ni ru vberriọ re.